7 عادات بتتسبب في تدمير اسنانك ولثتك..وازاي تعالجيها

ريهام محمود
ريهام محمود
في
صحة
2948

العناية بالاسنان واللثة مهم جدا لصحتك العامة لانهم مرتبطين بشكل مباشر بالجسم, لان الحفاظ على صحة الاسنان واللثة ممكن يمنع الاضطرابات الطبية او الامراض زي السكر والنوبات القلبية والسكتة الدماغية, وقلة العناية والاهتمام بصحة الفم بيخلي البكتيريا تتراكم على اللثة, وعدم الانتظام في تنضيف الاسنان ممكن يأدي لحالات التهاب شديدة في اللثة وامراض اللثتة بشكل عام, وفقدان الاسنان, او ممكن تتطور لحالة طبية اكبر وتوصل لامراض القلب والاوعية الدموية, وللاسف ان احنا ممكن نوصل الاسنان للحالة دي بعاداتنا اليومية السيئة, وده اللي هنعرفة النهاردة في السطور الجاية هنقولك عادات بتضر الاسنان واللثة, وازاي تعالجيها وتمنعيها.

عادات بتضر الاسنان واللثة:

1- فتح اي حاجة بسنانك:

عادة في كتير مننا بيعملها اننا ممكن نفتح ازازة او نقطع اي حاجة بسنانا بدل السكينة او المقص او الفتاحة, ودي من الحاجات اللي بتضر الاسنان وممكن تتسبب في تكسيرها.

عادات بتضر الاسنان واللثة 1
عادات بتضر الاسنان واللثة 1

2- التدخين:

اكيد دي حاجة تعتبر مش جديدة ومعروف ان التبغ او التدخين من الحاجات المضرة جدا, والابحاث اكدت ان التبغ بيزود خطر الاصابة بأمراض اللثة وسرطانات الفم, بالاضافة لاحتمال الاصابة بالسرطان لاي مكان في الجسم, ده غير انها بتسيب بقع وتصبغات على الاسنان وبتغير لونها.

عادات بتضر الاسنان واللثة 2
عادات بتضر الاسنان واللثة 2

3- قضم الاظافر:

كتير من البنات عندهم عادة قضم الاظافر, فكري كده ان الصوابع بتلامس حاجات قد ايه خلال اليوم على مدار 24 ساعة, وهيتجمع عليها ملايين البكتيريا على الايد وتحت الضوافر, واكيد ده هينقل البكتيريا دي للفم وهيسبب ضرر للاسنان واللثة, ده غير ان العادة دي ممكن تغير شكل الاسنان وتخليهم مش مظبوطين.

عادات بتضر الاسنان واللثة 3
عادات بتضر الاسنان واللثة 3

4- البيرسينج:

في كتير من البنات دلوقتي بيعملوا بيرسينج الشفايف او الخد كنوع من التغيير ونيولوك, لكن ده كمان من الحاجات اللي ممكن تضر الاسنان واللثة لان الخرم اللي بيتعمل حوالين الفم في اي مكان ممكن يتلوث او يلتهب وتأدي لاصابة مزمنة في الاسنان اللي حوالين المنطقة اللي معمول فيها البيرسينج, وممكن تتسبب في كسور الاسنان او فقدانها وامراض اللثة.

عادات بتضر الاسنان واللثة 4
عادات بتضر الاسنان واللثة 4

5- اكل كتير من الاكلات الحامضية:

ممكن الاكل الكتير للاطعمة اللي بتحتوي على نسبة عالية من الحموضة زي الليمون والبرتقان وغيرها من الاكلات الحامضية تتسبب في تلف مينا الاسنان اللي هي الطبقة الخارجية الصلبة للاسنان, واضرار المينا بتزود بشكل كبير من مخاطر الاصابة بتسوس الاسنان وامراض الفم.

