وصفات طبيعية للتخلص من هيشان وتجعد الشعر

بقلمريهام محمود فيشعر visibility6519

مشكلة هيشان وتجعد الشعر كتير من البنات بيعانوا منها, والشعر في الحالة دي بيكون صعب التعامل معاه, وبيكون السبب الرئيسي في المشكلة دي هو عدم وجود رطوبة في الشعر وبالتالي انتي هتبقي محتاجة ترطيب للشعر عشان تتخلصي من الهيشان والتجعد, والنهاردة هنقولك على وصفات طبيعية لعلاج هيشان الشعر والتجعد والجفاف.

في عوامل كتير ممكن تكون سبب في مشكلة الهيشان والتجعد منها الرطوبة العالية عشان كده هنلاقي دايما ان المشكلة دي بتزيد في الصيف بشكل خاص بسبب رطوبة الجو, كمان استخدام السيشوار بشكل مستمر من اسباب الهيشان والتجعد, مية البسين لان بيكون فيها كلور بينشف الشعر, بعض منتجات العناية بالشعر اللي بتحتوي على مواد كيميائية, استخدام منتجات مش مناسبة لنوع شعرك, كل دي اسباب ممكن تأدي للهيشان والتجعد.

وصفات طبيعية لعلاج هيشان الشعر:

1- سبراي اللافندر والالوفيرا:

جل الالوفيرا بيساعد على ترطيب الشعر وتنعيمه, وزيت اللافندر بيضيف لمعان الشعر وبيخلي شكله صحي وبيساعد على تقليل الهيشان وتجعد وتشابك الشعر.

المكونات:

1 كوباية مية مفلترة.

3 معالق كبيرة جل صبار الالوفيرا.

10 نقط زيت اللافندر.

الطريقة:

هاتي ازازة ببخاخ, اخلطي فيها المية وجل الصبار وزيت اللافندر, اقفليها ورجي الازازة كويس عشان تخلطي المكونات, وكده يبقى الاسبراي جاهز يترش منه على الشعر بعد ما تغسليه وتنشفيه بالفوطة, ورجي الخليط كل مرة قبل كل استخدام.

وصفات طبيعية لعلاج هيشان الشعر
وصفات طبيعية لعلاج هيشان الشعر

2- المية المكربنة “المياة الغازية”:

المياة الغازية اللي هي “مشروبات الصودا, مية الصودا, والمية الفوارة”, تعتبر واحدة من افضل الاختيارات لعلاج هيشان وتجعد الشعر, لان بيكون فيها مستويات حموضة منخفضة بتساعد على علاج الهيشان والتجعد اللي بيكون نتيجة الرطوبة.

بكل بساطة اشطفي شعرك بالمياة الغازية بعد كل مرة تغسلي فيها شعرك بالشامبو بالطريقة العادية, هيساعد جدا على علاج الهيشان والتجعد.

وصفات طبيعية لعلاج هيشان الشعر
وصفات طبيعية لعلاج هيشان الشعر

3- خل التفاح:

خل التفاح كمان من المكونات اللي بتمنع الهيشان والتجعد, لان الحامض اللي موجود في الخل بيقلل من التجاعيد, وبيدي حياة ولمعة للشعر الباهت.

اخلطي كميات متساوية من خل التفاح والمية, واستخدميه كشطفة نهائية للشعر بعد غسله بالشامبو, وممكن تستخدمي الطريقة دي كل اسبوعين او 4 اسابيع.

وممكن تعمليه بطريقة تانية تاخدي من الخليط بقطنة وتدلكي بيها فروة الراس, وبعدين تسرحي شعرك بالمشط عشان توزعيه على الشعر كله, سيبيه من 10 – 15 دقيقة وبعدها اشطفيه بالمية كويس, كرريه مرة في الاسبوع.

وصفات طبيعية لعلاج هيشان الشعر
وصفات طبيعية لعلاج هيشان الشعر

4- الافوكادو:

الافوكادو تعتبر علاج فعال جدا للهيشان والتجعد, لانها غنية جدا بفيتامين E اللي بيساعد على ترطيب الشعر, كمان الافوكادو بيحتوي على الاحماض الدهنية اللي بتساعد على تنعيم الشعر المجعد والهايش.

اهرسي ثمرة افوكادو وضيفي لها شوية زيت زيتون قلبيهم مع بعض كويس, بعد ما تغسلي شعرك بالشامبو حطي عليه كله ماسك الافوكادو, سيبيه لمدة من 30 دقيقة لساعة, وبعدها اغسليه بمية باردة, وممكن تغسليه بالبلسم بس عشان تضيعي ريحة الافوكادو من الشعر.

ممكن كمان تهرسي الافوكادو وتضيفي له لبن رايب او مايونيز لحد ما تتكون عندك عجينة ناعمة, واعمليه كماسك بعد غسل الشعر زي الطريقة اللي فاتت, كررية من مرة لمرتين في الاسبوع.

وصفات طبيعية لعلاج هيشان الشعر
وصفات طبيعية لعلاج هيشان الشعر

5- الموز:

الموز يعتبر مرطب طبيعي للشعر لانه غني بالزيوت الطبيعية والبوتاسيوم والكربوهيدرات والفيتامينات, وكل المكونات دي بتساعد على ترطيب الشعر وبتديه لمعه, وبتساعد كمان على منع واصلاح اطراف الشعر المقصفة.

