18 عادة يومية هتساعدك على التخلص من ألم الجسم
ألم الجسم من اول واكتر الحاجات اللي بيشتكي منها معظم الناس على مستوى العالم, وده بيرجع لاسلوب حياتنا الغلط والضغط اللي ممكن تخلي الجسم دايما مش مرتاح, لكن في حاجات ممكن نعملها في روتينا اليومي كل يوم ممكن انها تساعد في تخفيف الالم, وده اللي هنعرفه النهاردة مع بعض هنقولكم على عادات صحية لعلاج ألم الجسم.
عادات صحية لعلاج ألم الجسم:
– الصداع:
1- اتجنبي التركيز في اي شاشة لفترات طويلة:
اجهاد العين يعتبر من اكتر الاسباب اللي ممكن تسبب الصداع المرتبط بقعدتنا على الكمبيوتر فترات طويلة, لان عضلات هتشغليها لفترة طويلة ومن ضمنها عضلات العين هتيجي في النهاية وهتتعب, وعشان تتجنبي ده اعملي طريقة 20-20-20 يعني كل 20 دقيقة ابعدي عينك عن الشاشة ودوري على حاجة بعيد عنك بمسافة 20 قدم وبصي لها لمدة 20 ثانية, ده يعتبر تمرين مفيد جدا بيساعد انه يريح عضلات العين.
2- قللي التعرض للشمس:
التعرض لاشعة الشمس ممكن يأدي لتوسيع الاوعية الدموية في المخ ورفع درجة حرارة بشرتك, وده ممكن يسبب ألم, وتهيج في العين, وفي النهاية هيأدي انه يجيلك صداع, عشان كده الافضل لو هتخرجي في الشمس البسي قبعة واستخدمي نضارة الشمس عشان تحمي نفسك من الصداع.
3- خدي شاور دافي:
الشاور الدافي ممكن يساعد على ارخاء العضلات المتوترة وده ممكن يخفف الصداع, وممكن كمان استخدام كمادات المية الدافية او اربة المية الدافية يقوم بنفس المهمة.
4- اتجنبي التدخين:
النيكوتين اللي موجود في السجاير هو مادة فعالة موجودة في الاوعية, وده معناه انه النيكوتين ممكن يغير من حجم الاوعية في المخ, وده هيأدي في النهاية للصداع, ودخان السجاير كمان ممكن يسبب صداع عن طريق التسبب في حدوث حساسية عن طريق تهيج الانف والحلق.
5- قللي من الكافيين:
الكافيين بكميات صغيرة ممكن يساعد على تخفيف الصداع, وبالتالي هنلاقي انه ممكن يدخل في بعض ادوية الصداع, لكن استهلاك كميات كبيرة من الكافيين سواء القهوة او الشاي او المشروبات الغازية هيخليكي مدمنة عليه, والباحثين اكتشفوا ان الصداع ممكن يبقى واحد من اعراض انسحاب الكافيين من الجسم, وده بيحصل تقريبا مع 50% من الاشخاص اللي متعودين يشربوا قهوة بشكل منتظم.
6- اشربي كمية مية كفاية:
الجفاف يعتبر سبب من اسباب الصداع, عشان كده ضروري تحافظي على رطوبة الجسم بشكل صح, لكن حطي في اعتبارك ان الافراط في الترطيب ممكن يأدي لنقص الصوديوم في الدم, ودي حالة بيكون فيها الصوديوم اللي موجود في الدم مخفف جدا, وده ممكن يأدي للصداع والغثيان والانتفاخ, وده هيخليكي ممكن تخلطي بينه وبين اعراض الجفاف, عشان كده لازم نشرب كميات مية بشكل صح, وممكن نمشي على نظام شرب المية زي اللي موجودة قدامنا في الصورة.
– ألم الرقبة:
1- مارسي تمارين لتقوية عضلات الرقبة:
ألم الرقبة والكتفين من اكتر انواع الالم اللي ممكن اشخاص كتير يشتكوا منها, وافضل طريقة عشان تتخلصي من الالم ده هي تمارين تقوية عضلات الرقبة, ممكن نعمل تمرين زي اللي قدامنا في الصورة, تقفي بشكل مستقيم باصه قدامك وترجعي راسك لورا وبعدين ترجعي للوضع الاول, وبعدين تنزليها لتحت.
