الفرق بين الانواع المختلفة للشعر الكيرلي..واعرفي شعرك اي نوع فيهم
الشعر بيتكون بشكل اساسي من الكيراتين وده نوع من انواع البروتين المسئولة عن صحة الشعر بالاضافة لمجموعة بروتينات تانية موجودة في خلايا بصيلات الشعر, وكل البروتينات دي تعتبر جزء من جذع الشعرة وتكوينها وبتحتوي على ذرات الكبريت, ولما بيتحد ذرتين كبريت مع بعض بيعملوا رابطة ثنائية الكبريتيد وده اللي بيخلي الشعر يكون مفرود, لكن لو ذرتين الكبريت في نفس البروتين على مسافة او بعيد عن بعض فلما بيحاولوا انهم يعملوا ترابط بينهم البروتين بيحصل فيه انحناء وهو ده اللي بينتج عنه تجعد الشعر, والنهاردة هنعرف مع بعض انواع الشعر الكيرلي عشان تقدري تعرفي شعرك اي نوع منهم, وده هيساعدك انك تختاري منتجات الشعر المناسبة ليكي اكتر وتعرفي طرق العناية الصح بيه.
انواع الشعر الكيرلي:
1- النوع الاول: الشعر المفرود ال Straight hair:
هنبدأ الاول مع نوع الشعر المفرود اللي من غير تجعيد, وده يعتبر النوع الاول من انواع الشعر, بيكون دايما بيلمع ومرن اكتر في التعامل معاه من اي نوع شعر تاني, والنوع تقريبا بيكون مستحيل تجعيده او عمله كيرلي بسبب الزيوت الطبيعية اللي بتنتجها الغدد الدهنية في فروة الراس وبتنتقل من جذور الشعر للاطراف, والنوع ده يعتبر اكتر انواع الشعر دهنية.
2- النوع التاني: الشعر المموج ال Wavy hair:
الشعر المموج على خفيف ده يعتبر النوع التاني, وبيكون ما بين الشعر المفرود والكيرلي, وبيكون فيه لمعان اكتر من الشعر الكيرلي واقل من الشعر المفرود, لان كل ما الشعر هيبقى مجعد اكتر هيبدأ يقل فيه اللمعان, والشعر المموج او الويفي بيكون سهل انه يتعرض للتجعد والهيشان.
وهنلاقي النوع ده من الشعر لتلات انواع فرعية هو ال Wavy 2A وده بيكون سهل التحكم فيه انه ممكن تفرديه او تعمليه كيرلي, اما النوع التاني ال Wavy 2B والنوع التالت ال Wavy 2C بيكون التحكم فيهم اصعب من النوع الاول.
نصيحة للعناية بيه: زي ما قولنا ان الشعر المموج بيتعرض اكتر للتجعد والهيشان في الحالة دي هيكون ضروري استخدام منتجات حماية الشعر من التجاعيد والرطوبة عشان تحافظي على تموجات الشعر بشكل حلو.
شوفي من هنا 3 وصفات ماسكات من الشاي لشعر كيرلي يجنن تعمليهم في البيت بسهولة.
3- النوع التالت: الشعر المجعد ال Curly hair:
النوع التالت الشعر المجعد اللي بتكون فيه التجعيدة على شكل حرف S, معدولة او مقلوبة, واحيانا ممكن يكون على شكل حرف Z, وعدم الاهتمام الكافي بالنوع ده من الشعر ممكن يسبب هيشانه بسبب الرطوبة او تلفه.
نصيحة للعناية بيه: الشعر المجعد من اكتر انواع الشعر الحساسة وبيتغير بسرعة لو استخدمتي معاه منتجات كتير او تقيلة عليه, الافضل انك تستخدمي عليه كمية قليلة من منتجات تصفيف الشعر, وتختاري المنتج المناسب ليه, وعشان تضمني ان الشعر المجعد هيفضل زي ما هو ويحافظ على شكله اغسليه كويس, استخدمي البلسم, وحمام الكريم, وبعدها طبقي عليه منتج تصفيف الشعر المناسب.
4- النوع الرابع: الشعر الغريب ال Kinky hair:
الشعر المجعد اوي بالشكل ده بيكون حساس جدا, وهو اكتر انواع الشعر جفاف عشان كده بيكون معرض اكتر للتكسر, ومحتاج عناية خاصة, وفي اعتقاد غلط ان النوع ده من الشعر مش بينمو, لكن الحقيقة انه بينمو بنفس معدل انواع الشعر التانية, لكن لو ما اتعملناش معاه بشكل صح هيتكسر ويتلف اكتر من انواع الشعر التانية, ضروري اننا نتعامل معاه بحرص جدا, ونتجنب معاه استخدام المواد الكيميائية القاسية على الشعر.
نصيحة للعناية بيه: لانه زي ما قولنا الشعر ده بطبيعته بيكون جاف وبالتالي بيكون سهل التكسر, فهو بيحتاج لترطيب اضافي بشكل يومي, والمفتاح عشان نحافظ عليه صحي وبيلمع هو الترطيب في كل خطوة في العناية بيه, اول حاجة اغسلي الشعر بشامبو كريمي مرطب خالي من الكبريت والسلفات, استخدمي بلسم فائق الترطيب, وبعده حمام كريم غني, وصففيه بكريم غني بالزيوت, ودايما دوري على المرطبات الغنية اللي بتدي الشعر ترطيب مضاعف, بس اتجنبي الزيوت المعدنية والشمعية التقيلة اللي ممكن تخليه يلزق في بعضه ويبقى صعب التحكم فيه.