اعرفي شعرك منخفض او متوسط او عالي المسامية..وطريقة العناية بكل نوع

بقلمريهام محمود فيشعر visibility861

اكيد كتير من البنات كل واحدة ممكن تسأل نفسها نوع شعرها ايه وازاي تقدر تعرفه؟ ويمكن كتير يعرفوا ان نوع الشعر بس هو اللي بيكون ما بين المجعد بانواعه اوالستريت, لكن الحقيقة ان في خصائص تانية اكتر اهمية هي اللي ممكن تحدد نوع الشعر, يعني ممكن يكون نفس الشعر الكيرلي او نفس فتلة الشعر لكن التعامل معاه يكون بطريقة مختلفة تماما عن شعر تاني وده بيرجع لحاجة مهمة جدا وهي مسامية الشعر, وده اللي هنعرفه النهاردة مع بعض هنقولك بالتفصيل انواع مسامية الشعر وطريقة العناية بيه.

انواع مسامية الشعر وطريقة العناية بيه:

– تعالوا نعرف الاول ايه هي مسامية الشعر:

المسامية بكل بساطة هي قدرة شعرك على امتصاص الرطوبة, وده بيقولك لاي مدى ممكن الرطوبة تخترق شعرك بسهولة, والمسامية بتتحدد من بنية الجزء الداخلي للطبقة الخارجية للشعراية, والشعر المنخفض المسامية بيحتوي على طبقة محكمة بيخلي من الصعب ان الرطوبة تخترقه لكن كمان ليه ميزة انه بيكون صعب التخلص من الرطوبة بسهولة بمجرد ما تدخل الشعراية, من ناحية تانية الشعر العالي المسامية بيحتوي على ثقوب او فتحات بتسمح للرطوبة انها تدخل وتخرج بسهولة.

انواع مسامية الشعر وطريقة العناية بيه
انواع مسامية الشعر وطريقة العناية بيه

– ازاي تعرفي نوع مسامية شعرك:

تقدري تعرفي مسامية شعرك ب 3 اختبارات بسيطة جدا.

1- اختبار المية: خدي خصلة من شعرك بس لازم يكون الشعر نضيف ومغسول لان منتجات الشعر ممكن تغير طبيعته ونتيجة الاختبار تطلع مش مظبوطة, حطي الخصلة في كوباية فيها مية, سيبيها كام دقيقة, لو خصلة الشعر طفت على سطح المية كده يبقى الشعر منخفض المسامية, ولو الخصلة نزلت في الكوباية من تحت يبقى شعرك عالي المسامية, لو الخصلة طفت ووقفت في نص الكوباية يبقى كده الشعر متوسط المسامية.

2- Slip’n Slide Test: الاختبار التاني اللي ممكن تعرفي منه مسامية الشعر, خدي شعراية من شعرك ومرري صوابعك عليها من تحت لفوق, لو حسيتي زي مطبات او ثغرات بين صوابعك كده يبقى شعرك عالي المسامية, ولو الشعراية ناعمة وملساء بين صوابعك كده يبقى شعرك منخفض المسامية.

3- اختبار السبراي: هاتي ازازة ببخاخ حطيها فيها مية, وخدي جزء من الشعر رشيه بالمية, وشوفي الشعر من قريب لو لاحظتي ان نقط المية فضلت على الشعر يبقى شعرك منخفض المسامية, لكن لو لقيتي الشعر امتص المية بسرعة كده يبقى عالي المسامية, لكن لو لقيتي ان المية بتاخد كام دقيقة على ما الشعر يمتصها يبقى الشعر متوسط المسامية.

تقدري تجربي اي طريقة من التلاتة عشان تعرفي بيه نوع مسامية شعرك, ودلوقتي بعد ما عرفتي نوع شعرك هنقولك ازاي تتعاملي مع كل نوع.

انواع مسامية الشعر وطريقة العناية بيه
انواع مسامية الشعر وطريقة العناية بيه

– الشعر منخفض المسامية:

منخفض المسامية يعني معناه ان مقاوم للرطوبة, وده بيكون صعب ترطيبة عشان كده محتاج ترطيب مكثف.

– استخدمي بلسم الشعر بشكل يومي ويكون نوع خالي من البروتين مع كريم تصفيف مرطب للشعر وتكون منتجات بتحتوي على مكونات جاذبة للرطوبة زي العسل والجليسرين, يعني قبل ما تشتري اي منتج بصي على المكونات عشان تجيبي اللي فيه مكونات مناسبة لشعرك.

– استخدمي منتجات غنية بالرطوبة وخفيفة في نفس الوقت عشان الشعر يقدر يمتصها زي زيت الجوجوبا, زيت جوز الهند, زيت الارجان, زيت اللوز الحلو, زيت بذور العنب, او الزيوت المعدنية.

– الافضل استخدام المنتجات السايلة الخفيفة لانها بتساعد على تجنب تراكم المنتج على الشعر.

– اعملي ماسك مرطب او حمام زيت بشكل اسبوعي, وزعي الزيت على فروة الراس ودلكيها في حركات دائرية وغطيه بفوطة سخنة او كيس بلاستيك, او تركزي عليه السيشوار بطريقة غير مباشرة عشان يساعد على امتصاص الزيت, وسيبيه ساعة واغسليه, وممكن تستخدمي السيروم العادي للاستخدام اليومي.

