طرق عمل سيروم بمكونات طبيعية لكل انواع البشرة

بقلمريهام محمود فيبشرة visibility2796

اي بشرة مهما كان نوعها بتحتاج للترطيب, والسيروم بيساعد على تجديد الزيوت الطبيعية للبشرة وبيحافظ عليها رطبه وصحية, لان من اهم اساسيات صحة البشرة هي الترطيب, والنهاردة هنعرف مع بعض طرق عمل سيروم البشرة بمكونات طبيعية لكل نوع بشرة.

– تعالوا نتعرف الاول على فوايد سيروم البشرة:

1- السيروم بيعمل طبقة عازلة على البشرة بيحميها من كل عوامل الجو, وبالتالي ده بيبطء من علامات الشيخوخة.

2- بيعوض البشرة بكل العناصر اللي محتاجاها.

3- بيحمي البشرة من التعب والارهاق.

4- بيحمي البشرة من الحساسية اللي ممكن تسببها بعض منتجات البشرة.

5- بيحمي البشرة من اضرار اشعة الشمس.

6- بيساعد على ترطيب البشرة, وبيحافظ على نضارتها وشبابها.

7- بيساعد على علاج حب الشباب.

8- بيحسن ملمس الجلد.

9- بيساعد على تفتيح البشرة, والتخلص من تصبغات الجلد.

10- بيعالج مشكلة المسام الواسعة.

طرق عمل سيروم البشرة
طرق عمل سيروم البشرة

– طرق عمل سيروم البشرة:

اكيد زي ما قولنا ان كل انواع البشرة بتحتاج لترطيب, لكن اكيد كل بشرة ليها المرطب المناسب ليها, يعني مكونات السيروم للبشرة الدهنية غير العادية او الجافة او الحساسة او المختلطة او المعرضة لحب الشباب, لان كل بشرة مختلفة عن التانية وليها احتياجات مختلفة, يعني لو البشرة حساسة بتحتاج مكونات تكون خفيفة على البشرة, والبشرة الجافة بتحتاج للترطيب, وحتى تصبغ البشرة والخطوط الرفيعة والتجاعيد بتحتاج نوع سيروم مناسب ليها حسب نوع البشرة, وفي السطور الجاية هنعرف انواع الزيوت المختلفة, وايه الزيوت المناسبة لكل نوع بشرة.

– تعالوا نعرف الاول انواع الزيوت المناسبة لكل نوع بشرة:

افضل الزيوت الحاملة او الوسيطة المناسبة لنوع بشرتك:

الزيوت الحاملة او الوسيطة دي انواع الزيوت اللي بتستخدم لتخفيف الزيوت العطرية عشان نقدر نستخدمها على البشرة بشكل آمن, لان الزيوت العطرية لوحدها ممكن تسبب التهاب للبشرة, يعني لو هتستخدمي اي نوع زيت عطري يبقى لازم تخففيه باي نوع من انواع الزيوت دي.

– البشرة العادية: زيت لب المشمش, زيت الجوجوبا, زيت بذور العنب, زيت عباد الشمس, زيت اللوز الحلو.

– البشرة الجافة: زيت الافوكادو, زيت اللوز الحلو, زيت لب المشمش, زيت عباد الشمس.

– البشرة المعرضة لحب الشباب: زيت الجوجوبا, زيت السمسم, زيت الارجان, زيت بذور العنب.

– البشرة الحساسة: زيت عباد الشمس, زيت الجوجوبا, زيت اللوز الحلو, زيت لب المشمش, زيت الورد, زيت الافوكادو, زيت الارجان, زيت بذور العنب.

– البشرة الدهنية: زيت الجوجوبا, زيت الارجان, زيت بذور العنب.

– البشرة اللي بتعاني من التجاعيد: زيت الورد, زيت الجوجوبا, زيت اللوز الحلو, زيت لب المشمش, زيت الافوكادو, زيت عباد الشمس.

طرق عمل سيروم البشرة
طرق عمل سيروم البشرة

افضل الزيوت الاساسية المناسبة لنوع بشرتك:

– البشرة العادية: زيت اللافندر, زيت اللبان الدكر.

– البشرة الجافة: زيت اللافندر, زيت الورد, زيت اللبان, زيت خشب الارز, زيت البابونج, زيت خشب الصندل, زيت الياسمين.

– البشرة المعرضة لحب الشباب: زيت خشب الارز, زيت اللافندر, زيت شجرة الشاي, زيت الورد, زيت الليمون, زيت البابونج, زيت الروز ماري.

– البشرة الحساسة: زيت اللافندر, زيت الورد, زيت الياسمين, زيت اللبان, زيت خشب الصندل.

– البشرة الدهنية: زيت اللبان, زيت اللافندر, زيت شجرة الشاي, زيت البابونج, زيت السرو, زيت النعناع, زيت الروزماري, زيت خشب الصندل.

