17 نوع اكل بتمنع شيخوخة البشرة وبتحافظ عليها شباب وصحية

ريهام محمود
ريهام محمود
في
بشرة
2908

جلدنا هو انعكاس لصحتنا, اي حاجة بناكلها تأثيرها بيظهر على البشرة على طول, ولان شيخوخة البشرة بتبدأ من جوه الجسم, فمنطقي جدا اننا نبدأ في الاهتمام في ببشرتنا من جوه لبره من خلال اكل الاطعمة الصحية اللي تساعدنا اننا نحافظ على بشرتنا, والنهاردة من خلال موضوعنا هنقولك انواع اكل بتمنع شيخوخة البشرة وبتحافظ عليها شباب وصحية.

انواع اكل بتمنع شيخوخة البشرة:

1- الاسماك الدهنية:

الاسماك اللي فيها نسبة عالية من الاحماض الدهنية الاوميجا 3 زي “السلمون, الماكريل, الرنجة, السردين, التونة”, ضرورية جدا لصحة البشرة, لانها بتحافظ على مرونة ورطوبة البشرة, وبتمنع الالتهاب, والاسماك دي تعتبر كمان مصدر كبير جدا لفيتامين E المضاد للاكسدة, وغنية بالزنك, وده المعدن اللي بيساعد على شفاء الجروح, والتخلص من حب الشباب وتهيج البشرة.

انواع اكل بتمنع شيخوخة البشرة 1
انواع اكل بتمنع شيخوخة البشرة 1

2- المكسرات:

زي الاسماك بالظبط المكسرات غنية بالاحماض الدهنية الاوميجا 3, والزنك, وفيتامين E, بالاضافة انها بتحتوي كمان على فيتامينات ومعادن تانية بتساعد انها تحافظ على البشرة شباب وصحية, زي مجموعة فيتامين B بما فيهم الفولات اللي بيساعد على منع التهاب الجلد, والسيلينيوم اللي يعتبر مضاد للاكسدة, وفيتامين C اللي ليه خصائص مضادة للشيخوخة, والجوز مفيد بشكل خاص مع انواع المكسرات التانية زي اللوز والكاجو اللي بيجوا بعده في الفايدة.

انواع اكل بتمنع شيخوخة البشرة 2
انواع اكل بتمنع شيخوخة البشرة 2

3- الافوكادو:

الافوكادو من انواع الاكل الغنية جدا بالدهون الصحية, وده بيساعد على تحسين مرونة البشرة ورطوبتها, كمان غنية جدا بالكاروتينات اللي بتحمي البشرة من اشعة الشمس, ولكن اكتر حاجة بتميز الافوكادو انها بتحتوي على عنصر D-mannoheptulose ودي مادة كيميائية طبيعية فريدة من نوعها بتساعد على تحفيز انتاج الكولاجين في البشرة.

انواع اكل بتمنع شيخوخة البشرة 3
انواع اكل بتمنع شيخوخة البشرة 3

4- الشاي الاخضر:

الشاي الاخضر من الحاجات المفيدة جدا لصحة البشرة لانه غني بمادة البوليفينول ومضادات الاكسدة اللي بتحمي البشرة من اضرار اشعة الشمس, وبيقلل من احمرار الجلد ومنع الالتهاب, لكن بالرغم من ذلك ضروري جدا اننا نستخدم واقي من الشمس عشان يحمي البشرة لان لازم يكون في عناية داخلية وخارجية لان الاتنين بيكملوا بعض.

انواع اكل بتمنع شيخوخة البشرة 4
انواع اكل بتمنع شيخوخة البشرة 4

5- الزبادي:

الزبادي غنية بالبروبيوتيك اللي بتساعد في الحفاظ على شباب البشرة وبتمنع الاحمرار والتهيج وحب الشباب, وبتحتوي على بكتيريا جيدة بتمنع التهاب الامعاء اللي ممكن يكون مرتبط بكتير من المشاكل الجلدية.

ممكن كمان مع اكل الزبادي تستخدميها بشكل موضعي كماسك على البشرة لتجديد شبابها, لان حمض اللاكتيك اللي موجود في الزبادي بيحتوي على خصائص مضادة للشيخوخة وبتساعد على تقشير البشرة وبتقلل الخطوط الرفيعة وبتخلي البشرة صحية.

