11 وصفة لعمل الشامبو بمكونات طبيعية

بقلمريهام محمود فيشعر visibility1855

كلنا عارفين ان كتير من انواع الشامبو اللي موجودة في السوق فيها مواد كيميائية بتضر الشعر وبتسبب جفافة, عشان كده النهاردة هنقولكم على وصفات لعمل الشامبو بمكونات طبيعية 100% موجودة في البيت وتقدري تعمليها بكل سهولة, ومع الاستخدام هتلاحظي الفرق على شعرك انه بقى صحي اكتر وكثيف وبيلمع وبينمو بشكل اكبر.

وصفات لعمل الشامبو بمكونات طبيعية:

– شامبو البيض:

البيض غني جدا بالفيتامينات والمعادن والبروتينات وغيرها من المكونات المفيدة جدا للشعر وبتساعد انها تخليه صحي اكتر وطري وبيلمع, وهنقولكم اكتر من طريقة تعملوا بيها شامبو البيض.

1- الطريقة الاولى:

هاتي طبق واضربي من 2 – 3 بيضات حسب طول وكثافة شعرك, واغسلي بيه الشعر بالطريقة العادية زي ما بتغسلي شعرك بالشامبو, بعدها اشطفيه بالمية واستخدمي البلسم عشان تتخلصي من ريحة البيض, وممكن تعملي خليط لشطف الشعر عشان تديكي نتيجة احسن للشعر وكمان عشان تضيع ريحة البيض نهائي, اخلطي معلقتين كبار خل او عصير ليمون مع لتر مية و3 نقط من اي نوع زيت عطري تفضليه, وبعد ما تغسلي شعرك بالبيض اشطفيه الشطفة الاخيرة بالخليط ده.

2- الطريقة التانية:

هاتي 3 صفار بيض واخلطي معاه 3 معالق كبيرة عسل نحل, بعدها بلي شعرك بالمية وحطي عليه الخليط ودلكيه في فروة الراس وعلى الشعر كله والاطراف, وبعدها اشطفيه بالمية وممكن تستخدمي بلسم او تكتفي بس بالخليط ده بعد ما تشطفيه كويس بالمية كويس.

3- الطريقة التالتة:

الشامبو ده مناسب جدا للشعر الدهني, اخلطي 2 بيضة مع مع معلقتين خل ابيض و3 نقط عصير ليمون, واغسلي شعرك بالخليط, وبعدها اشطفيه كويس بالمية الدافية وبعدها بالمية الباردة.

4- الطريقة الرابعة:

الخليط ده مناسب للشعر الجاف, اخلطي من 2 – 3 صفار بيض مع شوية مية دافية ومعاهم 3 نقط او اكتر من زيت الزيتون, اغسلي شعرك بالخليط, وبعدها اشطفيه بالمية, وهتلاحظي الفرق الكبير على شعرك من اول استخدام, وممكن تستخدمي بعدها بلسم, او خليط الخل والمية اللي قولناه في الطريقة الاولى.

5- الطريقة الخامسة:

اخلطي 2 بيضة مع 2 معلقة كبيرة عصير ليمون, و 1 معلقة كبيرة عسل نحل, و 3 نقط زيت زيتون, دلكي الشامبوعلى فروة الراس والشعر كله, وبعدها اشطفيه بمية فاترة, والشامبو ده مناسب لكل انواع الشعر مغذي جدا ومرطب.

وصفات لعمل الشامبو بمكونات طبيعية
وصفات لعمل الشامبو بمكونات طبيعية

– شامبو البيكنج صودا “الكربوناتو”:

صودا الخبز كمان من المكونات المفيدة جدا للشعر اللي بتخليه صحي وبيلمع, وبتنضفه من الزيوت الزيادة والاتربة, لكن ننصح انك تستخدميه مرة او مرتين بس في الشهر بالكتير لان اكتر من كده مش هيكون مفيد, كمان هنقولكم على اكتر من طريقة ليه.

1- الطريقة الاولى:

اخلطي 1 معلقة كبيرة من صودا الخبز مع 3 صفار بيض, واغسلي شعرك بالخليط بطريقة الشامبو العادية مع التدليك, بعدها اشطفيه بالمية وممكن تستخدمي بعده بلسم.

2- الطريقة التانية:

اخلطي معلقة كبيرة من صودا الخبز مع شوية مية بحيث الخليط يكون زي العجينة مش سميك اوي ولا سايل, دلكي فروة الراس بالخليط, وبعدها اشطفيه بالمية.

3- الطريقة التالتة:

اهرسي شريحة افوكادو في الخلاط, وبعدها ضيفي لها معلقة كبيرة من صودا الخبز وشوية صغيرين مية, واغسلي شعرك بالخليط, وبعدها اشطفيه بالمية.

4- الطريقة الرابعة:

اخلطي 1 معلقة كبيرة من صودا الخبز مع 1 بيضة و1 معلقة كبيرة عصير ليمون و 1 معلقة كبيرة خل وشوية مية, اغسلي شعرك بالخليط, وبعدها اشطفيه بالمية.

وصفات لعمل الشامبو بمكونات طبيعية
وصفات لعمل الشامبو بمكونات طبيعية

– الشامبو الجاف:

الشامبو الجاف طريقة مثالية جدا لو محتاجة تغسلي شعرك وفي نفس الوقت معندكيش وقت تغسليه بالمية, الشامبو الجاف هيساعد على تنضيف الشعر بشكل فوري وسريع, كل اللي هتعمليه هاتي نشا ذرة ووزعيها على فروة الراس ودلكيها كويس, وبعدين بفرشة سرحي شعرك عشان توزعي النشا على الشعر كله, دي تعتبر طريقة سهلة وسريعة لتنضيف الشعر من غير غسله بالمية.

وصفات لعمل الشامبو بمكونات طبيعية
وصفات لعمل الشامبو بمكونات طبيعية

– شامبو الجيلاتين:

اول حاجة حضري الجيلاتين, اخلطي معلقة كبيرة من الجيلاتين البودر مع شوية مية وسيبيه لمدة 30 دقيقة, بعد ال 30 دقيقة سخني خليط الجيلاتين على حمام مية سخنة, لحد ما الجيلاتين يدوب خالص في المية, سيبيه يبرد شوية وضيفي له صفار بيضة, اخلطيهم مع بعض كويس, وبعدها اغسلي شعرك بالخليط, وممكن تسيبيه على الشعر لمدة 10 دقايق لنتايج افضل وبعدها اطشفي الشعر بالمية, والشامبو ده مناسب جدا للشعر العادي والدهني.

وصفات لعمل الشامبو بمكونات طبيعية
وصفات لعمل الشامبو بمكونات طبيعية

وصفات طبيعية للتخلص من هيشان وتجعد الشعر

وصفات طبيعية لعلاج هيشان الشعر
وصفات طبيعية لعلاج هيشان الشعر