– البشرة اللي بتعاني من التجاعيد: زيت الورد, زيت اللبان, زيت خشب الصندل, زيت اللافندر, زيت السرو, زيت الياسمين, زيت الروزماري.

طرق عمل سيروم البشرة
طرق عمل سيروم البشرة

– ازاي تعملي سيروم باستخدام الزيوت الاساسية:

اخلطي 4 معالق كبيرة من اي نوع زيت من انواع الزيوت الحاملة المناسب لنوع بشرتك, مع 20 نقطة من اي نوع زيت من الزيوت الاساسية المناسبة لنوع بشرتك, حطي الخليط في ازازة تكون بقطارة عشان تكون سهلة الاستخدام, ورجيها كويس لمدة 30 ثانية عشان تخلطي الزيوت مع بعض.

يعني تقدري تعملي السيروم بالمقادير اللي احنا قولناها باي انواع زيوت انتي عايزاها المهم تختاري المناسبة لنوع بشرتك.

طرق عمل سيروم البشرة
طرق عمل سيروم البشرة

– طريقة استخدام سيروم البشرة:

الخطوة الاولى: نضفي بشرتك بالغسول المناسب ليها.

الخطوة التانية: امسحي بشرتك بالتونر المناسب لنوع بشرتك.

الخطوة التالتة: حطي نقطة من السيروم على الجبهة, ونقطة على كل خد, ونقطة على الدقن.

الخطوة الرابعة: اعملي تدليك للبشرة بالراحة في حركات دائرية من تحت لفوق.

احتفظي بازازة السيروم في مكان ضلمة وبارد.

طرق عمل سيروم البشرة
طرق عمل سيروم البشرة

ممكن تشوفي من هنا 6 طرق لعمل غسول البشرة بمكونات طبيعية.

– وصفات سيروم  لكل نوع بشرة:

زي ما قولنا فوق انك تقدري تعملي السيروم باي انواع زيوت انتي تختاريها مناسبة لنوع بشرتك, هنقترح عليكم بعض الوصفات للسيروم اللي ممكن تعملوها.

1- سيروم للبشرة العادية:

هاتي ازازة صغيرة بقطارة ضيفي فيها 4 معالق كبيرة زيت بذور المشمش, مع 8 نقط من زيت اللافندر, و 8 نقط من زيت اللبان, وتقدري تبدلي الزيوت باي انواع زيوت تانية من المناسبة لنوع بشرتك.

حطي الغطا على الازازة, ورجي خليط الزيوت لمدة 30 ثانية عشان تخلطي كل الزيوت مع بعض, واستخدميه زي ما قولنا نضفي البشرة الاول, و حطي السيروم ودلكيه في حركات دائرية.

2- سيروم للبشرة الجافة:

اخلطي 4 معالق كبيرة زيت الورد, مع 5 نقط من زيت الياسمين, 5 نقط من زيت اللبان, 5 نقط من زيت اللافندر.

اقفلي الازازة ورجيها, واستخدميه بنفس الطريقة.

3- سيروم للبشرة المعرضة لحب الشباب:

اخلطي 4 معالق كبيرة من زيت الجوجوبا, مع 5 نقط من زيت شجرة الشاي, 5 نقط من زيت الليمون, و 10 نقط من زيت اللافندر.

4- سيروم للبشرة الحساسة:

اخلطي 2 معلقة كبيرة من زيت الجوجوبا, مع 2 معلقة كبيرة من زيت اللوز الحلو, 5 نقط من زيت الورد, 5 نقط من زيت خشب الصندل, 5 نقط من زيت اللبان, 5 نقط من زيت اللافندر.

5- سيروم للبشرة الدهنية:

اخلطي 2 معلقة كبيرة من زيت الجوجوبا, مع 2 معلقة كبيرة من زيت بذور العنب, 10 نقط زيت السرو, 5 نقط زيت النعناع, 5 نقط من زيت الروزماري.

6- سيروم للبشرة اللي بتعاني من التجاعيد:

اخلطي 4 معالق كبيرة من زيت الورد, 5 نقط من زيت اللبان, 5 نقط من زيت الياسمين, 5 نقط من زيت الروزماري, و 5 نقط من زيت اللافندر.

7- سيروم للبشرة المختلطة:

اخلطي 2 معلقة كبيرة من زيت الجوجوبا, مع 2 معلقة كبيرة من زيت الورد, 5 نقط من زيت اللبان, 5 نقط من زيت اللافندر, و 5 نقط من زيت خشب الصندل.

طرق عمل سيروم البشرة
طرق عمل سيروم البشرة

10 فوايد سحرية لزيت الارجان..ووصفات طبيعية للشعر والبشرة والضوافر

فوايد زيت الارجان