اهرسي موزة بالشوكة ناعم جدا بحيث انه ميكونش فيها اي كتل, ضيفي لها كوباية زبادي, و 2 معلقة كبيرة عسل نحل, و 2 معلقة كبيرة زيت زيتون قلبيهم مع بعض, حطي الماسك على شعرك, وغطيه بكيس بلاستيك وسيبيه من 30 دقيقة لساعة, بعدها اغسلي شعرك بالشامبو بالطريقة العادية, كرريه مرة واحدة في الاسبوع.

وصفات طبيعية لعلاج هيشان الشعر
وصفات طبيعية لعلاج هيشان الشعر

6- لبن جوز الهند:

لبن جوز الهند يعتبر بروتين طبيعي خفيف على الشعر ومعالج ومرطب للشعر الهايش والمجعد.

حطي 2 معلقة كبيرة من لبن جوز الهند في طبق على النار ودفيه بس, وخلي بالك انه ميسخنش منك اوي او يتحرق يبقى يادوب دافي, حطي لبن جوز الهند الدافي على شعرك, وغطيه بفوطة, وسيبيه من بالليل للصبح اغسليه بالشامبو, وسيبي شعرك ينشف بشكل طبيعي, كرريه مرتين في الاسبوع.

وصفات طبيعية لعلاج هيشان الشعر
وصفات طبيعية لعلاج هيشان الشعر

7- زيت الزيتون:

يعتبر الزيت من اهم العناصر للشعر الهايش المجعد اللي محتاج رطوبة اضافية, ويعتبر زيت الزيتون من افضل الاختيارات اللي بتساعد على ترطيب الشعر.

دفي كوباية زيت زيتون على النار, حطي الزيت على الشعر كله وزعيه بالتساوي من الجذور للاطراف, بعدها غطيه بكيس بلاستيك وفوقيه فوطة سخنة, سيبيه لمدة 30 دقيقة, بعدها اغسلي شعرك بالشامبو واشطفيه بمية باردة, كرريه 3 مرات في الاسبوع لافضل النتايج.

ملحوظة: ممكن تستخدمي بدل زيت الزيتون زيت جوز الهند, او زيت الخروع, او زيت اللوز, او زيت الروزماري, بنفس الخطوات اللي احنا قولناها.

وصفات طبيعية لعلاج هيشان الشعر
وصفات طبيعية لعلاج هيشان الشعر

8- البيض:

البيض كمان واحد من اكتر العلاجات المنزلية المعروفة بفاعليتها في علاج الشعر الهايش والمجعد, صفار البيض غني بالدهون والبروتينات اللي بتساعد على ترطيب الشعر بشكل طبيعي, وبياض البيض بيحتوي على انزيمات بتقتل البكتيريا وبتزيل الزيوت الغير مرغوب فيها من فروة الراس, وده السبب ان البيض يعتبر من العلاجات اللي بتساعد في علاج التجعد والهيشان.

اضربي بيضة واحدة في طبق وضيفي لها معلقة صغيرة زيت زيتون, قلبيهم مع بعض كويس, حطي الخليط على الشعر وسيبيه لمدة 30 دقيقة, بعدها اغسلي الشعر كويس بالشامبو, واتأكدي من استخدام شامبو وبلسم مغذي للشعر.

وصفات طبيعية لعلاج هيشان الشعر
وصفات طبيعية لعلاج هيشان الشعر

9- المايونيز:

المايونيز بيحتوي على البيض والزيت وده بيساعد على ترطيب الشعر بشكل مضاعف, وبيقويه وبيديه لمعان.

في طبق حطي تقريبا ½ برطمان المايونيز, اخلطي معاه معلقة كبيرة زيت زيتون وصفار بيضة ومعلقة كبيرة من خل التفاح او عصير الليمون, اخلطي المكونات مع بعض كويس, حطي الخليط على الشعر يكون رطب ولسه مغسول, غطيه بكيس بلاستيك وسيبيه 30 دقيقة, بعدها اغسلي شعرك بمية باردة.

وصفات طبيعية لعلاج هيشان الشعر
وصفات طبيعية لعلاج هيشان الشعر

10- الليمون والعسل:

الليمون والعسل من اكتر المكونات اللي موجودة بسهولة وممكن نستخدمها لعلاج هيشان وتجعد الشعر, الليمون بيحتوي على الفيتامينات والمعادن الحيوية اللي بتساعد ان الشعر يكون صحي, والعسل يعتبر مرطب طبيعي.

اخلطي 2 معلقة كبيرة عسل نحل مع 2 معلقة كبيرة عصير ليمون, وضيفي لهم كوباية مية وقلبيهم مع بعض كويس, اغسلي شعرك بالشامبو وبعدين حطي عليه الخليط من الجذور للاطراف, سيبيه لمدة من 10 – 15 دقيقة وبعدها اغسليه بمية دافية وشامبو خفيف, كرريه من مرة لمرتين في الاسبوع.

وصفات طبيعية لعلاج هيشان الشعر
وصفات طبيعية لعلاج هيشان الشعر

طرق عمل Leave-in conditioner بمكونات طبيعية لترطيب الشعر

طرق عمل Leave-in conditioner