5 حاجات هتحصلك لو قضيتى أسبوع من غير تكنولوجيا
اسلوب حياتنا اختلف دلوقتى وبقينا سواء فى الشغل او فى البيت التكنولوجيا محاوطانا فى كل حتة، وبقت أساسية فى كل تعاملاتنا اليومية للدرجة اللى ممكن نقول انه مستحيل نستغنى عنها، لكن فى مرحلة معينة بيبقى لازم تفصلى من كل الاجهزة و الموبايل واللابتوب و النت و الضغط العصبي اللى بيسببوه و تبدأى تسترخي وتفصلي، بعيد عن الفيسبوك والإيميلات و الانستجرام وغيرهم، واحنا فى المقال ده هنساعدك، فى المقال ده بنات حوا هيقولولك على 5 حاجات هتحصلك لو قضيتى أسبوع من غير تكنولوجيا ..
5 حاجات هتحصلك لو قضيتى أسبوع من غير تكنولوجيا
1- هتتعلمى تفضي دماغك :
انه مايبقاش فى طريقة تفتحي بيها إيميلاتك او تدخلي بيها على النت غير لما تكونى انتى بتتعمدي انك ماتفتحيهوش، وكأنك مجبرة على انك ماتفتحيهوش لأنه ببساطة مفيش طريقة تفتحي نت او تقعدي من خلالها على الموبايل هنا بتبدأى تدوري على حاجة تانية تسليكى بعيد عن دوشة وقلق الشغل، وفى المرحلة دى بتبدأ دماغك تفصل وتفضى من الشغل و التقرير اللى أتأخر والتاسكات اللي عليكى وهتلاقى نفسك بقيتى اهدأ وحاسة بنوع من السلام الداخلى ومش هتفكرى فى حاجة زي يا ترى هتشوفي فيلم إيه النهاردة، وده هيديكى إحساس بالهدوء والسعادة .
2- هتتعلمى تعيدي ترتيب أولوياتك :
بمجرد ما ذهنك يصفى، هتلاقي نفسك بقيتي تفكرى أحسن وبتفكري يا ترى ايه هى الحاجات المهمة فعلا في حياتك، فلما تبعدي عن التكنولوجيا والموبايل ده هيخلق لك وقت اكتر وهادي تقدري تفكري فيه كويس و تعيدى ترتيب كل حاجة في حياتك حسب أهميتها- بعيدا عن الشغل- ، زي انك مثلا تعيدى علاقتك مع أصحابك، تكلمى قرايبك اللي ماكلمتهومش من زمان، تخرجي نفسك الخروجة اللي من زمان نفسك فيها وهكذا ..
3- هتقضي وقت مع الناس اللى بتحبيهم :
طبعا ممكن تشوفي الناس اللي بتحبيهم وتقضي وقت معاهم كل يوم ، لكن بيبقى كل واحد فيهم ماسك موبايله وقاعد باصصله وتقريبا ماحدش بيتكلم مع التاني مش كده؟ ويمكن ساعات لما بتتجمعوا تلاقي حد جايب لابتوب معاه وقاعد بيشتغل!
لكن لما تروحوا مكان مافيهوش استخدام نت او تليفون ولو ده مش متاح قرروا انكم تقعدوا سوا وتمنعوا التليفونات و اللابتوبات ، او اقولك على حل أحسن، افصلي النت خالص في الكام ساعة اللي انتم قاعدينهم مع بعض، هتلاقيهم سابوا التليفونات من ايديهم و ابتديتوا تتكلموا سوا و تفتكروا حاجات قديمة وتضحكوا و تقضوا وقت حلو، ماتخليش ابدا حتة جهاز يبقى مهم اكتر من الناس اللي بتحبيهم، وانتوا قاعدين مع بعض اتخلى عن التكنولوجيا خالص.
4- هتتعلمى تسترخي :
لما تتخلى عن التكنولوجيا هتتعلمى حاجة مهمة اوى، وهى انه في حاجات تانية ليها اولوية غير الشغل، الحاجة دي هى انتى، لازم تتعلمى تحطى صفاء ذهنك وراحة بالك من أهم الأولويات وده هيحصل بانك في البداية تسترخي وتريحي أعصابك، دلعي نفسك بحمام سخن طويل تسترخي فيه وتصفي ذهنك، اقري رواية بتحبيها او رواية جديدة، اطبخى او حتى اقعدى أتأملي المنظر من البلكونة .. المهم تسترخي و تريحى اعصابك وده مش هيحصل الا لما تسيبي الموبايل من ايدك.
5- هتتعلمى تفكري بإبداع :
لما تبعدى عن التكنولوجيا، ده هيساعدك تفكري بإبداع أكتر خصوصا لو شغلتك بتحتاج منك انك تكوني creative وتطلعي بأفكار طول الوقت.. لأنه هيبقى ذهنك أصفي وبالتالي هتقدري تفكري أحسن و كل حاجة من حواليكي هتلهمك.
