9 وجبات خفيفة ممكن تاكليهم بالليل في وقت متأخر من غير ما تحسي بالذنب
مش هننكر ان كلنا بنحب الاكل وخصوصا بالليل واحنا سهرانين كده بنلاقي نفسنا بندور على اي حاجة ناكلها وتسلي سهرتنا والمشكلة اننا دايما بنختار الاكلات اللي ممكن تزود وزننا, وزي ما كلنا عارفين ان الاكل في وقت متأخر بشكل خاص هي اكتر حاجة ممكن تزود الوزن وخصوصا في منطقة الوركين والارداف والبطن, لكن الخبر الحلو ان الابحاث اثبتت ان مش كل الاكلات في وقت متأخر ممكن تزود الوزن في اكلات لذيذة ممكن ناكلها من غير ما نحس بالذنب انها ممكن تزود وزننا, وده اللي هنعرفه من خلال السطور الجاية هنقول لكل بنات وجبات خفيفة مش بتزود الوزن ممكن تاكليها بالليل.
– وجبات خفيفة مش بتزود الوزن:
مبدئيا كده لازم نعرف ان الاعتدال هو المفتاح اللي هيخلينا نحافظ على وزننا, دايما خلي قايمة الاكل بتاعتك اكلات بتحتوي على نسبة عالية من البروتين, ومنخفضة السكر ومنخفضة في ال GL و ال GI.
1- الجبن:
اول حاجة هنقول تاني لازم الاعتدال ثم الاعتدال في الكميات يعني مش معنى انها مسموحة يعني ناكل كميات زي ما احنا عايزين, يعني لما نقول الجبنة كوجبة خفيفة لوقت متأخر بالليل يعني احنا بنتكلم على شريحة واحدة جبنة مش نص كيلو جبنة, الجبنة غنية بالبروتين وهتخليكي تحسي بالشبع لحد تاني يوم, وممكن تاكلي جبنة قليلة الدسم كوجبة خفيفة بالليل عشان تحافظي على وزنك.
2- الجبنة القريش:
الجبنة القريش بتحتوي على بروتين الكازين, والكازين بيحتوي على معدل هضم بطيء جدا, وده يعتبر افضل نوع من البروتين اللي ممكن تاكلية بالليل في وقت متأخر لانه هيزود الشعور بالامتلاء والشبع.
3- الحمص:
يعتبر الحمص مصدر هايل جدا للبروتين, فلو حسيتي بالجوع بالليل ممكن تقطعي جزر وكرفس شرايح وتغمسيها في الحمص هيكون اختيار ممتاز جدا كوجبة خفيفة بالليل.
4- الزبادي:
اثبت العلماء ان الزبادي اليوناني يعتبر اختيار مثالي كوجبة خفيفة في وقت متأخر بالليل, لانه غني بالبروتين وفي نفس الوقت قليل الدسم, ومنخفض جدا في السكر, ممكن تضيفي لها اي نوع فاكهة زي التوت مثلا عشان تخلي طعمها لذيذ اكتر.
5- البسكويت:
والبسكويت هنا نقصد بيه اللي بيكون مصنوع من الحبوب الكاملة مع الكربوهيدرات المعقدة اللي بتكون منخفضة السعرات الحرارية, ممكن تضيفي للبسكويت حمص مع شريحة جبنة او جبنة قريش وتاكليها كوجبة خفيفة لذيذة جدا بالليل.
6- الفشار:
يمكن يكون ده اختيار مفاجيء لكتير من الناس, ولكن في الحقيقة ان الفشار وجبة خفيفة آمنه جدا لاكلها بالليل, واكيد مش المقصود بردو الفشار اللي بيكون مليان بالزيت او بالزبدة, لكن الفشار اللي من غير زيت هو اللي ده الاختيار الصحي كوجبة خفيفة بالليل, كل اللي هتعمليه حطيه في حلة ضد الالتصاق من غير اي دهون خالص وغطيه وحطيه على نار هادية لحد ما يفرقع كله, بعدها ممكن ترشي عليه ملح وشطة وبودرة ثوم او اي توابل او اعشاب تختاريها عشان تضيفي نكهة لذيذة لطعمه.
7- البيض:
البيض كمان يعتبر اختيار كويس كوجبة خفيفة, البيضة الواحدة بتحتوي تقريبا على 75 سعر حراري بس, وفي نفس الوقت بتحتوي على نسبة عالية جدا من البروتين هتخليكي تحسي بالشبع لفترة طويلة.
8- الخضروات:
الخضروات تعتبر من افضل الاختيارات كوجبة خفيفة, لان معظمها بتحتوي على نسبة عالية جدا من ال GI اللي هيخليكي تحسي بالشبع لحد تاني يوم, ممكن تقطعي شرايح كرفس او جزر في طبق, او تعملي سلطة خضروات باكتر من نوع خضار تختاريه.
9- الموز:
على الرغم من ان الموز بيحتوي على نسبة عالية من السعرات الحرارية, لكن كمان بيحتوي على كمية كبيرة من البوتاسيوم والمغنسيوم, وكمان بيحتوي على الميلاتونين اللي الابحاث اثبتت انه بيساعد على النوم, يعني موزة واحدة بالليل كوجبة خفيفة مش هتخليكي تحسي بالشبع بس لا كمان هتساعدك تنامي بشكل احسن.
– الاكلات اللي تتجنبيها:
زي ما عرفنا ايه الاكلات اللي ممكن تاكليها كوجبة خفيفة بالليل وانتي مطمنة هنقولك على الحاجات اللي المفروض تبعدي عنها او تتجنبي اكلها بالليل في وقت متأخر.
– الكربوهيدرات السريعة: الكربوهيدرات السريعة هي اللي بتحتوي على نسبة عالية من ال GI وال GL واكيد قايمة الاكلات دي طويلة جدا ولكن بصفة عامة, اتجنبي الحلويات, الكيك, الكاندي اللي بيكون فيها نسبة عالية من السكريات, الدوناتس, لان كل الحاجات دي بتزود من منطقة الخصر والبطن.
– التفاح: على الرغم من ان التفاح منخفض السعرات الحرارية وغني جدا بجميع انواع العناصر الغذائية, لكن الافضل انك تاكلي تفاحة الصبح او في وقت بدري بعد الضهر, والسبب في ده ان التفاح غني بالالياف والبكتين الموجود في قشرته اللي بياخدوا وقت طويل في الهضم وده ممكن يخلي المعدة مش مرتاحة ويخليكي متعرفيش تنامي.
– الاكل السبايسي او الحار: الاكل السبايسي والمملح بيخلي الجسم جاف او بيقلل رطوبة الجسم, وفي الحالة دي لما هتقومي في نص الليل لاي سبب هتحسي انك عايزة تاكلي وهتروحي لاي حاجة قدامك.