نصايح جمالية هتوفرلك في الوقت وتخليكي تطلعي بلوك حلو
زي ما عودنا بنات حوا دايما بنجيب لهم كل الحاجات اللي ممكن تساعدهم يطلعوا بلوك احلى وفي اسرع وقت, النهاردة هنقولك على مجموعة نصايح جمالية هتوفرلك في الوقت وتخليكي تطلعي بلوك حلو.
نصايح جمالية هتوفرلك في الوقت:
1- الغسيل الجزئي للشعر:
لو جذور شعرك دهنية او بتفرز زيوت زيادة بسرعة ده بيبوظ لوك الشعر كله, في الحالة دي لو معندكيش وقت تغسليه كله ممكن تغسلي الشعر بشكل جزئي عشان تعملي ريفريش سريع للشعر, وده ممكن تعمليه بطريقتين.
الطريقة الاولى انك تستخدمي الشامبو الجاف على جذور الشعر.
والطريقة التانية لو مش متوفر عندك شامبو جاف, طلعي خصل صغيرة من الشعر من قدام ومن الجناب ولمي باقي الشعر على ورا ديل حصان, واغسلي الخصل دي بالمية والشامبو بالطريقة العادية, وعشان الخصل صغيرة مش هتاخد اكتر من 20 دقيقة عشان تنشف, وبعدها اعملي الشعر كله ديل حصان عالي, وبكده تبقي عملتي ريفريش سريع لشعرك.
2- جددي الشوز:
لو عايزة تلمعي الشوز بتاعك بشكل سريع ممكن تستخدمي الكريم المرطب بتاع الايد حطي منه كمية بسيطة على الشوز وافركيه بقطعة قماش او سفنجة, هتلاقيه رجع بيلمع.
3- بطن مسطحة في 10 دقايق:
لو اكلتي وجبة دسمة ومنطقة البطن بقى حجمها اكبر من العادي وعايزة تتخلصي منها بسرعة, تمرين السكوات هيساعدك في المهمة دي لان ليه تأثير ايجابي فوري, واكيد هيبقى نتايج بشكل اوضح لو انتظمتي عليه.
اقفي بشكل مستقيم وخلي القدمين بعرض الكتفين, وانزلي لتحت على قد ما تقدري كأنك هتقعدي على كرسي, وحافظي على ضهرك مستقيم, كرريه 20 مرة, هيصغر منطقة البطن.
4- لعلاج اطراف الشعر الجافة:
لو بتعاني من جذور الشعر الدهنية, غالبا هتكون اطراف الشعر جافة وشكلها مقصف ومنقسمة, وعشان تصلحيها بشكل فوري, هاتي فرشة شعر وحطي عليها كام نقطة من اي نوع زيت اساسي, او سيروم او اي نوع مستحضر بتستخدمية لشعرك, او زيت زيتون, وسرحي الاطراف بتاعة الشعر, الزيت هيخفف من جفاف الاطراف ويديه مظهر ناعم, وبعد ما تسرحيه متلمسيش الشعر, عشان الزيت اللي في الاطراف ميجيش عند جذور الشعر.
5- التخلص من الروايح الكريهة:
اوقات كتير بيبقى في روايح مش بتروح من الايد بسرعة وبتقعد فترة طويلة مش بنعرف نتخلص منها زي التدخين, السمك, البصل, الثوم, وعادة الصابون العادي مش بيخلصنا من الروايح دي, جربي المرة الجاية تستخدمي معجون الاسنان وافركي بيه الايد والضوافر هيخلصك من اي روايح وكمان هيديكي ريحة حلوة.
6- تخفيف الشعور بالانتفاخ بشكل سريع بعد وجبة دسمة:
اوقات كتير بيحصلنا ده اننا ناكل وجبة دسمة او ناكل كمية اكل كبيرة ويسبب لنا انتفاخ وعدم راحة في المعدة, هنقولك على مشروب بسيط جدا هيخلصك من الانتفاخ بشكل فوري, اعصري ½ ليمونة على كوباية مية واشربيها, المشروب ده فعال جدا في علاج الانتفاخ بشكل سريع, وبيخلي الجهاز الهضمي يشتغل بشكل احسن من غير ما تحتاجي لادوية, بس لو عندك اي مرض من امراض الجهاز الهضمي المشروب ده هيكون مش مناسب ليكي.
