7 غلطات بتعمليهم عند ازالة الشعر في المنطقة الحساسة..وازاي تتخلصي منه بطريقة صح

المنطقة الحساسة من اكتر المناطق في الجسم اللي ممكن تتأثر بسرعة بأقل حاجة, ومن الحاجات اللي بتأثر على المنطقة دي هي ازالة الشعر, اثناء الازالة ممكن نكون بنقع في غلطات خصوصا لو بنستعمل الشفرة أو مكنة الحلاقة ومع التكرار كل مرة ده ممكن يضر المنطقة, عشان كده النهاردة هنقولك من خلال موضوعنا اكتر الغلطات اللي ممكن تكوني بتقعي فيها عند ازالة الشعر من المنطقة الحساسة, وطريقة ازالة الشعر من المنطقة الحساسة بطريقة صح.

طريقة ازالة الشعر من المنطقة الحساسة:

1- الغلطة الاولى: بتحلقي المنطقة بعد الشاور على طول:

اكيد في اوقات كتير ممكن تكوني مستعجلة وده بيخليكي تستعجلي في حلاقة المنطقة اثناء الشاور وده ممكن يسبب التهاب للمنطقة, عشان كده الافضل انك تخلي الحلاقة اخر حاجة تعمليها بعد الشاور, عشان تدي فرصة لبصيلات الشعر تبقى ناعمة, وده هيقلل انه يحصل اي التهابات او تهيج للمنطقة, واعملي تقشير للمنطقة قبل الحلاقة عشان تنعمي الشعر وتخرجي اي شعر تحت الجلد.

2- الغلطة التانية: استخدام الشاور جل وشفرة قديمة:

استخدام شفرة قديمة وشاور جل او صابون للحلاقة من الغلطات اللي ممكن نكون بنعملها, لان اختيار الادوات الصح هتعمل فرق كبير جدا على البشرة, استخدمي كريم حلاقة يكون من غير عطور تقيلة عشان ميسببش حساسية للبشرة, وسيبيه على المنطقة لمدة من دقيقة لدقيقتين عشان تنعمي الشعر, وبمكنة حلاقة جديدة ابدأي شيلي الشعر, لان المكنة القديمة ممكن تسبب تهيج وحكة للبشرة.

شوفي من هنا 8 حاجات مهمة لازم تعرفيهم عن كريمات ازالة الشعر.

3- الغلطة التالتة: مش بتقصي الشعر:

قص الشعر مهم جدا قبل عملية الحلاقة لانها هتقلل من طول الشعر وهيخلي الحلاقة اسهل, لو لقيتي الشعر اطول من ¼ بوصة تقريبا قصية قبل ما تدخلي الحمام ده مش بس هيوفرلك في الوقت وهيسهل عليكي الحلاقة, لكن كمان هيحمي بشرتك من التهيج.

4- الغلطة الرابعة: الخوف من الشمع:

شمع البكيني ممكن يكون في بنات كتير بيخافوا منه انه يكون مؤلم وعشان كده دايما بيستسهلوا ويستخدموا المكنة, لكن المفروض اننا منعتمدتش على الحلاقة بالمكنة بشكل مستمر, نحاول نغير كل فترة للشمع.

5- الغلطة الخامسة: الحلاقة الجافة باستعجال:

اوقات كتير ممكن نكون مستعجلين ومعندناش وقت وعايزين نشيل الشعر بسرعة, وده ممكن يخليكي ممكن تحلقي حلاقة جافة من غير كريم الحلاقة, في الحالة دي على الاقل رطبي المنطقة اللي عايزة تشيلي منها الشعر بفوطة مبلولة بمية سخنة اضغطي عليها شوية لمدة دقايق عشان تنعمي الشعر وتحضري بشرتك للحلاقة, وتمنعي ظهور الحبوب الحمرا اللي ممكن تحصل في الحالة دي.

6- الغلطة السادسة: استخدام اللوشن العادي لتهدئة البشرة:

غالبا اللوشن العادي اللي بتستخدميه للجسم هيكون فيه عطور وده ممكن يسبب تهيج للبشرة, عشان كده الافضل انك تشتري منتج خاص لتهدئة المنطقة, وخليكي حذرة من استخدام كريمات بعد الحلاقة الرجالي لانها حاجة مختلفة يعني مينفعش نستخدمها, الافضل تستخدمي مرطب طبيعي خفيف زي الالوفيرا او زيت جوز الهند لترطيب وحماية البشرة بعد الحلاقة.

شوفي من هنا طريقة عمل لوشن بعد ازالة الشعر لبشرة ناعمة جدا.

7- الغلطة السابعة: لبس ملابس داخلية مش مناسبة بعد الحلاقة:

بعد الحلاقة الافضل انك تبعدي عن الملابس الداخلية اللي فيها تفاصيل او دانتيل, وتعتبر الملابس الداخلية القطن 100% الناعمة واللي بتكون من غير اشرطة ضيقة حوالين منطقة فتحات الساق مثالية جدا وهي الانسب للوقت ده, لانها هتدي بشرتك فرصة للتنفس وانها تهدى, وهتمنع من ظهور الشعر اللي تحت الجلد.

17 وصفة طبيعية لعلاج الحبوب اللي بتسببها مكنة الحلاقة بعد ازالة الشعر