انواع اكل بتمنع شيخوخة البشرة 5
انواع اكل بتمنع شيخوخة البشرة 5

6- عسل النحل:

العسل مضاد للبكتيريا وبيحتوي على مضادات الاكسدة ويعتبر مرطب طبيعي للبشرة, وعلى الرغم ان ماسكات العسل مفيدة جدا لمنع التهابات البشرة وعلاج حب الشباب وترطيب البشرة الجافة, اكل العسل كمان مفيد جدا وبينعكس بشكل ايجابي على البشرة.

انواع اكل بتمنع شيخوخة البشرة 6
انواع اكل بتمنع شيخوخة البشرة 6

7- التوت:

معظم انواع التوت مفيدة جدا لصحة البشرة, لكن التوت البري شكل خاص مفيد جدا للبشرة, لانه غني جدا بمضادات الاكسدة اللي بتساعد على محاربة ضرر الجذور الحرة واصلاح البشرة من جوه, وعنصر الانثوسيانين الموجود في التوت البري بيساعد على حفظ توازن الكولاجين في البشرة, وده بيحافظ على البشرة شباب وصحية لاطول فترة.

انواع اكل بتمنع شيخوخة البشرة 7
انواع اكل بتمنع شيخوخة البشرة 7

8- البرتقان:

في سببين مهمين جدا ورا اهمية البرتقان للبشرة, انه غني بفيتامين C والمية اللي بتساعد على ترطيب البشرة من جوه, وفيتامين C اللي بيحتوي على مضادات الاكسدة اللي بتلعب دور كبير في انتاج الكولاجين اللي بدوره بيحافظ على شباب ونضارة البشرة وبتمنع التجاعيد.

انواع اكل بتمنع شيخوخة البشرة 8
انواع اكل بتمنع شيخوخة البشرة 8

9- الرمان:

زي البرتقان بالظبط الرمان غني بفيتامين C المفيد جدا لصحة الجلد, بالاضافة الى ان الرمان بيحتوي على حمض الاجيك والبرياليجاجين اللي بيزود قدرة الجسم انه يحافظ على الكولاجين, وحمض اللاجيك بيحارب الضرر من الجذور الحرة, وبيبطء من انهيار الكولاجين, مع قوة فيتامين C في تعزيز الكولاجين الاتنين هيكون ليهم تأثير هايل جدا على شباب وصحة البشرة.

انواع اكل بتمنع شيخوخة البشرة 9
انواع اكل بتمنع شيخوخة البشرة 9

10- الطماطم:

الطماطم بجانب انها كمان من انواع الاكلات الغنية بفيتامين C, بتحتوي على الكاروتينات الرئيسية زي الليكوبين, اللوتين, الفا كاروتين, وبيتا كاروتين, ومعروف ان الكاروتينات من مضادات الاكسدة اللي بتحمي البشرة من اضرار اشعة الشمس وبتمنع التجاعيد, وكمان مضادة للاتهابات بشكل طبيعي.

وعشان ناخد من الطماطم اكبر فايدة لما تيجي تطبخيها الافضل تستخدمي معاها الدهون الصحية زي زيت الزيتون, بدل ما تاكليها خام, لان الطماطم المطبوخة بتساعد الجسم على امتصاص الليكوبين بشكل اكبر.

انواع اكل بتمنع شيخوخة البشرة 10
انواع اكل بتمنع شيخوخة البشرة 10

11- السبانخ والكرنب:

الخضروات الورقية الخضرا زي السبانخ وورق الكرنب غنية بالفيتامينات المفيدة للجلد, زي فيتامين A, C, و E, فيتامين A بيساعد في التحكم في دهون البشرة, وفيتامين C بيعزز انتاج الكولاجين, وفيتامين E بيحمي من الاضرار التأكسدية, وكلهم مع بعض بيساعدوا على الحفاظ على البشرة رطبة وخالية من التجاعيد والبقع, كمان السبانخ والكرنب يعتبروا مضادات للالتهابات.

انواع اكل بتمنع شيخوخة البشرة 11
انواع اكل بتمنع شيخوخة البشرة 11

12- الفلفل:

من بين كل انواع الفاكهة والخضروات, الفلفل الاحمر والاصفر بيحتوا على نسبة عالية جدا من فيتامين C, وغني كمان بالفيتامينات المفيدة للجد زي B6, و B9 “الفولات”, وكمان الكاروتينات, ومعروف ان B6 بيمنع وبيحارب الامراض الجلدية زي التهاب الجلد, والاكزيما, وحب الشباب الهرموني, وحمض الفوليك بيحسن من صحة البشرة.

