بالصور.. 10 أفكار تعملي بيهم ميك اب طبيعي ماحصلش
الميك أب بيعتبر حاجة مهمة جدا فى أي لوك بنعمله، وكمان يمكن هو لعبة البنات المفضلة اللي دايما بنحب بجرب فيها كل حاجة جديدة ونكتشف الألوان والأنواع والطرق المختلفة، ولأن عالم المكياج واسع وكبير وعشان كمان الحياة العملية بتخلي وقتك ضيق خصوصا لو بتدرسي أو لو بتشتغلى، وحتى لو كنتي بتدورى على الجديد دايما وبتحبي تظهري بمظهر حلو بس برده طبيعى ومش متكلف، في المقال ده بنات حوا هيعرفوكى أهم 10 أفكار تعمل بيهم لوك ميك اب طبيعي عشان تستخدمي المكياج دايما فى انك تظهري جمالك الطبيعي، اعرفى معانا 10 أفكار تعملي بيهم ميك اب طبيعي ماحصلش .
بالصور.. 10 أفكار تعملي بيهم ميك اب طبيعي ماحصلش natural makeup looks
1- آيشادو بني مات :
المكياج الطبيعي مش معناها أبدا انك تستخدمى كميات أقل من الميك اب لكن ان تقدرى تحولي الميك اب ده لآداة تظهر جمالك الطبيعي، في اللوك اللي في الصورة استخدمنا فاونديشن خفيف كـ base للميك اب مع هيلايتر خفيف أوي ولون بني مات للآيشادو ودمجناه لبره في اتجاه الحاجب ولحد نهاية الجفن وممكن تستخدمي زبدة كاكاو لشفايفك واستخدمي ماسكارا خفيفة على رموشك.
2- الوهج الطبيعي :
اللمعة الخفيفة اللي ماتبانش مهمة جدا في اللوك الطبيعي، فى اللوك ده امزجي كمية بسيطة أوي من الهيلايتر السائل liquid highlighter مع كريم الأساس بتاعك، ده هيخلي الأساس بتاعك ناعم وبيلمع خفيف فيبان طبيعي، وبعد كده طبقى كمية قليلة من الهايلايتر على الأنف، الجبهة و عضمتين الخد وكملى اللوك بتاعك مع روج بلون مناسب ويفضل يكون nude أو بلون البشرة.
3- شفايف نيود ورموش طويلة :
أحيانا بيكون الروج المات بلون طبيعي نيود هو أفضل حاجة ممكن تعمليها لما تقرري تعملي مكياج بلوك طبيعي، طبقى أساس خفيف على الوجه كله و استخدمي كمية خفيفة أوي من البرونزر على عضمتين الخد و انهي اللوك بتاعك مع احمر خدود خفيف واستخدمي الآيلاينر في تحديد الزوايا الخارجية لعينيكي، وانهي اللوك بتاعك مع روج نيود وطبقة من الماسكارا.
4- الآيشادو الخفيف وشفايف بروج مات:
الآيشادو الخفيف بيعتبر من الأدوات المهمة اللى ممكن تعملي بيها لوك مكياج طبيعي، جربي تعملي اللوك ده بأنك تستخدمى كمية خفيفة من الآيشادو بلون بنى مات فاتح على الزاويا الخارجية لعينيكى وادمجي لبره عشان تعملي سموكي لوك خفيف، واعملى أساس لمكياجك بأنك تدمجى كريم الأساس مع كمية بسيطة اوى من الهايلايتر،وانهي اللوك بتاعك بروج بينك مات وطبقة سمكية من الماسكارا.
5- هايلايت وشفايف بلون بينك :
الروج البينك بيقوى من اى مكياج طبيعى تعمليه، لو حبيتي تعملى اللوك ده استخدمي طبقة خفيفة من الفاونديشن علشان تعملي تغطية خفيفة لمتوسطة ، وبلاشر بينك على عضمة الخد مع طبقة خفيفة أوى من الهايلايتر على الخد، عضمة الحاجب والزاوية الداخلية للعين وكملى اللوك بتاعك مع روج بينك خفيف.
6- عيون بأي شادو ذهبي:
درجات الذهبي بتضيف لمسة جميلة لأى لوك طبيعي تعمليه، استخدمي آيشادو دهبي على جفونك مع لون بني خفيف وادمجيهم باتجاه الخارج ناحية نهاية الحاجب وبعد كده ضيفي طبقة خفيفة من الماسكارا علشان تطولي الرموش و حافظى على باقى المكياج اللي هتستخدميه بسيط مع زبدة كاكاو.
7- مات ايشادو مع هايليتر :
درجات الآيشادو المات بتساعدك تعملى لوك طبيعي و فريش، في اللوك ده استخدمنا تغطية خفيفة من الفاونديشن كأساس للمكياج مع لمسة خفيفة من البرونزر على الخدين و هايلايتر خفيف على الجبهة و أول الأنف والزوايا الداخلية للعين، واستخدمنا آيشادو بلون بني مات ودمجناه في اتجاه الزاوية الخارجية للعين.
8- خدود وشفايف وردية :
الخدود الوردية هتساعدك كمان انك تعملي ميك اب طبيعي ،استخدمي فاونديشن خفيف مع أساس لامع خفيف و معاه بلاشر بينك بدرجة مناسبة لبشرتك على عضمة الخد و كملى اللوك بتاعك مع روج بينك و لون آيشادو فاتح أو نيود مع لمسة خفيفة من الماسكارا.
9- رموش طويلة وشفايف بلون بينك مات:
ولو مستعجلة أوى وماعندكيش وقت، أحيانا ممكن الماسكارا تبقى هى الحل الأسرع والأفيد عشان تعملي لوك طبيعي من خلال المكياج، ممكن تعملي الوك اللي في الصورة بسهولة بانك تستخدمى أساس خفيف لمكياجك على مساحة الوجه كلها مع مسحة خفيفة من البلاشر على عضمة الخد و روج بلون بينك شاحب وطبقة سميكة من الماسكارا المطولة للرموش.
10- آيشادو بلون بينك مع روج خوخي:
آخر فكرة معان من الأفكار اللى تقدري تعملي بيها ميك اب طبيعي هى انك تستخدمى آيشادو بلون بينك ، استخدمي مسحة خفيفة من الآيشادو بالدرجة اللي تفضليها من درجات اللون البينك مع درجة أغمق من نفس اللون وادمجيهم باتجاه الزاوية الخارجية للعين، بعد كده ضيفي طبقة خفيفة من الآيلاينر السائل وطبقة كثيفة من الماسكارا، واستخدمى كريم الأساس المفضل بالنسبة لك وهايلايتر على الخدين وكملى اللوك بتاعك مع روج بدرجة من درجات اللون الخوخي.
اعرفي معانا كمان ازاي تحطي الايشادو المات بطريقة صح ويطلع شكله حلو
