ازاي تنعمي رجلك وتخليها زي بشرة الاطفال بمكونات بسيطة من البيت

بقلمريهام محمود فيبشرة visibility3285

في فصل الصيف بشكل خاص لان بيكون معظم لبسنا الشوزات المفتوحة والسابوهات, بنحتاج ان رجلينا تكون ناعمة وشكلها حلو وبنبدأ نهتم بيها اكتر لو اهملناها شوية في فترة الشتا, والنهاردة هنساعدك في المهمة دي وهنقول لكل بنات حوا وصفات لتنعيم الرجل بمكونات بسيطة موجودة في كل بيت.

– تعالوا نبدأ الاول بشوية نصايح عامة:

1- اول حاجة كده لازم نعرفها ان الرجل محتاجة عناية يومية عشان تحافظي عليها, لازم تستخدمي الحجر الخفاف او اي اداة انتي متعودة تستخدميها لتنعيم الرجل.

2- ازالة الجلد الميت من الرجل اثناء الشاور او بعده, عشان يكون الجلد طري ويبقى اسهل في الازالة, استخدمي حركات دائرية عشان تديكي نتايج افضل, وبعدها اشطفي رجلك بالمية ونشفيها, ورطبيها بكريم مرطب.

3- لو هتحملي حمام للرجل او هتنقعيها في مية الافضل تكون مية دافية او باردة, لكن مش سخنة اوي لانها ممكن تسبب جفاف الجلد.

4- استخدمي مقشر لازالة الجلد الميت, ياما تشتري سكراب جاهز من السوق, او تعمليه في البيت جربي مقشر العسل والملح, او السكر وزيت الزيتون, او مقشر القهوة.

5- جربي تستخدمي زيت جوز الهند او زبدة الشيا لترطيب الرجل, او ممكن تخلطيهم مع بعض بنسبة 2:3 يعني لو مثلا هتحطي معلقتين زيت جوز هند حطي 3 معالق زبدة شيا, ادهني الرجل بالخليط ده بالليل والبسي شراب قطن ناعم, عشان توصلي لافضل النتايج.

وصفات لتنعيم الرجل
وصفات لتنعيم الرجل

– وصفات لتنعيم الرجل:

1- صودا الخبز “الكربوناتو”:

المكونات:

3 معالق كبيرة من صودا الخبز.

1 معلقة كبيرة مية.

الطريقة:

اخلطي صودا الخبز مع المية لحد ما تتكون عندك عجينة, دلكي الكعب والصوابع والرجل كلها بالخليط, ولو الجلد جاف اوي ممكن تستخدمي الحجر الخفاف في التدليك, استمري في التدليك لمدة دقايق, بعدها اشطفي رجلك بمية دافية ونشفيها, وادهنيها كريم مرطب.

طريقة تانية لاستخدام صودا الخبز, وهي حمام القدم, بكل بساطة املي طبق كبير بمية دافية وضيفي لها 3 معالق كبيرة من صودا الخبز, قلبيها, انقعي رجلك في المية لمدة 10 دقايق, وبعدها اشطفيها بالمية ورطبيها بكريم مرطب.

وصفات لتنعيم الرجل
وصفات لتنعيم الرجل

2- خل التفاح:

المكونات:

كوباية من خل التفاح.

كوباية غسول الفم ليسترين.

2 كوباية مية دافية.

الطريقة:

اخلطي المكونات كلها في طبق كبير, انقعي رجلك في الخليط لمدة متقلش عن 10 دقايق ومتزدش عن 20 دقيقة, وبعدين نشفيها, وادعكيها بالحجر الخفاف.

طريقة تانية باستخدام الخل, جيبي قطعة قطن اغمسيها في الخل وحطيها على كعب الرجل او اي منطقة جافة في الرجل, وثبتيها بلاصق طبي عشان متتحركش وممكن تلبسي عليها شراب عشان تثبتيها اكتر, ونامي بيها طول الليل, والصبح ادعي الرجل بالحجر عشان تتخلصي من الجلد الميت.

وصفات لتنعيم الرجل
وصفات لتنعيم الرجل

3- زيت الزيتون:

زيت الزيتون يعتبر مرطب طبيعي هايل جدا لترطيب الجلد الجاف, كل اللي هتعمليه ادهني رجلك قبل النوم بزيت الزيتون, والبسي شراب قطن, وممكن قبل ما تلبسي الشراب تدلكيها شوية بالزيت, ونامي بيه واغسليه الصبح بالمية, لو انتظمتي عليها بشكل يومي هتديكي نتايج فعالة جدا ودايمة.

وصفات لتنعيم الرجل
وصفات لتنعيم الرجل

4- عسل النحل:

الخطوة الاولى في وصفة العسل هاتي طبق كبير حطي فيه 4 لتر مية دافية وضيفي لهم كوباية عسل, وانقعي رجلك في المية لمدة 15 دقيقة.

بعدها اعملي سكراب عبارة عن:

¼ كوباية سكر بني او سكر ابيض عادي.

2 معلقة كبيرة زيت جوز الهند.

2 معلقة كبيرة عسل.

3 نقط من زيت النعناع.

