6 علامات تقولك ان الكراش بتاعك مش مهتم بيكي

بقلمآية حسان فيمنوعات visibility1377

واحدة من أسوأ الحاجات اللي ممكن أى حد يحسها سواء بنت أو ولد -وخصوصا لو بنت- هي ان الطرف اللي انتي معجبه بيه مايبقاش معجب بيكي في المقابل، او انه يبقى الإعجاب متبادل وبعد فترة يبدأ يفقد اهتمامه بيكي وشوية شوية يزهد في علاقتكم ويبدأ يبعد، والحقيقة ان الحالة دي مالهاش سبب معين لكن ممكن يبقى في اكتر من سبب مختلفين و الموضوع بيبقى محير، وده ممكن يتسبب في انك ماتبقيش قادرة تحددي الغلط فين و ماتحسيش بالمشكلة الا لما تحصل وساعتها بيبقى الألم أكبر، وعشان تلحقي نفسك وتاخدي بالك من الأول في المقال ده بنات حوا هيقولولك على 6 علامات تقولك ان الكراش بتاعك مش مهتم بيكي .. 

6 علامات تقولك ان الكراش بتاعك مش مهتم بيكي 

1- المحاولات بقت من طرف واحد:

لو بدأتى تحسي ان انتي بس اللى بتتصلي و تسألى عنه وتقلقي عليه وانه المحاولات كلها للتواصل بقت من طرف واحد ده معناه انه بدأ يبقى مش مهتم بيكي ولا بعلاقتكم خلاص، الحالة الوحيدة اللي ممكن ماتقلقيش انه ده يحصل لو كان هو بطبيعته خجول ومابيسألش وانتى دايما اللي بتاخدي الخطوة دى، لكن لو ده مش العادي من الأساس يبقى دي اشارة مهمة لازم تاخدي بالك منها.

المحاولات بقت من طرف واحد

2- كلامكم اتغير :

دايما كنتى بتحسي انه علاقتكم قايمة على المحادثات الطويلة و العميقة اللي بتطلعوا منها عارفين بعض أكتر و بتكتشفوا منها حاجات جديدة في شخصية وعقل بعض و فجأة حسيتى ان ده بيتغير وانه كلامكم مابقاش زي الأول؟ يبقى دي علامة خطر بتقولك انه الكراش بدأ يفقد اهتمامه في شخصيتك ولاحظى المواضيع اللي بتتكلموا فيها، لو حسيتى انه بدأ يغير المواضيع ويبعدها عن اي حاجة شخصية يبقى دي علامة مهمة جدا انه بدأ يفقد اهتمامه فيكي. 

كلامكم اتغير

3- اهتمامه مش ليكي لوحدك:

لو كنتي متعوده انه وهو قاعد معاك مابيشغلش باله بحد ولا بحاجة ومابيمسكش تليفونه و اهتمامه كله ليكي لوحدك انتى وبس وده بدأ يتغير و بقى وهو قاعد معاكي يمسك موبايله او يبص على الماتش أو يكلم أصحابه او بقى من الواضح انك بتتكلمى وهو مش مركز معاكي ولا سامعك كويس يبقى هو بدأ يفقد اهتمامه بمواضيعك وتفاصيل حياتك ودى علامة مش مبشرة. 

4- بيعبر عن اعجابه ببنات تانية قدامك:

طبعا دي علامة مش كويسة، حتي لو كنتي فى ارتباط ممكن تتفهمي انه ممكن عينيه تلمح واحدة غيرك غصب عنه لكن لو لاحظتى انه بيبص على بنات تانيين قدامك وبيركز في كل واحدة تعدي قدامه ده بيبقى تعبير واضح عن قلة اهتمامه ويمكن كمان قلة احترامه ليكي ودي أكيد علامة مش كويسة. 

بيعبر عن اعجابه ببنات تانية قدامك

5- بيخلف وعوده معاكي:

بدأتى تحسي كمان انه بقى يخلف وعوده وترتيباته معاكي وحتى المواعد اللي بترتبوها عشان تتقابلوا وتخرجوا سوا اتحولت لمكان انتي قاعدة فيه ومستنياه وخلاص! وحتى مابقاش يفتكر ميعاده معاكي الا على آخر دقيقة فيتصل يعتذر وانتى لابسة ومتشيكة ومستنياه، الحركات من النوع ده معناه انه علاقتكم او اعجابكم بقى فى خطر كبير وانه مابقاش بيهتم حتى يفتكر مواعيدكم. 

بيخلف وعوده معاكي

6- لغة الجسد وهو بيتكلم معاكي اتغيرت: 

دايما خدي بالك من لغة الجسد وهو قاعد معاكي، لأن لغة الجسد بتقدر تقول حاجات كتيرة الكلام مابيقولهاش، لو لاحظتى انه بيبعد بالكرسي بتاعه وانتوا قاعدين او انه مابقاش يبصلك وهو بيتكلم و بيبدأ يحرك رقبته كتير دى كلها علا مات بتدل على الزهق والملل وده طبعا معناه انه مش مبسوط بقعدتكم مع بعض و عايزها تنتهي في أسرع وقت. 

اعرفى معانا كمان 7 طرق عشان تتوقفي عن حب شخص مش بيبادلك نفس الشعور