اكتر 6 سلوكيات جذابة وازاي تكتسبيهم في شخصيتك

لما يكون عندك ثقة في نفسك ده بيخليكي شخصية جذابة للي حواليكي وهيخليهم يحبوا انهم يقضوا وقت معاكي, والثقة في النفس لازم تكون نابعة من جواكي, والجاذبية بتعتمد كمان على سلوكياتنا وتصرفاتنا مع الاشخاص اللي حوالينا بشكل يومي, وفي النهاية الانسان بيتكون من مجموعة مميزات وعيوب, لكن في تصرفات ممكن نعملها تخلينا اشخاص جذابين اكتر للي حوالينا سواء للست او للراجل, وده اللي هنعرفه النهاردة مع بعض من خلال موضوعنا هنقولك اكتر سلوكيات جذابة وازاي تكتسبيهم في شخصيتك, وكمان ده هيساعدك تبقي انسانة ايجابية وسعيدة اكتر.

اكتر سلوكيات جذابة:

1- خليكي مستمعة جيدة:

اللي حواليكي لازم يحسوا انك بتقدري تسمعيهم وتفهميهم, وكونك انك تبقي مستمعة جيدة دي واحدة من الصفات الاكتر الجاذبية اللي ممكن تكون عند اي شخص, لان الصفة دي هتضمن انك تتواصلي بشكل جيد جدا مع اللي حواليكي و هتحسس الشخص اللي قدامك انك بتسمعيه وبتفهميه كويس, وده هيقوي العلاقة بينك وبين الطرف التاني.

2- خليكي لطيفة:

من اكتر الصفات اللي ممكن تجذب اللي حواليكي ناحيتك بكل سهولة هي انك تكوني لطيفة في تصرفاتك, هتخليكي اللي حواليكي يحسوا بمشاعر ايجابية وحب وتقدير ناحيتك, لان الناس عموما بتنجذب للاشخاص اللي معندهمش انانية في تصرفاتهم, وانتي نفسك لما تكوني بتتعاملي بلطف وبتحبي تساعدي كل اللي حواليكي هتحسي بشعور ايجابي وده هيخلي الناس تنجذب لمدارك.

3- الابتسامة:

ابسط حاجة ممكن تعمليها هي الابتسامة, وثبت انها بتخليكي انتي شخصيا تحسي بشعور احسن حتى لو بتمري بيوم صعب, الابتسامة هي واحدة من الحاجات الاساسية والسهل اللي اي شخص ممكن يعملها عشان تخليكي جذاب اكتر للي حوالية.

الابتسامة بتزود من مستويات هرمون الاندروفين “هرمون السعادة” وده هيحسن مزاجك وهيخليكي تحسي بمشاعر ايجابية, وبالتالي ده هيخليكي تبتسمي اكتر, ولما اللي حواليكي يشوفوكي مبتسمة دايما هيحسوا بالايجابية من ناحيتك ودايما هيبقى في ترابط عندهم بينك وبين المشاعر السعيدة.

4- الضحك:

مع الابتسامة الضحك كمان هيساعد ان اللي حواليكي ينجذبوا ليكي اكتر, والضحك زي الابتسامة بيساعد على زيادة هرمون الاندروفين, وكمان هو حاجة صحية لصحتك الجسدية والعاطفية.

الضحك كمان هيقلل من مستويات التوتر والضغط وبالتالي ده هيحسن مزاجك, وعادة الناس بينجذبوا للشخص اللي على طول بيضحك وبيتجنبوا الشخص اللي دايما مكشر, لان هيخليهم بيضحكوا وهيحسسهم بمشاعر ايجابية, واكيد الناس هتحب دايما تبقى حوالين الشخص الايجابي اللي دايما بيضحك وسعيد لان ده هينعكس عليهم هما كمان.

5- الثقة:

زي ما بيقولوا كده الثقة هي المفتاح, لما تكوني واثقة من نفسك ده هيخلي اللي حواليكي ينجذبوا ليكي على طول, والثقة هتخليكي انتي حاسه باحساس حلو وايجابي اتجاه نفسك, ثقتك ومظهرك وقدراتك هتخلي الناس تنجذب ناحيتك, لكن لو دايما بتحسي بالخجل او الكره الذاتي هتلاقي اللي حواليكي بيبعدوا عنك.

ومن ناحية تانية كمان انتي لما هتحسي بالثقة في نفسك ده هينعكس على اللي حواليكي وهتخليهم هما كمان يحسسوا بثقة ورضا عن نفسهم, لانك هتبقى زي تشجيع بالنسبة لهم او نموذج عايزين يبقوا زيه.

6- فهم اللي حواليكي من غير كلام:

انك تكوني مستمعة جيدة اكيد دي صفة جذب للي حواليكي زي ما قولنا, لكن بالنسبة للحاجات اللي الناس مش بيقدروا يقولوها ! قدرتك على قراءة لغة الجسد للشخص اللي قدامك هتخليكي مستمع افضل, بالاضافة انك هتبيني لهم قدرتك انك قادرة تفهميهم وحاسة بمشاعرهم حتى من غير ما يقولوا.

ولما تكوني فاهمة كويس لغة الاشارات والجسد هتقدري تديهم اللي هما عايزينه من غير ما يطلبوه, وده اكيد هيقوي العلاقة بينك وبين الاشخاص اللي حواليكي وهيخليها علاقات صحية وممكن تستمر فترة طويلة جدا.

– ازاي تكتسبي الصفات دي ؟

الموضوع بسيط ومش صعب بس هتقعدي مع نفسك وتراجعي تصرفاتك وسلوكياتك مع الناس وتقيمي نفسك, وتحاولي تحسنيها وتغيريها للصفات اللي تخليكي انسانة جذابة اكتر, وبمجرد ما تبدأي تغيري سلوكياتك وتصرفاتك للصفات الجاذبة اللي احنا قولناها هتلاقي نفسك بقيتي اكتر تفاؤل وايجابية ونظرتك للحياة اختلفت واتغيرت كتير, وده كله اكيد هيجي مع الوقت وانك تمرني نفسك على السلوكيات دي.

5 عادات بتسبب الاكتئاب وبتقلل من احترامك وثقتك بنفسك