في 4 خطوات بس اعملي مكياج مشرق ومضيء للصيف

بقلمريهام محمود فيمكياج visibility1690

كتير من البنات بيحبوا لوك النو ميكب اكتر للصيف بس ده ميمنعش اننا نضيف لمسة مضيئة ومشرقة للمكياج بتاعنا ونظهره بشكل احلى, وده اللي هنشوفه مع بعض النهاردة هنقول لكل بنات حوا خطوات مكياج للصيف بلمسة مضيئة خفيفة باستخدام درجات الوان دافية وناعمة.

خطوات مكياج للصيف:

قبل ما نبدأ الخطوات جهزي بشرتك وحطي الاساسيات, ابدأي بالكريم الواقي من الشمس, وبعده المرطب, وبعده كريم BB او CC, ولو في اي عيوب في البشرة ممكن تستخدمي عليها الكونسيلر عشان تداريها.

1- الخطوة الاولى:

اول خطوة سرحي الحواجب وساويها بالفرشة, واملي الفراغات بشكل خفيف ببودرة حواجب بنفس درجة لون حواجبك عشان اللوك يطلع طبيعي, مافيش داعي للخطوط الحادة في الرسم خلي الرسمة ناعمة, وممكن تثبتي الرسمة في الاخر بجل الحواجب لو محتاجة تثبيت.

خطوات مكياج للصيف
خطوات مكياج للصيف

2- الخطوة التانية:

باستخدام فرش دمج صغيرة, خدي من ايشادو بلون برونزي دافي او نحاسي, وحطيه على الجفن كله وعلى تنية الجفن وادمجيه كويس عشان ميبقاش فيه اي خطوط ويطلع شكله ناعم على العين.

خطوات مكياج للصيف
خطوات مكياج للصيف

3- الخطوة التالتة:

في الخطوة دي هنضيف لون دافي على الوش من الجناب وعلى عضم الخد باستخدام البرونزر, ممكن تستخدمي برونزر بودر, ولكن للوك صيفي مضيء ممكن تستخدمي البرونزر الكريمي وتدمجيه كويس على البشرة عشان ميبقاش اللوك مطفي اوي, واستخدمي البرونزر على عضم الوش عشان تحدديه بشكل خفيف عشان اللوك يبقى طبيعي وادمجيه كويس بفرشة او سفنجة, بعدها طبقي بلاشر بلون خوخي او مرجاني على تفاحتين الخد وممكن تستخدمي بلاشر بودر او كريمي حسب اللي تفضليه اكتر.

خطوات مكياج للصيف
خطوات مكياج للصيف

4- الخطوة الرابعة:

دلوقتي الخطوة اللي هتدي اضاءة وتوهج للمكياج, وهي استخدام الهايلايتر, ممكن تستخدمي هايلايتر بودر او كريمي حسب اللي تفضليه, لو هتستخدمي النوع الكريمي خدي منه بصوابعك ومرريه بشكل خفيف على الوش, ولو هتستخدمي البودر يبقى تستخدمي الفرشة, والاماكن اللي هتحطي عليها الهايلايتر هي النقط العالية من الوش يعني على اماكن عضم الوش اللي هي العضمة اللي تحت الحاجب, على طول عضمة الجبين, اسفل جسر الانف, في الزوايا الداخلية للعين, وفوق كوس كيوبيد اللي هي منطقة نص الشفايف اللي فوق, واي هايلايتر هيفضل ايدك او على الفرشة بعد ما تحطي ممكن تحطيه بشكل خفيف على منتصف الجبين او على اطراف الدقن.

خطوات مكياج للصيف
خطوات مكياج للصيف

– اللمسات النهائية:

لمسة نهائية, حطي طبقة من الماسكارا ولو رموشك اصلا طويلة طبيعي يبقى ممكن تستغني عن الماسكارا, وضيفي لمعة على شفايفك بزبدة كاكاو ملونة او ملمع شفايف, وتحديد الشفايف اختياري حسب ما انتي عايزة تحددي شفايفك او لا.

وبكده تبقي عملتي لوك مكياج صيفي سريع هيديكي لوك مضيء ومشرق.

خطوات مكياج للصيف
خطوات مكياج للصيف

اتعلمي خطوة بخطوة مكياج رائع مناسب للجامعة

مكياج مناسب للجامعة