وتقدري تاخدي كل المواد الغذائية من كل انواع الفلفل مش بس الاحمر والاصفر, ولكن الاحمر والاصفر بشكل خاص فيهم نسبة فيتامينات بشكل اكبر.

انواع اكل بتمنع شيخوخة البشرة 12
انواع اكل بتمنع شيخوخة البشرة 12

13- الاكلات المخمرة:

الزبادي مش الاكل المخمر الوحيد المفيد لصحة البشرة, كل الاكلات المخمرة زي المخلل واللبن الرايب بتحتوي على البروبيوتيكات او البكتيريا الجيدة اللي مش بس بتعمل توازن للبكتيريا السيئة في المعدة, لكن كمان بتساعد على تهدئة التهابات البشرة, وبتمنع التجاعيد وبتحافظ على البشرة نضرة من خلال تحسين امتصاص العناصر الغذائية من كل حاجة بتاكليها, وكمان بتحتوي على حمض اللاكتيك المكافح للشيخوخة.

انواع اكل بتمنع شيخوخة البشرة 13
انواع اكل بتمنع شيخوخة البشرة 13

14- الكركم:

الكركم معروف بفوايدة الكبيرة جدا للبشرة لانه غني بمضادات الالتهابات, وبيساعد على شفاء حب الشباب وتهدئة احمرار البشرة, وبيمنع الضرر التأكسدي للجلد, واصلاح ضرر اشعة الشمس, وكمان بيمنع سرطانات الجلد.

انواع اكل بتمنع شيخوخة البشرة 14
انواع اكل بتمنع شيخوخة البشرة 14

15- الكاكاو الخام:

الكاكاو الخام بيحتوي على ريسفيراترول وده يعتبر مضاد قوي للاكسدة, بيحمي وبيصلح البشرة من ضرر اشعة الشمس, وده بيساعد على منع علامات الشيخوخة المبكرة, والكاكاو كمان يعتبر من اكبر مصادر المغنيسيوم, وهو معدن مهديء بيساعد على تقليل تهيج الجلد.

والكاكاو المحمص والشوكولاتة الغامقة كمان بتحتوي على نسبة من الريسفيراترول ولكن مش بنفس النسبة اللي في الكاكاو الخام, عشان كده الافضل استخدام الكاكاو الخام واضافته لمشروبات السموزي او الزبادي عشان تاخدي منه اقصى فايدة.

انواع اكل بتمنع شيخوخة البشرة 15
انواع اكل بتمنع شيخوخة البشرة 15

16- الشوفان:

الشوفان غني بالمنجنيز, هو يمكن يكون معدن مش مرتبط بشكل مباشر بصحة الجلد, ولكن المنجنيز بيساعد على امتصاص الفيتامينات والمعادن الاساسية زي الكولين والبيوتين وفيتامين C اللي بيساعدوا على الحفاظ على مرونة الجلد ومحاربة الجذور الحرة, الشوفان كمان بيحتوي على الزنك اللي بيساعد على شفاء الجلد, والسيلينيوم المضاد للاكسدة.

انواع اكل بتمنع شيخوخة البشرة 16
انواع اكل بتمنع شيخوخة البشرة 16

17- زيت الزيتون:

زيت الزيتون واحد من اكتر الزيوت المفيدة للصحة كلها بشكل عام, ومن ضمنها انه بيحافظ على صحة البشرة لانه بيحتوي على احماض اوميجا 3 الدهنية والبوليفينول, وزي ما قولنا ان الاوميجا 3 بتحافظ على مرونة ورطوبة الجلد, والبوليفينول بيحمي البشرة من الاضرار التأكسدية, وبيحارب الالتهاب.

انواع اكل بتمنع شيخوخة البشرة 17
انواع اكل بتمنع شيخوخة البشرة 17

مين جربت تمشي على اكل صحي فترة وشافت بعدها فرق في بشرتها؟ تقولنا النتيجة وتقولنا على انواع الاكل اللي انتظمت عليها.

7 حيل جمالية هتجدد بشرتك وتبينها اصغر

حيل جمالية لتجديد البشرة
حيل جمالية لتجديد البشرة

مقالات متعلقه

علاج الايورفيدا للبشرة في البيت في 3 خطوات سهلة

علاج الايورفيدا للبشرة في البيت في 3 خطوات سهلة

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

فتحي بشرتك باستخدام القهوة سريعة التحضير

فتحي بشرتك باستخدام القهوة سريعة التحضير