10 تصاميم مانيكير فواكة مناسبين للصيف
كل موسم بيكون ليه التصاميم والالوان المناسبة ليه, والصيف بيحتاج تصاميم والوان زاهية اكتر تمشي مع جو البحر والانطلاق, والنهاردة هنشوف مع بعض مجموعة تصاميم مانيكير فواكة مناسبة لموسم الصيف تقدري تستوحي منهم افكار تنفذيها وتخلي ضوافرك شكلهم حلو ومميز.
تصاميم مانيكير فواكة:
1- رسمة البطيخ:
لو هنفكر في الصيف اول فاكهى هتيجي في بالنا هي البطيخ من التصاميم المناسبة جدا اللي بتعبر عن جو الصيف, وتقدري ترسميه باكتر من طريقة, ممكن تخلي اللون الاساسي بطيخي وتحددي اطراف الضوافر بالاخضر, وتعملي البذور باللون الاسود نقط على كل الضوفر او على الطرف بس, وممكن تخلي ضوفر او اتنين بالاخضر بس, زي ما هو باين قدامنا في الصور, يعني تقدري تختاري اي تصميم تحبيه اكتر, او تاخدي فكرة منهم وانتي تغيري فيها زي ما انتي عايزة.
2- رسمة الافوكادو:
ممكن تجربي كمان رسمة الافوكادو, ممكن تخلي اللون الاساسي ابيض وترمي فوقيه الافوكادو باستخدام درجات اللون الاخضر, او تستخدمي طريقة الاومبري على الضوافر كلها بدرجات الاخضر, وضوفر واحد ترسمي عليه واحدة افوكادو.
3- رسمة الاناناس:
رسمة الاناناس هيكون فيها اللونين الاساسين هما الاصفر والاخضر, وممكن تعملي تغيير وتستخدمي لون اساسي مختلف غير الاصفر زي الاخضر النعناعي او الموف, وممكن ترسمي الاناناسة على الضوافر كلها او تكتفي بواحد او اتنين بس.
4- رسمة الفراولة:
الفراولة هنستخدم فيها اللون الاحمر كلون اساسي, ونعمل جزء بسيط باللون الاخضر ممكن على طرف الضوافر او على الضوفر من تحت, والنقط ممكن نعملها ابيض او اسود او اصفر.
5- رسمة الكيوي:
الكيوي ممكن نستخدم الابيض كلون اساسي, والاخضر يبقى على اطراف الضوافر من كل الاتجاهات وفي النص نعمل البذور نقط باللون الاسود, وممكن نستخدم اللون الاخضر كلون اساسي والابيض نرسمة نص دايرة على اطراف نص الضوافر بس وحوالين اللون الابيض نقط بالاسود.
6- رسمة الليمون:
رسمة الليمون هنستخدم فيها الاصفر والابيض والاخضر, تقدري بقى تبدلي بينهم ممكن يبقى اللون الاساسي الابيض وترسمي بالاصفر والاخضر, او يبقى اللون الاساسي الاصفر وترسمي فوقيه بالابيض والاخضر.
7- رسمة الموز:
رسمة الموز اللونين اللي هتستخدميهم هما الاصفر والاسود لرسمة الموزة, وبالنسبة للون الاساسي اللي على الضوفر كله قدامك الاختيار واسع ممكن تعمليه ابيض, لبني, بينك, ازرق, اخضر فاتح.
8- رسمة الكريز:
هنستخدم فيها الابيض والاحمر والاخضر, ممكن تعملي الاساس احمر وتعملي عليه نقط بالابيض, وتختاري ضوفر او اتنين او كتر حسب ما تحبي وتعملي الاساس بتاعه باللون الابيض وترسمي عليه الكريز بالاحمر والاخضر.
9- رسمة التفاح:
كمان هنستخدم فيها الاحمر والابيض والاخضر, ممكن تحطي مقوي اظافر بس وترسمي التفاحة بالاحمر وتحدديها بالاسود وترسمي الفرع بالاخضر, او تخلي اللون الاساسي الابيض وترسمي التفاح على الضوافر كلها بالاحمر والاخضر, وممكن تستخدمي اللون الاساسي يكون باللون النيود.
10- رسمة البرتقان:
هنستخدم هنا اللون الاورانج والابيض, ممكن تخلي اللون الاساسي على الضوافر كلها اورانج ماعدا ضوفر واحد تعمليه بالابيض وترسمي عليه شكل البرتقانة, او العكس تخليهم كلهم بالابيض وترسمي باللون الاورانج.