21 حاجة ممكن جسمك يقولهملك عن صحتك

ريهام محمود

في

3302

الجسم يعتبر المرايا اللي بتعكس لنا كل حاجة عن صحتنا, ممكن اصغر التغييرات في جسمك سواء جسديا او عقليا او عاطفيا تقولك حاجات كتير عن صحتك العامة, والنهاردة من خلال موضوعنا هنقول كل بنات حوا علامات بيقولهم جسمك عن صحتك.

علامات بيقولهم جسمك عن صحتك:

1- تشقق وجفاف الشفايف:

بيحصل لكتير مننا احيانا من وقت للتاني ان الشفة تكون جافة او متشققة او مقشرة, لكن لو المشكلة متكررة وبتحصل في اوقات كتير, فده معناه ان في حساسية او جفاف, وفيها حساسية اسمها “التهاب الشفاه التحسسي” ودي ممكن تحصل بسبب مستحضرات التجميل ومنتجات الشفايف, والادوية, ومنتجات صحة الاسنان زي معجون الاسنان, وممكن تحصل بسبب بعض المعادن والاكلات.

2- تورم القدمين:

تورم القدمين ممكن يحصل عادة للست الحامل, او الاشخاص اللي بيقفوا ساعات كتير او فترة طويلة, لكن لو التورم حصل بسبب مش واضح, في الحالة دي ممكن تكون مشكلة في القلب انه مش بيضخ الدم بشكل فعال, وده بيأدي لاحتباس السوائل في الجسم وده اللي بيسبب التورم, والحالة دي ممكن تحصل لكل الاعمار من الاطفال لحد كبار السن.

3- لون اللسان شاحب:

في الظروف العادية لو مش بتعاني من اي حاجة يبقى الطبيعي ان لوم اللسان يكون وردي ورطب مش جاف, وبراعم التذوق اللي هي الحبيبات الصغيرة اللي بتكون على اللسان تكون واضحة للعين, لكن لو اللسان لونه شاحب وجاف ده ممكن يكون اشارة لنقص الحديد في الدم.

4- ريحة عرق مش طبيعية:

ريحة العرق ممكن تديكي معلومات كتير عن صحتك العامة, مثلا لو العرق ريحته زي الاسيتون ده بيقولك ان نسبة السكر في الدم مش طبيعية, لان الاشخاص المصابين بالسكر ريحة عرقهم بتكون حلوة بسبب تراكم السكر على الجلد, ولو ريحة العرق زي الامونيا دي اشارة ان ممكن يكون في مشاكل في الكبد او الكلى.

5- طول الصوابع:

طول الصوباع البنصر والسبابة شوفي اي واحد فيهم اطول من التاني لان ممكن يتحدد عليها حاجات في صحتك, لان الدراسات في امراض التهاب المفاصل والروماتيزم اثبتت ان النساء اللي عندهم الصوباع البنصر اطول من السبابة بيزيد عندهم الاحتمال للضعف انهم ممكن يصابوا بالتهاب المفاصل في الركبتين.

6- تساقط شعر الحواجب:

تساقط شعر الحواجب ممكن يكون سببه مرض الغدة الدرقية, وده ممكن يحصل في كل حالات الغدة الدرقية سواء الغدة الدرقية المفرطة او الغير نشطة, وعادة هتلاقي الجزء الخارجي من الحواجب بدأ الشعر فيه يقل.

7- ريحة القدم الكريهة:

لو محافظة على نضافة رجلك والشرابات والشوز اللي بتلبسيهم وبرغم ده بيكون فيها ريحة كريهة, ده معناه وجود عدوى فطرية في القدمين, وبتظهر على شكل طفح جلدي وتقشر واحمرار في الجلد, وبتحصل حكة في الجلد, وبتظهر اكتر بعد قلع الشراب والشوز على طول.

8- نمو الشعر بشكل مش طبيعي:

لو عندك نمو زايد في الشعر ومكنش بيحصلك عادة ده معناه ان في مشكلة صحية, ومن اكتر اسباب الحالة دي هي متلازمة المبيض المتعدد التكيس, بيحصل بسببها خلل في الهرمونات بيخلي الشعر ينمو بشكل مش طبيعي او مفرط وزيادة لان الجسم بيفرز هرمونات ذكورية زيادة, وممكن الشعر ينمو على الوش والضهر والاذنين, والدراسات اثبتت ان تقريبا ما بين 8 – 20% من النساء في جميع انحاء العالم بيعانوا من المشكلة دي.

9- البقع الغامقة على الجلد:

لما الحالة دي بتحصل اول مرة اول حاجة ممكن اكتر البنات يفكروا فيها هي عملية تقشير البشرة عشان تخلصهم من البقع الغامقة او تصبغات الجلد, لكن الدراسات اثبتت ان البقع دي ممكن يكون سببها حساسية من دوا معين, او اعراض ما قبل مرض السكر.

10- سمانة الرجل الصغيرة:

اللي عندهم حجم السمانة صغير اقل من 13 بوصة تقريبا معرضين اكتر لخطر الاصابة بالسكتة الدماغية, واثبتت الدراسات ان خطر الاصابة بالسكتة الدماغية مرتبط بشكل اكبر مع اللي عندهم حجم السمانة صغير.