7- خلي مكياجك بسيط:
لو معندكيش وقت للمكياج, خلي مكياجك بسيط وبخطوات سريعة, ممكن تستخدمي كونسيلر لو عندك هالات سودا ومحتاجاه, وحطي ايشادو على الجفن كله بلون محايد او طبيعي, وحطي طبقة ماسكارا, وبودرة, وبلاشر, وليب جلوس, وممكن تستخدمي مستحضر واحد لكذا حاجة عشان توفري في الوقت يعني ممكن تستخدمي الروج للشفايف وللخدود كبلاشر حطي منه لمسة خفيفة على الخدود وادمجيها بصوابعك.
8- استخدمي زيت شجرة الشاي على حب الشباب:
لو عندك حباية عايزة تتخلصي منها بسرعة استخدمي زيت شجرة الشاي هيساعد على تقليل حجمها وتخفيف الاحمرار والالم, هاتي قطعة قطن وادهني الاماكن اللي فيها حبوب بالزيت هتخففها وتقلل حجمها في اقل من 4 ساعات, والميزة انك ممكن تحطي الميك اب بتاعك وانتي داهنة زيت شجرة الشاي مش هيأثر على المكياج بتاعك.
9- اعملي شعرك كيرلي طبيعي بطريقة سريعة:
بعد ما تغسلي شعرك بدل ما تنشفيه بالسيشوار وياخد منك وقت, وفري وقتك واعملي تسريحة سريعة في نفس الوقت, بعد ما تغسليه اعمليه ضفيرة بس مش محكومة اوي خلي الشعر براحته, وعقبال ما تلبسي وتجهزي نفسك وقبل ما تنزلي فكي الضفيرة او ممكن تخليها لحد ما توصلي للمكان اللي انتي رايحاه سواء للشغل او الجامعة وبعدين فكيها, هتلاقي شعرك ويفي طبيعي, والطريقة دي مش بس بتوفر في الوقت كمان بتساعد على تقوية الشعر, لان ادوات تصفيف الشعر عموما بيكون ليها تأثير سلبي وبتبوظ الشعر مع الوقت.
10- داري الهالات السودا بالتلج:
لو عندك هالات سودا وانتفاخات تحت العين وعايزة طريقة سريعة عشان تخفيها استخدمي مكعبات التلج, كل اللي هتعمليه دلكي منطقة تحت العين بمكعبات التلج, ودلكي تدليك سريع على الوش كله, مكعبات التلج مفيدة جدا لاخفاء التجاعيد والخطوط الرفيعة, وبتحسن البشرة بشكل سريع.
11- ماسك الشوفان لتهدئة البشرة:
لو بشرتك ملتهبة او فيها احمرار وعايزة حل سريع ليها, كل اللي هتعمليه اخلطي شوفان مطحون مع عسل نحل لحد ما تكون عندك عجينة, افرديها على البشرة وسيبيها لمدة 10 دقايق وبعدين اغسلي وشك بمية دافية, ونشفيها ورطبيها بكريم مرطب, الماسك ده يعتبر حل سريع لتهدئة وتجديد البشرة.
12- البنسة والكونسيلر لاخفاء بقع حب الشباب:
عشان تخفي بقع حب الشباب بشكل سريع, هاتي بنسة شعر نضيفة واستخدميها لتطبيق الكونسيلر على مكان البقعة حطي كمية بسيطة على طرف البنسة وحطيه على البقعة, وبعدها ممكن تحطي عليها بودرة بعود قطن.
13- اعملي ملمع شفايف طبيعي:
لو معندكيش ليب جلوس او ملمع شفايف, بكل بساطة ممكن تستخدمي التوت او الفراولة المهروسة وحطيها على الشفايف هتديكي لون احمر خفيف طبيعي, لو عايزة ترطيب من غير لون ممكن تدهني الشفايف فازلين بس هيرطب الشفايف وهيديكي لمعة طبيعية.