2- اقعدي بشكل صح:
وانتي قعدة ضروري انك تقعدي بشكل مستقيم وضهرك مفرود, الافضل يكون الكرسي بضهر عشان تسندي عليه وتبقى قعدتك مريحة, ولو قعدة على جهاز كمبيوتر ظبطي ارتفاعه بحيث انك متحتاجيش تنزلي رقبتك لتحت وانتي شغالة عليه, يعني خليه في مستوى نظرك.
3- مارسي اليوجا:
اليوجا بتساعد على تقوية عضلات الرقبة وعضلات الضهر وتخفيفها من اي توتر, ممكن تجربي اي تمرين من اللي موجودين في الصورة, او اي تمرين يوجا انتي تفضليه.
4- تحسين عادات النوم:
النوم على الضهر يعتبر افضل وضعية للنوم, ويجي بعده على طول النوم على الجنب.
وعشان تدعمي ضهرك بشكل افضل, ممكن تستخدمي فوطة تبرميها وتحطيها تحت الركبتين, واتجنبي النوم على المعدة, ومتستخدميش اكتر من مخدة واحدة للنوم عليها, ومتستخدميش مخدة سميكة, والافضل انك تستخدمي مخدة طبية خاصة عشان تنامي بشكل مرتاح اكتر.
– ألم الضهر:
1- حافظي على شكل الجسم وانتي قعدة:
زي ما قولنا فألم الرقبة ان القعدة الغلط بتسبب ألم الرقبة كمان بتسبب ألم الضهر, عشان كده حاولي انك تقعدي بشكل مستقيم, لان ده بيساعد على تقليل الضغط على العمود الفقري وبالتالي مش هيحصل ألم.
2- مارسي تمارين التمدد اللي بتدعم اسفل الضهر:
تمارين التمدد زي تمرين Lying spinal twists, وتمرين Psoas اللي هي قدامنا في الصورة من تمارين التمدد اللي بتحافظ على الضهر من غير اي ألم.
3- اعملي تمرين تمدد لاوتار الركبة:
اوتار الركبة ممكن انها تساعد على تقليل ألم الضهر, عن طريق عمل اطالة عضلات الفخد, وتمرين المنطقة دي هبتساعد على تخفيف الضغط على اسفل الضهر وتخفيف الالم.
4- اعملي تمرين الكوبرا Cobra pose:
التمرين ده بيساعد على تمدد عضلات الكتفين, وبيزيل صلابة اسفل الضهر, وبيقوي العمود الفقري.
5- مارسي السباحة:
السباحة وغيرها من التمارين المائية من التمارين اللي بتساعد على تقوية عضلات الضهر والعضلات الداخلية, لانها بتاخد الاجهاد من المفاصل.
– ألم القدم:
1- البسي احذية مريحة:
اثناء المشي او الوقوف او الجري, ممكن يحصل ضغط على القدمين ويسبب الالم, ولبس الاحذية الغير مريحة او اللي مقاسها مش مظبوط للرجل ممكن يزود المشكلة, عشان كده مهم جدا اختيار الشوز المناسب عشان هيساعد في تقليل الاصابات ومنع مشاكل القدم.
2- اعملي تمرين تمدد لاصابع القدم:
اقعدي على كرسي ورجلك اليمين فوق فخدك الشمال, او على الارض وخلي الرجل على الارض, حطي صوابع ايدك الشمال ما بين صوابع رجلك اليمين, واضغطي بصوابعك ايدك على صوابع الرجل لمدة 10 ثواني, وبعدين خففي الضغط شوية لمدة 10 ثواني كمان.
3- اعملي تدليك للقدم:
حطي كورة تنس تحت رجلك بالظبط تحت الصوباع التاني واقفي عليه, وابدأي حركي رجلك على الكورة ببطء لمد 3 دقايق, وكرري التمرين مع الرجل التانية, ولو مش متوفر كورة تنس ممكن تستخدمي ازازة مية صغيرة وتحركي رجلك عليها بنفس الطريقة.