عادات بتضر الاسنان واللثة 5
عادات بتضر الاسنان واللثة 5

6- الضغط على الاسنان:

عادة الضغط على الاسنان هنلاقيها دايما عند الاشخاص العصبيين عشان يخرجوا من حالة العصبية او التوتر ممكن يضغطوا على سنانهم اوي وده ممكن بيزود من خطر الفك غير المتوازن وبيغير في شكل الفك وبيسبب تدهور صحة الاسنان.

عادات بتضر الاسنان واللثة 6
عادات بتضر الاسنان واللثة 6

7- اكل سكريات كتير:

كقاعدة عامة كده كل ما اكلتي سكر كتير كل ما زادت وجود البكتيريا الفموية, ومش بس كده كمان استهلاك كمية كبيرة من السكر مرتبط بمستويات اعلى من البكتيريا والسموم في اجزاء تانية من الجسم غير الفم, حتى مستحلبات الحلق اللي بناخدها احيانا لما بيكون عندنا دور برد المفروض نتجنبها لانها بتحتوي على نسبة عالية من السكر.

عادات بتضر الاسنان واللثة 7
عادات بتضر الاسنان واللثة 7

– العلاج والوقاية من اضرار الفم واللثة:

على حسب حالة الاسنان واللثة ممكن اننا نعكس الضرر او كمان نقدر نمنعه خالص, هنقولكم على شوية نصايح عشان تقدروا تحافظوا بيهم على صحة الاسنان واللثة.

1- اول حاجة ابدأي في العناية والاهتمام المنتظم للفم, وده معناه غسل الاسنان بالفرشة والمعجون مرتين في اليوم, والتنضيف بالخيط مرة واحدة في اليوم على الاقل, واستخدام الفرشة والخيط بشكل صح لانهم هما يعتبروا الادوات الاساسية لحماية الاسنان واللثة من التلف.

2- لو لاحظتي اي ضرر او تغيير في اللثة زي مشكلة تراجع اللثة اللي في كتير ممكن يكون بيعاني منها, يبقى ضروري تروحي زيارة لدكتور الاسنان عشان يكتب لك العلاجات اللازمة اللي بتساعد على اصلاح انسجة اللثة ومنع اي ضرر زيادة ممكن يحصل.

3- اتجنبي اي عادة سيئة او سلوك ممكن يضر اسنانك بالاضافة للعادات السبعة اللي احنا قولناهم, ورابطة طب الاسنان الامريكية ذكرت بعض العادات اللي ممكن تضر الاسنان منها:

– الاكل بشراهة.

– غسل الاسنان بالفرشة بشكل قاسي زيادة عن اللزوم.

– مضغ التلج.

– شرب قهوة وشاي كتير.

– اكل وجبات خفيفة او سناكس كتير.

– الضغط على القلم بالاسنان.

– ممارسة رياضة عنيفة من غير حماية للفم والاسنان.

ولو عايزة وجبة خفيفة او سناكس صحي وميضرش اسنانك في نفس الوقت ممكن تاكلي خيار بدل الوجبات الخفيفة اللي فيها نسبة سكر عالية او المالحة اللي ممكن تضر اسنانك, ده غير ان الخيار ليه فوايد صحية.

عادات بتضر الاسنان واللثة 8
عادات بتضر الاسنان واللثة 8

10 علاجات طبيعية تعمليهم في البيت هتخلصك من ألم الاسنان

علاجات طبيعية لألم الاسنان
علاجات طبيعية لألم الاسنان

مقالات متعلقه

ليه اللسان بيتحول للون الابيض و 8 طرق للتخلص من المشكلة

ليه اللسان بيتحول للون الابيض و 8 طرق للتخلص من المشكلة

ازاي تستخدمي خيط تنضيف الاسنان بشكل صح

ازاي تستخدمي خيط تنضيف الاسنان بشكل صح

ازاي تستخدمي بيروكسيد الهيدروجين (ماء الاكسجين) كغسول للفم

ازاي تستخدمي بيروكسيد الهيدروجين (ماء الاكسجين) كغسول للفم