12 حاجة الافضل تعمليهم بالليل بدل الصبح

بقلمريهام محمود فيصحة visibility1551

عاداتنا اليومية اللي بنعملها كل يوم سواء الصبح او بالليل بتأثر على يومنا كله وقد ايه ممكن تخلينا مركزين وكلنا نشاط طول اليوم او نبقى مكسلين ومعندناش طاقة نعمل حاجة او مش عارفين ننظم يومنا, عشان كده النهاردة هنقولك على عادات الافضل تعمليها بالليل بدل الصبح, هتغير يومك وتنظمه اكتر وتخليكي الصبح قايمة بنشاط اكتر.

عادات الافضل تعمليها بالليل بدل الصبح:

1- كلي جبنة قريش او لحمة:

لو مش بتاكلي قبل ميعاد نومك بكام ساعة, مش هتعرفي تنامي كويس, لان الجوع في اوقات كتير ممكن يسبب الارق ويخليكي متعرفيش تنامي كويس, ولو نمتي من غير عشا ده كمان هيخليكي صاحية الصبح جعانة وعايزة وجبة فطار كبيرة الصبح, عشان كده الافضل تاكلي قطعة جبنة او لحمة لان الاتنين بيحتوا على البروتين والتريبتوفان “وده الحمض الاميني اللي بيساعد على النوم”, وبالنسبة للخضار انواع كتير منه مش مفضل اكلها بالليل لانها ممكن تسبب انتفاخ.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

2- ممارسة المشي:

معظمنا متعودين يمارسوا المشي الصبح بدري, لكن احنا بنقولك انه مفضل تتمشي شوية بالليل قبل النوم, هيساعدك تتخلصي من كل ضغوطات اليوم وتنامي كويس, الهدوء بالليل هيساعدك تسترخي وتفكري بشكل اوضح, وثبت بالدراسات ان التمشية بالليل صحية وبتساعد على التخلص من الارق.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

3- كتابة خطة تاني يوم:

دي اكيد من الحاجات المفضل انك تعمليها بالليل انك تكتبي خطة تاني يوم او المهام اللي عايزة تعمليها خلال يومك كلها, لان الصبح هتكوني مستعجلة ومافيش وقت انك تعملي ده وممكن تنسي حاجة ويومك يتلخبط وتبقي مضغوطة لكن بالليل قدامك وقت للتفكير وكتابة كل حاجة ده هيساعدك ان الصبح تقومي ريلاكس ومش مضغوطة ويومك هيبقى مترتب اكتر لانك هتبقي عارفة كل اللي وراكي, واكتبي المهام من الاهم فالمهم يعني اللي عايزة تنجزيه وتخلصيه الاول والاهم بالنسبة لك يبقى اول قايمة المهام بتاعتك, وبكده هتوفري كتير من وقتك وطاقتك.

واكيد ممكن تبدلي او تزودي حاجة طارئة على القايمة بتاعتك لكن المهام الاساسية هتكون مكتوبة.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

4- تهوية اوضة النوم:

جسم الانسان بيحتوي على دهون بيضا ودهون بنية, الدهون البنية دي اللي بتكون مسئولة عن تنظيم درجة حرارة الجسم ومصدر طاقة للجسم, واثبتت دراسات مختلفة ان الدهون  البيضا ممكن تتحول لبني نتيجة لتأثير درجة الحرارة الباردة اللي بتحسن عملية التمثيل الغذائي.

عشان كده ممكن تفتحي شباك الاوضة بالليل تدخلي شوية هوا بارد عشان تخلي الدهون البنية تشتغل بشكل اسرع وتستهلك طاقة اكتر وتحسن عملية التمثيل الغذائي حتى اثناء النوم.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

5- حضري اكلك ولبسك:

لو عندك كل حاجة جاهزة ده هيوفر عليكي وقت الصبح وهيخليكي مش مضغوطة وقايمة براحتك, عشان كده الافضل انك تحضري لبسك اللي هتلبسيه تاني يوم من بالليل ولو بتاكلي في شغلك او في المكان اللي رايحاه حضريه كمان من بالليل, ده هيخليكي الصبح ريلاكس اكتر وتقدري تفطري براحتك وتشربي قهوتك وتبقي نشيطة.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

6- ممارسة اليوجا والتأمل:

غالبا كتير مننا مش بيقدر يعمل تمارين الصبح لضيق الوقت, لكن اليوجا والتأمل بالليل هيساعدك على ترتيب افكارك ومشاعرك وهتخفف من التوتر, وهتخليكي مستعدة تستقبلي تاني يوم بنشاط وبذهن صافي, خدي من وقتك كل يوم قبل النوم 10 دقايق بس مارسي فيهم اليوجا او التأمل.

ويمكن في كتير من الاشخاص مش بيعرفوا يمارسوا التأمل بسبب كتر الافكار اللي مش بيعرفوا يتغلبوا عليهم, وفي الحالة دي ركزي انتباهك على الوعي الداخلي, نامي على ضهرك او اقعدي مربعة وغمضي عينك, وفكري في كل جزء في جسمك وركزي عليه واسترخي, هتلاقي نفسك بعد التمرين هتنامي بشكل اسهل واسرع.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

7- خدي شاور سخن:

الشاور السخن الصبح مش اختيار مفضل لان درجة الحرارة السخنة بتساعد على النوم اكتر عشان كده الافضل ان الشاور ده يكون بالليل قبل النوم, لان التغيير ده في درجة حرارة الجسم بتساعد على النوم بشكل اسرع وبتخلصك من الارق.

