روتين سهل للعناية بالبشرة هيخلي بشرتك صحية ونضرة

ريهام محمود

في

9099

كلنا عارفين اساسيات العناية الصباحية اللي ممكن نعملها زي غسول البشرة, غسل الاسنان بالمعجون, استخدام مزيل العرق دي الحاجات البسيطة اللي تقريبا كلنا بنعملها عشان نتأكد اننا نحافظ على مظهر كويس, لكن مع ذلك في حاجات اكتر من كده ممكن ندخلها في روتينا اليومي هتفرق جدا في مظهرنا, وده اللي هنعرفه النهاردة من خلال المقال بتاعنا هنقول لكل بنات روتين للعناية بالبشرة هيخلي بشرتك صحية ونضرة.

روتين للعناية بالبشرة:

1- المية بالليمون:

عصير الليمون المخلوط بالعسل يعتبر افضل سيروم مضاد للشيخوخة بسبب الخصائص المضادة للاكسدة القوية جدا اللي موجودة فيه, ابدأي يومك كل يوم الصبح بكوباية مية مع عصير ليمون طازة وعسل نحل, المشروب ده بيساعد على زيادة قدرة الكبد, والكبد لما يكون مستقر ده يعتبر مفتاح البشرة الصحية, الليمون غني جدا بعناصر بتساعد على الوقاية من السرطان, وفيتامين C المفيد جدا للبشرة, ومهم ان الليمون يكون فريش.

2- تدليك البشرة بالفرشة الجافة:

مهما الموسم صيف او شتا, دخلي استخدام الفرشة الجافة للبشرة في روتينك اليومي, هاتي الفرشة الخاصة الخيزران الخاصة بالبشرة, واملي البانيو بمية دافية واقعدي فيها واثناء الوقت ده دلكي بشرتك بالفرشة في حركات دائرية من تحت لفوق ناحية القلب, بتساعد جدا في تحسين الدورة الدموية, وتنعيم الجسم, وبتقلل كمان من السيلوليت.

3- كتابة الحاجات الايجابية:

واحدة من الحاجات اللي تعتبر مضادة للشيخوخة هي التركيز على الايجابيات, اكتبي الحاجات الحلوة اللي بتحصل في يومك وحاولي تركزي على اكتر 3 حاجات كويسين حصلوا في اليوم وتكوني شاكرة لده ومبسوطة, مع مرور الوقت هتلاقي ده بينعكس عليكي بشكل ايجابي جدا, وهتبقي متصالحة مع نفسك اكتر وبالتالي ده هيقلل من الضغط والقلق والتوتر اللي ممكن يأثروا بشكل سلبي على بشرتك.

4- مضمضة الزيت:

خدي معلقة صغيرة مليانة بزيت جوز الهند, مضمضي بيه الفم كله وبين الاسنان لمدة حوالي 20 دقيقة, لو حاسه ان المدة الطويلة ممكن تعملي المضمضة اثناء ما انتي بتعملي اي حاجة تانية مثلا وانتي في الحمام او بتسرحي شعرك, وبعدها اتخلصي من الزيت, الطريقة دي مش بس تعتبر مبيضة للاسنان, لكن ثبت ان مضمضة الزيت ممكن تساعد في تحسين صحة اللثة, وبتمنع البكيتريا, وبتنعكس بشكل ايجابي على الجلد وبتخلي شكله صحي, وكمان مضمضة الزيت بتساعد على علاج حب الشباب زي ما اتكلمنا عنها في موضوع قبل كده بالتفصيل, والعادة دي هي عادة هندية بيستخدموها النساء في الهند من سنين.

5- العصير الاخضر:

ابدأي اتخلصي من عادة شرب القهوة الصبح واستبدليها بالعصير الاخضر في روتينك اليومي, العصير بيساعد على تنضيف الجسم من السموم, ولو استمريتي عليه بشكل يومي هتضمني بشرتك تفضل صحية على طول.

وبيتعمل بطريقة سهلة جدا هتستخدمي فيه الخضروات اللي لونها اخضر, ممكن تحطي اي خضروات انتي عايزاها ممكن تخلطي خيار مع بقدونس وكرفس وليمون, وممكن تضيفي لهم تفاح اخضر وجنزبيل او بنجر وتضربيهم في الخلاط وتشربيهم, واحنا اتكلمنا قبل كده عن اكتر من طريقة لعمل عصير لبشرة صحية ونضرة.

6- عصير الالوفيرا:

كلنا اكيد عارفين وزي ما قولنا قبل كده ان جل الصبار استخدامة كماسك على البشرة مفيد جدا وبيساعد على تجديدها وترطيبها, لكن استخدامه كماسك مش بس هو المفيد انتي ممكن كمان تشربيه كعصير او الصبار المخلوط بالمية, هيرطب بشرتك بطريقة لا تتخيليها ده غير ان جسمك هيستفيد من كمية الفيتامينات اللي فيه لانه غني بفيتامين E, B, C وده كله هينعكس على بشرتك وهيخليها صحية.

وعصير الصبار تقدري تعمليه بطريقة بسيطة جدا ضيفي 2 معلقة كبيرة من جل الصبار للمية العادية , او للتمر , او تضيفيه لعصير البرتقان او مية جوز الهند او مية الشعير او عصير الليمون وتضيفي سكر او عسل وتشربيه, وتقدري تضيفيه لاي نوع عصير فاكهة او خضار زي ما انتي عايزة.

ممكن تشوفي من هنا 20 وصفة مذهلة للبشرة والشعر باستخدام جل الالوفيرا.

7- تقشير البشرة:

كتير قبل كده اتكلمنا عن اهمية تقشير البشرة بانتظام عشان تتخلصي من خلايا الجلد الميتة وتنضفي البشرة والمسام من اي اتربة او اثار مكياج وتحميها من مشاكل الجلد, وتحافظي عليها نضيفة وصحية.

تقدري تستخدمي للتقشير الملح او السكر او البن وتخلطي معاه اي نوع زيت زي زيت جوز الهند, زيت الزيتون, زيت الجوجوبا, زيت شجرة الشاي, وتعملي سكراب للبشرة.

ممكن تشوفي من هنا وصفات طبيعية لتقشير الجلد.

8- ترطيب البشرة بالزيوت المناسبة:

في كتير من انواع الزيوت اللي بتساعد على ترطيب وتغذية البشرة بشكل فعال جدا, ومن اكتر الزيوت المفيدة اللي ممكن تستخدميها لبشرتك هي زيت جوز الهند, زيت الجوجوبا, زيت فيتامين E, وزيت الزيتون.

9- ماسكات البشرة:

لو انتي شايفة ان بشرتك محتاجة اكتر من الترطيب, يبقى تعملي ماسك وبعدين ترطبي البشرة, ممكن تستخدمي خل التفاح, مية الورد, بياض البيض, او ماسك الاسبرين هاتي اي نوع اسبرين من بتاع الصداع بس تكون حبوب بيضا من غير الوان اطحنية واخلطيه بالمية وسيبيه على البشرة لمدة من 10 – 20 دقيقة تقريبا, وبعدين اغسليه, او تختاري اي ماسك مناسب لبشرتك تعمليه, وبعدها رطبي البشرة بالزيت المرطب من الانواع اللي قولناها فوق.