– ابعدي عن ماسكات البروتين زي البيض والمايونيز والزبادي والموز وغيرها من الماسكات التقيلة اللي ممكن تسبب جفاف وتلف الشعر.

– حاولي متعرضيش الشعر للحرارة العالية او الصبغات والمواد الكيمائية اللي ممكن تضره وتحوله لعالي المسامية اللي بيكون اصعب في العناية بيه.

– اغسلي الشعر بمية اقرب للسخنة, والشطفة النهائية تكون بمية باردة عشان تقفلي المسام وتحافظي على لمعانة.

– نوع الشعر ده مش بيتشابك بسهولة, لكن بيميل اكتر انه يبقى هايش وباهت بسبب صعوبة ترطيبه, وبعد غسيله هنلاقيه بياخد وقت على ماينشف ممكن يوم او يومين خصوصا لو الشعر ملموم او مربوط.

انواع مسامية الشعر وطريقة العناية بيه
انواع مسامية الشعر وطريقة العناية بيه

– الشعر متوسط المسامية:

الشعر المتوسط المسامية الطبقة الخارجية او القشرة بتاعته بتكون اكتر مرونة من المنخفض المسامية وبيستقبل الرطوبة والمية بشكل اسهل, وبيسمح بدخول وخروج الرطوبة بشكل معتدل للشعر, والشعر متوسط المسامية تقدري تستخدمي معاه الحرارة والصبغة والمواد الكيمائية ولكن اكيد بشكل معتدل لان ممكن الاستخدام المتكرر او بشكل مستمر للحاجات دي يزود مسامية الشعر مع الوقت, وده اقل نوع شعر محتاج عناية خاصة لانه يعتبر متوازن.

رطبي الشعر بعمق بشكل اسبوعي بمنتجات بتحتوي على البروتين.

انواع مسامية الشعر وطريقة العناية بيه
انواع مسامية الشعر وطريقة العناية بيه

– الشعر عالي المسامية:

الشعر عالي المسامية بيحتوي على ثقوب او ثغرات في القشرة بتاعته وده بيخلي الرطوبة تدخل وتخرج بسرعة من الشعر, وده ممكن يأدي لتجعد وهيشان الشعر بسرعة بسبب الرطوبة, وجفاف الشعر في الجو الجاف, عشان كده لازم تكوني حذره من الانشطة اللي فيها مية زي السباحة لانها ممكن تسبب تكسر الشعر.

– استخدمي المنتجات التقيلة للترطيب وخصوصا لما يكون الشعر مبلول زي زبدة الشيا, زيت جوز الهند, زيت الزيتون, زيت السمسم, زيت بذور الكتان, جل الالوفيرا, زيت الخروع, زيت الجوجوبا, زيت جنين القمح.

– اتجنبي استخدام الحرارة والصبغة والمواد الكيميائية باستمرار.

– اعملي ماسك بروتين طبيعي لشعرك على الاقل مرة في الشهر لو بروتين تقيل, ومرة في الاسبوع لو بروتين خفيف, وماسكات البروتين زي ماسك الجيلاتين, او المايونيز, او البيض.

– يفضل استخدام بلسم الشعر ال Leave in اللي بيتساب على الشعر من غير ما يتغسل عشان تحافظي على رطوبته

– ابعدي عن استخدام المية السخنة اوي في غسل الشعر, الافضل استخدام مية فاترة, ولما تيجي تغسليه من حمام الكريم او البلسم استخدمي مية باردة, لان السخونية هتزود من فتح المسام وهتخلي الرطوبة تخرج بسهولة من شعرك.

– اتجنبي استخدام الشامبوهات القوية لان المواد المنظفة اللي موجودة فيه بتبقى قاسية على الشعر وبتزود تلفه, الافضل تستخدمي انواع الشامبو الخالية من السلفات.

– الشعر العالي المسامية بيتشابك بسهولة, عشان كده الافضل وانتي بتغسليه بعد ما تحطي البلسم مرري صوابعك بين الشعر عشان تفكي التشابك من غير ما يتقطع منك, وهتلاقيه بينشف بسرعة بشكل طبيعي بعد الغسيل خلال ساعتين تلاتة من غير استخدام السيشوار.

انواع مسامية الشعر وطريقة العناية بيه
انواع مسامية الشعر وطريقة العناية بيه

في النهاية لازم نعرف ان مافيش شعر حلو وشعر وحش, كل حاجة بتتوقف على طريقة العناية بيه واننا نستخدم له المنتجات الصح المناسبة ليه, وممكن يكون شخصين عندهم نفس فتلة الشعر ولكن المسامية مختلفة وبالتالي بيحتاجوا استخدام منتجات مختلفة.

ومع ذلك في منتج واحد بس اللي لازم تستخدميه مهما كانت مسامية شعرك, وهي المرطبات العميقة للشعر, العلاج العميق للشعر مهم جدا لكل انواع الشعر, لانه بيوفر العناصر الغذائية اللي محتاجها الشعر عشان ينمو قوي وصحي, ممكن تستخدمي ماسكات الشعر اللي داخل فيها افوكادو بشكل اسبوعي لانها تعتبر مرطب طبيعي عميق للشعر.

الفرق بين الانواع المختلفة للشعر الكيرلي..واعرفي شعرك اي نوع فيهم

انواع الشعر الكيرلي