الطريقة:

اخلطي كل المكونات مع بعض ودلكي الرجل كلها كويس, بعدها اشطفي الرجل بالمية ونشفيها, ورطبيها بكريم مرطب.

وصفات لتنعيم الرجل
وصفات لتنعيم الرجل

شوفي من هنا وصفات طبيعية لتقشير الجلد.

5- اللبن:

المكونات:

4 كوبايات لبن كامل الدسم.

2 معلقة كبيرة كربوناتو.

كام نقطة من اي نوع زيت عطري مفضل عندك.

الطريقة:

دفي اللبن على النار شوية, بعدها صبيه في طبق كبير وانقعي رجلك فيه لمدة 10 دقايق, بعدها جيبي الكربوناتو دلكي بيها الرجل, وركزي على المناطق الخشنة اوالجافة, وبعدها رجعي رجلك تاني في اللبن لمدة 5 دقايق كمان, بعدها اغسلي رجلك بالمية ونشفيها, ورطبيها بالكريم المرطب.

وصفات لتنعيم الرجل
وصفات لتنعيم الرجل

6- زيت النعناع:

المكونات:

كوباية شوفان.

كوباية دقيق ذرة.

¼ كوباية ملح بحر خشن.

معلقة صغيرة من زيت النعناع.

الطريقة:

اخلطي كل المكونات مع بعض, وبلي رجلك بالمية ودلكيها بالخليط لمدة دقايق, بعدها اشطفيها بالمية, ورطبيها بكريم مرطب.

وصفات لتنعيم الرجل
وصفات لتنعيم الرجل

7- الموز:

اهرسي الموز وحطيه على الرجل زي الماسك, وسيبيه 20 دقيقة, وبعدها اغسليه بمية فاترة, وادهني الرجل بالكريم المرطب.

وممكن تستخدمي قشر الموز, افركي الرجل بالجزء اللي جوه من القشر, سيبيه 20 دقيقة, وبعدها اغسلي رجلك ورطبيها.

وصفات لتنعيم الرجل
وصفات لتنعيم الرجل

8- جل صبار الالوفيرا:

هنا هنستخدم جل الصبار بس من غير اي اضافات تانية, بعد الحمام ادهني رجلك بجل الصبار, وممكن تستخدميه كمرطب بعد اي وصفة من الوصفات اللي احنا قولناها او اي سكراب, بعد ما تغسليها ادهنيها بجل الصبار للترطيب والبسي شراب ونامي بيه.

وصفات لتنعيم الرجل
وصفات لتنعيم الرجل

9- الفازلين:

كل اللي هتحتاجية انك هتدهني الرجل بطبقة سميكة من الفازلين, والبسي شراب ونامي بيه, والصبح افركي الرجل بالحجر الخفاف عشان تتخلصي من اي جلد ميت.

وصفات لتنعيم الرجل
وصفات لتنعيم الرجل

10- معجون الاسنان:

معجون الاسنان كمان من الحاجات اللي بتساعد على تنعيم الرجل, وازالة الجلد الميت, لكن تحذير لو رجلك فيها شقوق عميقة متستخدميش المعجون لانه بيحتوي على المنثول وممكن يسبب التهاب او يحرقك.

هاتي فرشة اسنان قديمة وحطي عليها المعجون وافركي بيها الرجل والضوافر لانه كمان بيساعد على تبييض الضوافر, حتى كمان ممكن يعالج البثور اللي في الرجل, حطي طبقة من المعجون على مكان البثور وسيبيه كام ساعة, وبعدها امسحية بفوطة مبلولة, وكرريها اكتر من مرة في اليوم.

وصفات لتنعيم الرجل
وصفات لتنعيم الرجل

11- لف الرجل بالبلاستيك لتقشيرها:

الطريقة ده من الطرق المعروف ان ليها فعالية كبيرة في تنعيم الرجل, وبتخلي كل الجلد الميت يقشر من على الرجل.

المكونات:

4 لتر مية دافية.

كوباية ملح انجليزي.

من 10 – 15 قرص اسبرين.

عصير ليمونة.

غلاف بلاستيك, وشراب.

الطريقة:

اول حاجة هاتي طبق كبير حطي فيه المية وضيفي لها الملح, انقعي رجلك فيها لمدة 30 دقيقة, دلوقتي هاتي الاسبرين حطيه في طبق وحطي عليه عصير الليمون لحد ما الاسبرين يدوب ويتشكل عندك عجينة سميكة, طلعي رجلك من المية ونشفيها, وحطي عليها عجينة الاسبرين, ولفيها بغلاف بلاستيك من اللي بنستخدميه لتغليف الاكل, والبسي عليه شراب قطن, سيبيها ملفوفة لمدة من 4 – 6 ساعات, بعدها اغسلي رجلك بالمية والصابون, نشفيها وادهنيها بطبقة من الكريم المرطب والبسي الشراب تاني, والافضل انك تسيبيها طول الليل, كرري الطريقة دي بشكل يومي هتلاحظي ان الجلد بدأ يقشر ورجلك هتبقى ناعمة جدا زي بشرة الاطفال.

وصفات لتنعيم الرجل
وصفات لتنعيم الرجل

وصفات لتبييض الرجل في اسبوع واحد بس ! اعرفيها معانا

وصفات لتبييض الرجل في اسبوع واحد بس