افضل 10 ماسكات طبيعية باستخدام الطين لبشرة نقية ونضرة

بقلمريهام محمود فيبشرة visibility1978

الطين من العلاجات الطبيعية اللي بتستخدم من زمان جدا في عالم تجميل البشرة وده بسسبب قدرته على تنضيف البشرة وازالة السموم والزيوت, كمان بيساعد في تقليل حجم مسام البشرة, وتفتيحها وبيهدي البشرة من الحروق, والفوايد دي اكتر على سبيل المثال مش الحصر هو فوايدة كتير جدا للبشرة, والنهاردة من خلال موضوعنا هنعرف مع بعض افضل ماسكات الطين للبشرة.

هنلاقي من طين البشرة اكتر من نوع في طين الكاولين وده مناسب جدا للبشرة الجافة, وطين البنتونيت مناسب للبشرة الدهنية, والطين البحري الاخضر مناسب للبشرة العادية, والطين المغربي اللي يعتبر تقريبا مناسب لكل انواع البشرة, والماسكات اللي هنقولها تختاري فيها نوع الطين المناسب لنوع بشرتك وتستخدميه في الوصفات.

ماسكات الطين للبشرة
ماسكات الطين للبشرة

ماسكات الطين للبشرة:

1- ماسك الطين ومية الورد:

الماسك ده بيساعد على تقشير خلايا الجلد الميتة, وبينضف المسام, ازالة البقع السودا وعيوب البشرة.

المكونات:

1 معلقة كبيرة طين.

½ معلقة كبيرة جل الالوفيرا.

½ معلقة كبيرة مية ورد.

الطريقة:

هنخلط المكونات كلها مع بعض كويس بحيث انه يكون ناعم مافيش فيه اي تكتلات, ولو لقينا الخليط سميك اوي ممكن تزودي جل الالوفيرا لحد ما توصلي لقوام مناسب, اغسلي بشرتك افردي عليها الماسك وسيبيه من 20 – 30 دقيقة, بعدها اغسليه بالمية مع تدليك البشرة وانتي بتشيليه في حركات دائرية, كرريه من 1 – 2 مرة في الاسبوع.

ماسكات الطين للبشرة
ماسكات الطين للبشرة

2- ماسك الطين المغربي:

الطين المغربي الاحمر يعتبر مثالي جدا للاشخاص اللي بيعانوا من البشرة الدهنية وحب الشباب, مية الورد بتساعد على حفظ توازن درجة الحموضة في البشرة, والماسك غني بخصائص مضادة للاكسدة وده بيساعد على تجديد البشرة ومنع حب الشباب.

المكونات:

2 معلقة كبيرة طين.

3 معلقة كبيرة مية ورد.

1 معلقة صغيرة افوكادو مهروسة.

الطريقة:

اخلطي المكونات كلها مع بعض, افرديه الماسك على البشرة وسيبيه لحد ما ينشف, بعدها اغسليه بمية دافية وبعدها مية باردة, كرريه من مرة لمرتين في الاسبوع.

ماسكات الطين للبشرة
ماسكات الطين للبشرة

3- ماسك الطين والكركدية واللافندر:

الكركدية غني بالمواد المضادة للاكسدة اللي بتساعد على علاج تلف الجلد وبتجدد البشرة, وبيساعد على توازن البشرة عن طريق الترطيب والتحكم في افراز الزيوت على البشرة, الكركدية بيساعد كمان على تقشير البشرة وبيزود الدورة الدموية وهيخلي بشرتك ناعمة وشكلها نضر وبتلمع, بيحتوي كمان على احماض الفا هيدروكسي المضادة للشيخوخة والاحماض الامينية, والاتنين بيساعدوا على تجديد البشرة.

المكونات:

1 معلقة صغيرة كركدية بودر.

1 معلقة صغيرة لافندر بودر.

2 معلقة صغيرة طين.

زبادي, او عسل نحل, او مية.

الطريقة:

اخلطي الكركدية مع اللافندر والطين, ضيفي عليهم اي مكون هتختاريه ما بين الزبادي او العسل او المية, واعجنيهم كويس مع بعض لحد ما يبقى الخليط سميك شوية, افرديه على البشرة, سيبيه لحد ما ينشف ومتسيبهوش فترة طويلة زيادة عن اللزوم عشان ميسحبش الرطوبة من بشرتك, بعدها رشي البشرة بالمية وابدأي اعملي تدليك خفيف في حركات دائرية وانتي بتشيلي الماسك, واغسلي بشرتك بالمية ونشفيها ورطبيها بالكريم المرطب.

ماسكات الطين للبشرة
ماسكات الطين للبشرة

4- ماسك الطين والعسل:

الماسك ده بيساعد في علاج ومنع حب الشباب, لان العسل معروف بخصائصة المضادة للبكتيريا ومضادات الاكسدة اللي بتساعد على علاج ومنع حب الشباب.

المكونات:

1 معلقة كبيرة طين.

من 1 – 2 معلقة كبيرة مية مقطرة.

1 معلقة كبيرة شوفان مطحون.

4 نقط زيت شجرة الشاي.