والشاور السخن قبل النوم مش بس بيساعد على النوم لكن هو ليه فوايد كتير بيهدي الاعصاب, وبينضف مسام الجسم, وبيثبت مستوى الجلوكوز في الدم, بيساعد على استرخاء العمود الفقري, وهيساعدك تتخلصي من كل الارهاق والضغوط والاجهاد بتاع طول اليوم.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

8- اقري قبل النوم:

اثبتت الدراسات ان القراءة تعتبر افضل طريقة للاسترخاء لانك بتفصلك عن الواقع وبتدخلك في عالم تاني وده هيساعدك تتخلصي من اجهاد طول اليوم بشكل افضل من الموسيقى, محتاجة بس 6 دقايق قبل النوم تقري فيهم شوية لتقليل مستوى القلق واسترخاء العضلات.

وفي ميزة تانية للقراية بالليل لو في حاجة مش عايزة تنسيها اقريها قبل النوم على طول, لان العقل بيحفظ بشكل افضل بالليل, عشان كده نصيحتنا للطلبة اللي بيذاكروا انهم لو عايزين يثبتوا معلومة ومينسوهاش خصوصا في ايام الامتحانات انهم يراجعوا عليها بالليل قبل النوم, والافضل انك تستخدمي الكتاب العادي وابعدي عن الاجهزة الالكترونية من موبايل او تابلت او لا توب عشان تتجنبي الاضرار اللي ممكن يسببها ضوء الشاشة.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

9- كلي كيوي عشان تنامي احسن:

كتير من الاشخاص بيفضلوا ياكلوا الفاكهة الصبح في وجبة الفطار, لكن في انواع فواكة الافضل انها تتاكل بالليل ومنها الكيوي, اثبتت كتير من الدراسات ان اكل 2 ثمرة كيوي قبل النوم بساعة كل يوم لمدة شهر هيساعدك على النوم بشكل اسرع واحسن, لان فيتامين E, و C الموجودين في الكيوي بيساعدوا على تنظيم الوصلات العصبية في المخ المسؤولة عن دورات النوم الصحية وانتاج السيروتونين “هرمون النوم”.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

10- اشربي عصير كريز:

اثبتت بعض الدراسات ان شرب كوبايتين من الكريز بيساعد على النوم 90 دقيقة زيادة بالليل, لان الاصباغ الموجودة في الكريز بتخفف من تفكك التربتوفان وده بيساعد على النوم لفترة اطول وبشكل احسن.

كمان الاعشاب البحرية من الحاجات اللي بتساعد على النوم بشكل افضل واطول لانها بتحتوي على الاوميجا 3.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

11- سرحي شعرك بالفرشة:

تسريح الشعر بالليل بيساعد على تنضيف الخلايا الميتة والاتربة والدهون, وتدليك الشعر بفرشة ناعمة بيساعد على نقل الاكسجين والمواد الغنية بالمغذيات لجذور الشعر, ده غير انك الصبح مش هتبقي محتاجة وقت لتصفيف شعرك.

وعدد مرات تسريح الشعر بالفرشة المفروض يكون بين 2 – 3 مرات في اليوم هتكون كافية لان اكتر من كده ممكن الشعر يبقى دهني وهش ويتكسر بسرعة.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

12- تحليل اليوم:

اخر يومك بالليل قبل ما تنامي, حللي اليوم كله وافتكري كل الحاجات الكويسة اللي حصلتلك خلال اليوم, وفكري في اللي عايزة تغيريه, وممكن تكتبي ملاحظات, والدراسات اثبتت ان تحليل اليوم مفيد جدا لانه بيساعدك تخرجي كل اللي حصلك في اليوم وده هيخليكي تسترخي وتنامي بشكل افضل, ولو لسه حاسه ان عندك مشاعر سلبية قبل النوم, ممكن تعملي اي حاجة بتحبيها او لو عندك حيوان اليف ممكن تلعبي معاه شوية.

وفي النهاية السعادة هي قدرتك انك تكوني سعيدة في اللحظة اللي انتي عايشة فيها, وتسيبي بكره لبكره لانه في علم الغيب ومش معروف ايه اللي ممكن يحصل فيه, ودايما افتكري الحاجات الحلوة اللي في حياتك.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

– حيلة للتخلص من الشخير والصداع:

لو عندك حد في البيت بيعاني من مشكلة الشخير اثناء النوم, بننصح بالتمرين ده للتخلص من المشكلة وكمان هيساعد على تقوية عضلات الفك العلوي لانه عادة ضعفه هو اللي بيسبب الشخير اثناء النوم.

التمرين بسيط جدا وممكن اي حد يعمله في وقت فراغة, حطي قلم رصاص بين الاسنان وخليكي مسكاه بسنانك لمدة من 5 – 10 دقيقة, كررية يوميا, التمرين بسيط جدا لكن فعال في علاج المشكلة وكمان بيساعد على تخفيف الصداع لانه بيساعد على استرخاء العضلات التانية, يعني اي حد بيعاني من الصداع ممكن يعمل التمرين ده.

عادات الافضل تعمليها بالليل بدل الصبح
عادات الافضل تعمليها بالليل بدل الصبح

5 اسباب علمية ليه بتفضلي حاسة بتعب اول ما تصحي من النوم الصبح

ليه بتقومي تعبانة الصبح