ازاي طريقة الصيام المتقطع مثالي ليكي لو عايزة تخسري وزنك بسرعة
لفترة طويلة كانت الشائع او المنتشر ان تخطي الوجبات او اننا نفوت وجبات مناكلهاش تعتبر مش الطريقة المثالية لو عايزة تخسي, وان الابحاث اظهرت ان تخطي الوجبات بيبطء من عملية التمثيل الغذائي, وده بالتالي مش هيفيد عملية انقاص الوزن, لكن على الرغم من كده طريقة الصيام المتقطع يعتبر شكل من اشكال النظام الغذائي, والطريقة دي بقت منتشرة جدا بشكل كبير في الفترة الاخيرة بين البنات اللي عايزين يخسوا, والنهاردة من خلال المقال بتاعنا هنعرف طريقة الصيام المتقطع لتخسيس الوزن وازاي نعمله.
الصيام المتقطع هو نوع من انواع الانظمة الغذائية, بيعتمد على تقليل السعرات الحرارية حوالي من 500 – 600 سعر حراري لمدة يومين او اكتر كل اسبوع, والابحاث اثبتت ان نظام الصيام المتقطع بيساعد على فقدان الوزن بشكل اكبر من الحميات الغذائية التانية اللي بتعتمد على تقليل السعرات الحرارية بشكل يومي, والميزة في النظام انه مش قاسي ولا صعب وسها تنفيذه, وكمان مناسب جدا لشهر رمضان للبنات اللي بيلغبطوا او وزنهم بيزيد في رمضان ومش بيعرفوا يمشوا على نظام غذائي مناسب, النظام ده مناسب جدا ليهم.
طريقة الصيام المتقطع لتخسيس الوزن:
النظام ليه اكتر من طريقة, هنشوف منهم 4 طرق مختلفة وهي تعتبر اكتر الطرق الشائعة والمنتشرة, تقدري تختاري منهم انسب طريقة ليكي.
1- طريقة 16/8:
نظام الصيام ده بيعتمد انك متاكليش في اليوم لمدة 16 ساعة, وتاكلي خلال فترة 8 ساعات بس في اليوم, وده تقريبا النظام اللي احنا بنكون عليه في رمضان اننا بنصوم تقريبا 16 ساعة وبنفطر 8 ساعات, بس عشان نعملها في الايام العادية غير رمضان اسهل طريقة انك تفوتي وجبة الفطار, ومتاكليش فترة بالليل, ولكن ده طبعا مجرد اقتراح انتي ممكن تنفذيه على حسب وقتك انتي المهم انك تصومي 16 ساعة وتاكلي خلال ال 8 ساعات زي ما قولنا.
وبالنسبة للنساء الكبار في السن الافضل يغيروا الطريقة ويعتمدوا على نظام 15/9 او نظام 14/10, لان فترات الصيام القصيرة هتكون افضل ليهم بالنسبة لعملية التمثيل الغذائي عن البنات اللي سنهم اصغر.
واثناء فترة الصيام مسموح بالمشروبات بس ولكن تكون خالية من السكريات ومن اي سعرات حرارية.
2- طريقة 5/2:
الطريقة دي بتعتمد على التحكم في السعرات الحرارية, انك تاكلي كمية سعرات حرارية عادية لمدة 5 ايام في الاسبوع, وتقللي السعرات الحرارية وتاكلي نسبة محدودة يومين في الاسبوع, والمفروض انك تحافظي على سقف السعرات الحرارية ميزدش عن 500 سعر حراري خلال اليومين اللي هتقللي فيهم كمية السعرات, والايام اللي هتقللي فهيا السعرات تكون متباعدة مش ورا بعض, يعني ممكن مثلا اتنين وخميس.
3- طريقة The eat-stop-eat:
الطريقة دي ممكن اكتر الطرق صعوبة, وبتعتمد على اختيار يومين في الاسبوع تتوقفي فيهم عن الاكل ال 24 ساعة يعني متاكليش خلال اليوم كله, وبيسمح بس بالمشروبات الخالية من السعرات الحرارية خلال ال 24 ساعة.
4- طريقة المحارب:
طريقة المحارب بتعتمد انك تاكلي خلال فترة النهار كميات قليلة جدا من الاكلات الصحية اللي سعراتها الحرارية منخفضة زي الفاكهة والخضار, وبعدين تاكلي وجبة كبيرة جدا بالليل, يعني تقدري وجبة واحدة بس كبيرة, والطريقة دي كمان ممكن تكون صعبة شوية لكن اكيد مش بنفس صعوبة الطريقة اللي فاتت.
والانظمة دي مناسبة جدا للبنات اللي عايزين يخسوا بشكل كبير او اللي بيعانوا من زيادة كبيرة في الوزن الطرق دي هتساعدهم جدا لانها بتقلل نسبة السعرات الحرارية بشكل كبير خلال فترة الصيام, واهم حاجة عشان النظام ينجح انك تخلي بالك من كمية الاكل ومتاكليش كميات كبيرة, سواء في الايام العادية او الايام اللي المفروض تقللي فيها نسبة السعرات الحرارية.
والنظام بيساعد جدا على تقليل السعرات الحرارية بشكل سهل غير الانظمة التانية اللي بتعتمد انك تقعدي تحسبي عدد سعراتك بشكل يومي وده ممكن يكون صعب على كتير مننا, لكن هنا مش هتحتاجي تحسبي السعرات ولا هتحتاجي اكلات معينة تاكليها, انتي بكل بساطة بتاكلي بانتظام وبعدين بتنقطعي عن الاكل او بتصومي زي ما قولنا في الطرق فوق, وده اللي بيخلي النظام فعال لانه مش معقد وبسيط.
حمية رواد الفضاء لمدة 13 يوم هتساعدك على خسارة الوزن والتخلص من كل مشاكل المعدة