11- حجم الثدي:

النساء اللي حجم الثدي عندهم D او اكبر لما بيوصلوا لسن العشرين بيكونوا معرضين اكتر للاصابة بمرض السكر من النوع التاني بمعدل مرة ونص اكتر من اللي النساء اللي عندهم حجم الثدي اصغر, والدراسات والابحاث اثبتت ان ده ممكن يكون سببه الدهون الحساسة هرمونيا في الصدر وده بيخلي النساء اللي صدرهم كبير اكتر عرضة لمقاومة الانسولين.

12- الذراعين القصيرين:

يقال ان النساء اللي عندهم طول الذراعين قصيرين هما معرضين مرة ونص اكتر لللاصابة بمرض الزهايمر حسب دراسة في علم الاعصاب, ويقال ان الذراع القصير اللي بيكون طوله 60 بوصة او اقل.

13- انتفاخ العين:

غالبا انتفاخ العين او التورم الخفيف تحت العين بيحصل من قلة النوم او الضغط الزيادة, لكن كمان ممكن يكون سببه التغيرات الهرمونية, اكل الملح, كمان الحساسية الغذائية او الحساسية عموما ممكن ليها دور في مشكلة انتفاخ العين, خصوصا عند الاطفال.

14- مؤشر كتلة الجسم:

لو قربتي من سن الاربعين وعندك منطقة البطن كبيرة ده بيزود اصابتك بمرض الخرف في السبعينات بنسبة 3.6 اكتر من اللي بطنهم اصغر, وحسب الدراسات ده ممكن يرجع للهرمونات الالتهابية اللي بينتجها المستوى العالي من الدهون اللي موجود عند منطقة البطن.

15- الاشخاص القصيرين بيعيشوا اطول:

لو الشخص القصير مش بيعاني من اي امراض, فده بيخليهم يميلوا انهم يعيشوا اكتر من الاشخاص الاطول منهم, لانه حسب الابحاث بيعتقدوا ان ده مرتبط بواحد من الجينات المسؤولة عن قصر القامة هو كمان مسؤول بشكل جزئي عن طول العمر.

16- فصيلة الدم:

اثبتت الابحاث مؤخرا ان الاشخاص اللي فصيلة دمهم O سواء كان سلبي او ايجابي هم معرضين بشكل اقل للاصابة بسرطان البنكرياس, وان الاشخاص اللي فصيلة دمهم A, B, AB عندهم زيادة بنسبة 44% لخطر الاصابة بالنوع ده من السرطان.

17- عدم تساوي شكل الاسنان:

لو لاحظتي مع الوقت ان شكل الاسنان غير متساوي وشكلها بيتغير, ده معناه انك بتعاني من طحن الاسنان او الضغط عليها اثناء النوم, وعادة طحن الاسنان بيكون مرتبط بزيادة الضغط والاجهاد.

18- التجاعيد:

طبيعي مع التقدم في العمر البشرة بيبدأ يقل فيها انتاج الكولاجين وبيكون طبيعي ظهور التجاعيد, لكن مع ذلك لو الدورة الشهرية اتقطعت في وقت مبكر وبدأتي تلاحظي ظهور تجاعيد, يبقى هنا ممكن تكون المشكلة في العضم, لان الابحاث اظهرت ارتباط التجاعيد المبكرة بمرض هشاشة العظام, واثبتوا ان نوعية الجلد كانت دليل على كثافة معادن العضم, وان توزيع وشدة التجاعيد مرتبطة غالبا بكثافة اقل للعضم.

19- شكل الضوافر:

الضوافر ممكن تقولنا حاجات كتير عن صحتنا, لو الضوافر عليها خطوط ورا بعض ده ممكن يقولك انك بتعاني من الاجهاد, ولو في تكيسات صغيرة حوالين الضوافر ده ممكن يكون اشارة لالتهاب المفاصل, ولو في على الضوافر خطوط جانبية او بقع بيضا او ضوافر مقشرة ده ممكن يكون اشارة لامراض الكلى.

20- ريحة البول والبراز:

كل اللي بيخرج من الجسم بشكل مش طبيعي ده بيدينا اشارة لتغيرات في الجسم, لو البراز ريحته نفاذه اوي وكريهة زيادة يبقى بصي كده على اخر حاجة اكلتيها, لان في ملاحظات اثبتت ان في علاقة ما بين البراز اللي ريحته كريهة ومنتجات الالبان, وده معناه ان الجسم مش متحمل اللاكتوز اللي موجود في منتجات الالبان, ولو البول ريحته كيميائية ده اشارة لعدوى في المسالك البولية بيحصل بسبب نوع معين من البكتيريا اسمه “E-coli”.

21- البشرة الجافة:

جفاف البشرة ممكن يحصل بشكل طبيعي في ايام البرد, لكن لو جفاف البشرة مقلش مخفش بالمرطبات وشرب كمية مية كفاية, ده معناه انه ممكن يكون نقص في المغذيات او مرض السكر او الغدة الدرقية, وممكن نقص مغذيات زي الاحماض الدهنية الاساسية وفيتامين E, وفيتامين D, وفيتامين A, والبوتاسيوم يكونوا من اسباب جفاف البشرة.

في النهاية بننصحك انك تتأكدي انك تعملي فحص لنفسك وتقييم صحتك مرة في الاسبوع, لانها انعكاس مباشر لحالتك الصحية, لو لاحظتي اي تغيير مش طبيعي يبقى لازم تهتمي وتروحي للدكتور على طول.