الطريقة:

اخلطي الطين مع الشوفان, وضيفي لهم مية بالتدريج لحد ما يبقى عندك خليط قوامه متوسط سهل الفرد على البشرة, بعدها ضيفي زيت شجرة الشاي وقلبي المكونات مع بع كويس, افردي الماسك على البشرة وسيبيه من 10 – 15 دقيقة, بعدين اغسليه بمية دافية وبعدها مية باردة.

ماسكات الطين للبشرة
ماسكات الطين للبشرة

5- ماسك الطين والعسل:

المكونات:

2 معلقة كبيرة طين.

عسل نحل.

2 معلقة كبيرة مية ورد.

الطريقة:

اخلطي الطين مع مية الورد وقلبيهم مع بعض, وبعدين ضيفي لهم كمية صغيرة من العسل وقلبيهم تاني مع بعض, افردي الماسك على البشرة وسيبيه لحد ما ينشف, وبعدها اغسليه بالمية, كرريه مرتين في الاسبوع.

ماسكات الطين للبشرة
ماسكات الطين للبشرة

6- ماسك الطين والكركم:

الكركم ليه خصائص مطهرة ومضادة للالتهابات وبتخلي البشرة صحية وبتساعد على تفتيحها, والقرفة بتساعد على علاج حب الشباب.

المكونات:

4 معالق كبيرة طين.

½ معلقة صغيرة قرفة.

½ معلقة صغيرة كركم.

6 معالق كبيرة مية.

معلقة صغيرة مية ورد.

الطريقة:

اخلطي المكونات كلها مع بعض لحد ما يتكون عندك عجينة سميكة, افرديها على البشرة, سيبيها لحد ما تنشف وبعدين اغسليها بمية دافية.

ماسكات الطين للبشرة
ماسكات الطين للبشرة

7- ماسك الطين وزيت الورد:

الماسك ده بيساعد على ترطيب البشرة, وعلاج الامراض الجلدية زي الاكزيما وندبات حب الشباب.

المكونات:

1 ½ معلقة كبيرة طين.

1 ½ معلقة كبيرة مية باردة مفلترة.

5 نقط زيت ورد.

من 2 – 3 نقط اي نوع زيت عطري.

الطريقة:

اخلطي كل المكونات مع بعض, افردي الماسك على البشرة وسيبيه لحد ما ينشف, بعدها اغسليه بمية دافية.

ماسكات الطين للبشرة
ماسكات الطين للبشرة

8- ماسك الطين والاعشاب:

المكونات:

1 معلقة كبيرة طين.

1 معلقة صغيرة من خليط زيت الكاموميل والليمون والفانيليا “وممكن تضيفي اي زيوت تانية انتي تختاريها”.

1 معلقة صغيرة عسل نحل.

شاي اعشاب من اختيارك “ممكن كاموميل, شاي اخضر, نعناع” هنستخدمه لخلط العجينة.

5 نقط من اي نوع زيت عطري من اختيارك

الطريقة:

اخلطي المكونات كلها مع بعض, وضيفي شاي الاعشاب بالتدريج لحد ما يبقى الخليط عجينة سميكة, افردي الماسك على بشرتك وسيبيه  من 10 – 15 دقيقة او لحد ما ينشف, اغسلي الماسك زي طرق الماسكات اللي فاتت بليه بشوية مية ودلكيه تدليك خفيف في حركات دائرية لحد ما تشيليه كله, بعدها اغسلي وشك بمية دافية او تمسحيه بفوطة مبلولة.

ماسكات الطين للبشرة
ماسكات الطين للبشرة

9- ماسك ديتوكس:

الماسك ده بيعمل ديتوكس او تنضيف للبشرة وللمسام وبيخلصها من الزيوت الزيادة واي تراكمات واتربة.

المكونات:

1 معلقة كبيرة طين.

1 ½ معلقة كبيرة مية ورد.

2 معلقة كبيرة مية.

كبسولة فحم منشط, او قرص فحم مطحون.

4 نقط من زيت الورد.

الطريقة:

اخلطي الطين مع الفحم, ضيفي لهم المية ومية الورد قلبيهم مع بعض كويس, وبعدين ضيفي زيت الورد وقلبيهم تاني مع بعض.  افردي الماسك على البشرة وسيبيه 10 دقايق لحد ما ينشف, بعدها اغسليه يمية دافية مع التدليك الخفيف في حركات دائرية.

ماسكات الطين للبشرة
ماسكات الطين للبشرة

10- ماسك الطين والفحم وخل التفاح:

الماسك ده بينضف البشرة وبيزيل السموم, وبينقي البشرة

المكونات:

1 معلقة صغيرة طين.

كبسولة فحم منشط.

1 معلقة صغيرة خل تفاح.

3 نقط من زيت شجرة الشاي.

الطريقة:

اخلطي المكونات كلها مع بعض وقلبيهم كويس, ولو لقيتي الماسك ناشف محتاج سائل ممكن تضيفي كام نقطة مية لحد ما الخليط يبقى قوامه مناسب وسهل الفرد على البشرة, حطيه على البشرة وسيبيه 10 دقايق لحد ما ينشف, وبعدها اغسليه بمية دافية.

ماسكات الطين للبشرة
ماسكات الطين للبشرة

طريقة عمل مية ميسيلار لجمال بشرتك بمكونات طبيعية في البيت

طريقة عمل مية ميسيلار
طريقة عمل مية ميسيلار