اتعلمي خطوة بخطوة مكياج رائع مناسب للجامعة
كل مكان وكل وقت بيبقى ليه المكياج المناسب ليه, ومن الحاجات اللي بتحير بنات كتير هي مكياج الجامعة لانه المفروض ميبقاش اوفر او مبالغ فيه وفي نفس الوقت عايزينه يداري العيوب ويبقى شكله حلو, عشان كده النهاردة هنساعد بنات حوا في المهمة دي وهنعلمك بالخطوات مكياج مناسب للجامعة.
مكياج مناسب للجامعة:
– الحاجات اللي هتحتاجيها:
– بودرة.
– كريم اساس / او BB كريم.
– قلم كحل.
– بلاشر “الروجاجو او احمر خدود”.
– روج.
– ماسكارا.
– فرش.
– الخطوات:
1- الخطوة الاولى:
كمية قليلة من المكياج هي المفتاح للوك طبيعي, اول حاجة هتعمليها حطي كمية بسيطة من البودرة المضغوطة على الوش كله عشان تمنعي اللمعان, ولو عندك وقت زيادة ممكن تحطي كريم BB او مرطب ملون فوق البودرة.
2- الخطوة التانية:
بمجرد ما تخلصي اول خطوة, حطي لمسة بلاشر بالفرشة على الخدين, والافضل تستخدمي الالوان الفاتحة زي الوردي او المرجاني, الخطوة دي هتدي حياة للمكياج وهتنور وشك.
3- الخطوة التالتة:
هنيجي دلوقتي لرسمة الحواجب ابدأي بالقلم املي فراغات الحواجب, وحاولي انك تحافظي على شكله طبيعي بقدر الامكان, وفي الاخر امزجيه بالفرشة مع شعر الحواجب عشان يبان طبيعي.
4- الخطوة الرابعة:
هنرسم العين باستخدام قلم الكحل هي في اللوك هنا استخدمت قلم بني غامق, طبعا كل واحدة حسب اختيارها بس البني هيبقى شكله انعم على العين, ارسمي خط بالكحل فوق خط الرموش وعلى تنية الجفن وبعدين ادمجيه بالفرشة على الجفن كله, الطريقة دي هتدي لوك طبيعي وانعم اكتر للعين.
5- الخطوة الخامسة:
استخدمي ايشادو بلون بني فاتح مات وادمجيه فوق العين مع الكحل بالفرشة, والافضل انك تتجنبي الايشادو اللي فيه لمعة لانه هيكون مش مناسب ومبالغ فيه بالنسبة لمكياج الجامعة.
6- الخطوة السادسة:
استخدمي قلم كحل باللون اللي تفضلية وارسمي بيه على خط الرموش اللي تحت, وهي هنا في اللوك ده استخدمت قلم ابيض على خط الرموش اللي تحت عشان تدي وسع اكتر للعين, وممكن تحطي منه في الزاوية الداخلية للعين.
7- الخطوة السابعة:
بمجرد ما تخلصي مكياج العين بتاعك, حطي طبقتين ماسكارا على الرموش اللي فوق واللي تحت عشان تظهر شكل العين وتبرزهم.
الخطوة التامنة:
عشان تنهي اللوك, حطي روج باللون المفضل ليكي, وممكن تستخدمي ليب جلوس او زبدة كاكاو بس بدل الروج عشان تحافظي على لوك المكياج الطبيعي, هي في اللوك ده استخدمت درجتين من البينك ودمجتهم مع بعض على الشفايف.
الشكل النهائي للوك:
اللوك سهل جدا وبسيط والميزة فيه انك هتقدري تخلصيه في دقايق من غير ما ياخد منك وقت كتير الصبح.
طبعا في السن ده هي فترة المراهقة والبشرة بتكون حساسة وبتتأثر بسرعة وممكن يظهر فيها حب الشباب, عشان كده مهم انك تعتمدي نظام عناية يومي لبشرتك عشان تمنعي حب الشباب, استخدمي الغسول المناسب لبشرتك مرتين في اليوم ولو بشرتك دهنية ممكن تستخدمي تونر بعد الغسول, وبعده المرطب المناسب لبشرتك, واتأكدي من ازالة المكياج قبل النوم كل يوم.
نصايح جمالية هتوفرلك في الوقت وتخليكي تطلعي بلوك حلو
