طريقة عمل الفراخ المدفونة في الملح

ريهام محمود
ريهام محمود
1440

الفراخ المدفونة في الملح يمكن في كتير مننا سمع عنها, هي طريقة تركية لعمل الفراخ وهنلاقي تقريبا ان معظم المطاعم التركية بتقدم الفراخ بالطريقة دي, وهي بتعتمد على دفن الفراخ بالكامل في كمية كبيرة من الملح لحد ما تستوي وبيكون طعمها مختلف ومميز جدا, والنهاردة هنقولكم بالخطوات والفيديو طريقة الفراخ المدفونة في الملح تعملوها بنفسكم في البيت بسهولة.

الفراخ المدفونة في الملح:

– مقادير التتبيلة الخارجية:

راس ثوم بقشرها, مقطوعة نصين بالعرض.

1 معلقة صغيرة ملح.

1 معلقة صغيرة فلفل.

1 معلقة كبيرة زيت زيتون.

2 معلقة كبيرة خل بلسمي.

½ ليمونة كبيرة.

2 ورق غار.

4 كوبايات مية.

– تتبيلة الفرخة من جوه:

فرخة متوسطة الحجم.

½ ليمونة كبيرة.

2 غصن زعتر, او معلقة كبيرة زعتر مطحون.

2 غصن اكليل الجبل “الروزماري”.

7 كوبايات ملح.

10 بياض بيض كبير.

الفراخ المدفونة في الملح 1
الفراخ المدفونة في الملح 1

– طريقة التحضير:

1- اول حاجة هنجهز التتبيلة الخارجية اللي هننقع فيها الفراخ, هاتي حلة  كبيرة تاخد حجم الفرخة بتاعتك حطيها على نار عالية واخلطي فيها المية مع الثوم والملح والفلفل وزيت الزيتون وعصير نص الليمونة وبعد ما تعصريها حطيها مع المية والخل البلسمي وورق الغار, سيبيهم على النار لحد ما الخليط يغلي, بعدها ارفعيه من على النار وسيبيه لحد ما يبرد يبقى زي درجة حرارة الغرفة.

الفراخ المدفونة في الملح 2
الفراخ المدفونة في الملح 2

2- مجرد ما الخليط يبرد حطي فيه الفرخة وغطيها, وحطيها في التلاجة منقوعة فيه لمدة 4 ساعات على الاقل, وممكن تعمليها من بالليل وتسيبيها لحد الصبح.

الفراخ المدفونة في الملح 3
الفراخ المدفونة في الملح 3

3- سخني الفرن على 350 درجة.

4- طلعي الفرخة من الخليط اللي منقوعة فيه, ونشفيها بمناديل المطبخ اضغطي عليه بالراحة عشان يتشرب اي سائل زيادة فيها, حطي جواها ½ الليمونة والزعتر والروزماري, واقفليها كويس من تحت بالخيط او بخلة السنان.

5- في طبق كبير اخلطي الملح مع بياض البيض كويس.

الفراخ المدفونة في الملح 4
الفراخ المدفونة في الملح 4

6- في الصينية اللي هتسوي فيها حطي تلت كمية الملح وحطي فوقيه الفرخة, وبعدين غطي الفرخة كلها من فوق بباقي كمية الملح واضغطي عليه واكبسيه كويس بايدك عشان تقفلي على الفرخة كلها, ممكن في الخطوة دي بدل ما نخلط الملح ببياض البيضة اخلطوه بالمية ممكن تحطوا من ½ لـ ¾ كوباية مية على كمية الملح دي لحد ما تلاقي الملح بقى رطب وبيمسك في بعضه.

الفراخ المدفونة في الملح 5
الفراخ المدفونة في الملح 5

7- حطي الفراخ في الفرن لمدة ساعة و 10 دقايق, او لحد ما تلاقي الملح بقى جامد وجاف خالص, وهتلاقي لونه بقى بني دهبي كده.

الفراخ المدفونة في الملح 6
الفراخ المدفونة في الملح 6

8- طلعيها من الفرن وسيبيها ترتاح لمدة 15 دقيقة, وبعدها ابدأي كسري الملح, وطلعي الفرخة واتخلصي من الجلد بتاعها لانه هيكون شارب الملح كله وخدي اللحم اللي تحت الجلد بس بيكون طري ومستوي وJuicy وطعمه لذيذ جدا.

الفراخ المدفونة في الملح 7
الفراخ المدفونة في الملح 7

9- ممكن تقدميها مع خضار مشوي, او اي طريقة خضار تفضليها.

الفراخ المدفونة في الملح 8
الفراخ المدفونة في الملح 8

– الطريقة بالفيديو:

بالخطوات والفيديو: طريقة عمل سباجيتي بالليمون مع فراخ كرسبي

سباجيتي بالليمون مع فراخ كرسبي
سباجيتي بالليمون مع فراخ كرسبي

مقالات متعلقه

طريقة عمل فراخ في الفرن بالثوم والبطاطس

طريقة عمل فراخ في الفرن بالثوم والبطاطس

بيكاتا الفراخ مع شرائح الليمون

بيكاتا الفراخ مع شرائح الليمون

طريقة عمل الكوردون بلو مع الصوص

طريقة عمل الكوردون بلو مع الصوص