طرق للتخلص من مشاكل البشرة الدهنية بمكونات طبيعية
البشرة الدهنية من اكتر انواع البشرة اللي بتتعرض لحب الشباب ومشاكل الجلد بشكل عام عشان كده بتحتاج عناية بشكل يومي اكتر من اي بشرة تانية, والنهاردة من خلال موضوعنا هنقولك طرق للتخلص من مشاكل البشرة الدهنية بمكونات طبيعية موجودة في البيت.
طرق للتخلص من مشاكل البشرة الدهنية:
1- الفاكهة والعصاير:
الفاكهة بتحتوي على احماض طبيعية بتساعد على تنضيف البشرة الدهنية, ممكن تعملي خليط عصير فواكة لنضارة وتفتيح البشرة عبارة عن كميات متساوية من عصير التفاح والليمون, ادهني بيه البشرة وسيبيه لمدة من 10 – 15 دقيقة وبعدين اغسليه بالمية, ممكن كمان تستخدمي خليط من عصير الليمون والخيار بكميات متساوية, وادهني البشرة وسيبيه لمدة 15 دقيقة, وبعدين اغسلي بشرتك بمية باردة عشان تقفلي المسام.
ممكن كمان تعملي حيلة سهلة وبسيطة جدا, هاتي عصير برتقان وحطيه في قوالب التلج وسيبيه لما يتجمد, ومرريه على البشرة, بيساعد على تنضيف البشرة وازالة الزيوت الزيادة, وممكن تستخدمي اي نوع من انواع الفواكة الحمضية على البشرة مفيدة جدا للتفتيح والتقشير.
2- الاوراق والزهور العطرية:
الاوراق والزهور العطرية مفيدة جدا للبشرة الدهنية, ممكن تجيبي اوراق النيم تغليها وتصفيها, وتحفظيها في ازازة وتستخدميها كتونر للبشرة.
عشان تقللي من الزيوت الزيادة على البشرة, ممكن تخلطي مستخلص النعناع او زيت النعناع مع مية ورد وتضيفي عليهم دقيق ارز “ارز مطحون”, لحد ما يبقى الخليط عجينة سهلة الفرد على البشرة, حطي الماسك على بشرتك ودلكيه في حركات دائرية بالراحة وبعدين سيبيه 10 دقايق واغسليه بالمية.
ولما تخرجي ممكن تعملي تونيك طبيعي تخليه في شنطتك عبارة عن مية ورد وعليهم كام نقطة من زيت اللافندر, حطي منه على ويبس وامسحي بيه بشرتك عشان تتخلصي من الاتربة والزيوت اللي على البشرة.
3- ماسك اسبوعي للبشرة:
ده ماسك للبشرة تستخدميه مرة في الاسبوع عبارة عن طين مع شوية صغيرين كركم وضيفي عليهم مية جوز هند لحد ما تتكون عندك عجينة, افرديها على البشرة وسيبيها لمدة من 10 – 15 دقيقة, وبعدها اغسليه بالمية.
اخلطي خشب الصندل بودر مع بابايا مهروسة, وحطيه على البشرة وسيبيه 15 دقيقة وبعدين اغسليه بالمية, كررية مرة في الاسبوع بيساعد على تقليل الزيوت الزيادة في البشرة.
ممكن تشوفي من هنا 5 ماسكات طبيعية لجمال ونضارة بشرتك.
4- نصايح ومكونات طبيعية للبشرة الدهنية:
– في كتير من المكونات الطبيعية المفيدة جدا في علاج مشاكل البشرة الدهنية بتساعد على تنضيفها وازالة الزيوت الزيادة منها وواحدة من المكونات دي بياض البيض, ادهنيه على بشرتك وسيبيه لحد ما ينشف خالص وبعدين افركي الماسك من على البشرة بدقيق الحمص في حركات دائرية وبعدها اغسليه بالمية.
– الطماطم كمان تعتبر قابض طبيعي للبشرة, اغمسي قطنة في عصير الطماطم وادهني بشرتك وسيبيها لما تنشف واغسليها بالمية.
– جنب المكونات الطبيعية, مهم انك تعتمدي على عادات وروتين يومي لبشرتك لان حتى الحاجات البسيطة بتفرق جدا في صحة البشرة, يعني متنسيش تنضيف البشرة كل يوم بالليل قبل النوم عشان تزيلي المكياج والاتربة والزيوت الزيادة, ده بيساعد جدا على الحفاظ على صحة البشرة الدهنية.
– في نظامك الغذائي اتجنبي الاكل المقلي والسبايسي واللي في بهارات كتير عشان تقدري تتحكمي في زيوت البشرة وتقلليها وتحققي التوازن بين الغدد الدهنية, كلي الاكلات الغنية بالالياف, وضيفي السلطات لنظامك الغذائي, زودي كمية الحمضيات زي الليمون والبرتقان, والاكلات الصحية الغنية بفيتامين C بشكل يومي.
– متستخدميش الصابون اللي بيحتوي على الجليسرين, استخدمي سكراب للبشرة مرة في الاسبوع لانه مهم جدا لتطهير وتنضيف البشرة الدهنية بيساعد على ازالة خلايا الجلد الميت واثار المكياج والاتربة, وبينضف المسام وهيخلصك كمان من الرؤوس السودا.
– ابعدي عن التوتر والضغط لانه بيزود افراز زيوت البشرة, ممكن تجربي تمارسي التأمل واليوجا هيساعدك تبقي ريلاكس وتتخلصي من التوتر.
اسرار العناية اليومية بالبشرة الدهنية
