اتميزي والبسي اكسسوارات بستايل بوهيمي
الاكسسوارات البوهيمي جيبسي من الستايلات المختلفة جدا اللي بتتميز بالاحجار الكريمة بالحجم الكبير وبألوان مختلفة, واحجار الفيروز اللي بتاخد العين وتلفت الانتباه لاي بنت لبساها, والنهاردة في موضوعنا هنشوف مجموعة اكسسوارات بوهيمي, عشان تستوحي منها افكار ازاي تلبسيه.
الاكسسوارات البوهيمي غالبا بتعتمد على الاحجار الكريمة بألوان مختلفة وجذابة جدا, لكن يعتبر من اكتر الالوان الشائعة ليه هو اللون الازرق وبيفضلوا كتير من البنات, سواء في الخواتم او الحلقان او الاساور او العقد, وفي كمان ستايل الاكسسوارات البوهيمي السيلفر, فأكيد لو عايزة تبقي مميزة ومختلفة هتختاري الاكسسوارات بالستايل البوهيمي.
وزي ما هنشوف انتي ممكن تلبسي الاكسسوارات بأكتر من طريقة, ممكن تلبسي اكتر من خاتم في ايد واحدة, او تكتفي بواحد كبير او اتنين في الايد الواحدة, وغالبا الستايل البوهيمي في الاكسسوارات بيعتمد على لبس اكتر من خاتم في الايد الواحدة, ونفس الكلام بينطبق على الاساور بيعتمد على لبس مجموعة اساور مع بعض.
وستايل الاكسسوارات البوهيمي بيمشي جدا مع الفساتين الطويلة الناعمة بلون واحد زي الاسود او بألوان الباستيل او مع الفساتين المطبوعة, ممكن كمان تلبسيها مع البلوزات الواسعة بالستايل البوهيمي, او مع السراويل الواسعة, وبننصحك تختاري اكتر من نوع او شكل من الاكسسوارات البوهيمي في اللوك الواحد.