طرق عمل Leave-in conditioner بمكونات طبيعية لترطيب الشعر

ريهام محمود
ريهام محمود
في
شعر
11343

الشعر عشان نحافظ عليه صحي, يبقى اهم حاجة انه لازم دايما نحافظ على رطوبته, وواحدة من اكتر الطرق الفعالة والسهلة عشان نحافظ على رطوبة الشعر هي ال Leave-in conditioner,  وده نوع المرطب اللي بيتحط بعد غسيل الشعر بالشامبو والبلسم ويتساب من غير ما يتغسل, والنهاردة من خلال موضوعنا هنقول لكل بنات حوا طرق عمل Leave-in conditioner بمكونات طبيعية.

طرق عمل Leave-in conditioner بمكونات طبيعية:

– طرق عمل Leave-in conditioner سايل:

1- مرطب العسل وجوز الهند:

لو شعرك جاف اوي وهايش, الوصفة دي هتكون مناسبة جدا ليكي, لان كل مكوناته بتساعد على حماية الشعر من التكسر, والاحماض الامينية اللي موجودة في زيت الافوكادو بتهدي فروة لاراس, والبروتينات اللي فيه بتساعد على اعادة بناء بصيلات الشعر بشكل طبيعي, بالاضافة ان المكونات بتضيف لمعة للشعر وبتمنع تكسره.

المكونات:

2 معلقة كبيرة زيت جوز هند.

4 معالق كبيرة جل صبار الالوفيرا.

1 معلقة صغيرة زيت الافاوكادو.

1/3 كوباية مية.

الطريقة:

في كوباية او طبق صغير اخلطي زيت جوز الهند مع زيت الافوكادو, صبي جل الصبار والمية في ازازة صغيرة ببخاخ, وبعدين ضيفي لهم خليط زيت جوز الهند والافوكادو, وكده يبقى جاهز عندك, رشيه على الشعر بعد ما تغسليه كل مرة بالشامبو والبلسم بالطريقة العادية, ورجيه كل مره قبل الاستخدام, ونخلي بالنا ان زيت جوز الهند ممكن يتجمد في الحالة دي سيحيه في حمام مية سخنة وبعدين استخدميه عادي..

2- مرطب المية العشبية:

القعدة بتاعة الوصفة دي بتتكون من زيت الزيتون وزبدة الشيا, ودي تعتبر مرطبات تقيلة ومثالية جدا للشعر الكثيف او الخشن, الروزماري والزعتر هي زيوت اساسية بتحتوي على خصائص مطهرة للشعر, بتساعد على تقليل قشرة الشعر, وبتهدي فروة الراس المتلهبة, وبتساعد على توازن الاستروجين في الجسم, وده بيعزز نمو الشعر.

المكونات:

1 كوب مية.

½ كوباية جل صبار الالوفيرا.

1 معلقة كبيرة زيت جوز هند.

½ كوباية حليب جوز الهند.

1 معلقة كبيرة زيدة الشيا.

1 معلقة صغيرة زيت الروزماري “اكليل الجبل”.

1 معلقة صغيرة زيت زيتون.

½ معلقة صغيرة زيت زعتر.

الطريقة:

دوبي زيت جوز الهند, هاتي ازازة ببخاخ صبي فيها المية وحليب جوز الهند وجل الصبار, وبعدين ضيفي لهم زيت جوز الهند, في طبق صغير اخلطي كل الزيوت مع بعض وضيفيهم للخليط في الازازة, رجي الخليط قبل كل استخدام, ولو حسيتي ان ريحته نفاذه اوي من الزيوت ممكن تخففيه تاني بشوية مية صغيرين..

3- مرطب الجوجوبا:

زيت الجوجوبا يعتبر اقرب الزيوت لزيت الشعر الطبيعي, بيساعد على تقوية الشعر وتنعيمه وبيديه لمعة, بيمنع قشرة الشعر والتساقط, وعصير الصبار بيساعد على تعزيز نمو الشعر وبيمنع التساقط, وبيساعد على استعادة توازن درجة الحموضة الطبيعية للشعر وفروة الراس, والوصفة مناسبة للشعر المفرود او الكيرلي.

المكونات:

1 ½ كوباية عصير صبار.

2 كوب مية جوز الهند.

2 معلقة صغيرة زيت الجوجوبا.

الطريقة:

هاتي ازازة ببخاخ وصبي فيها عصير الصبار ومية جوز الهند وزيت الجوجوبا, ورجي الازازة عشان تخلطي المكونات, ويترج قبل كل استخدام.

4- مرطب اللافندر:

زيت اللافندر بيعزز نمو الشعر, وبيساعد على تكثيفة, كمان بيحتوي على خصائص علاجية مثالية لتهدئة فروة الراس الملتهبة.

المكونات:

½ كوباية حليب جوز الهند.

3 معالق صغيرة زبدة الشيا.

2 معلقة صغيرة زيت الجوجوبا.

5 نقط زيت اللافندر.

الطريقة:

سيحي زبدة الشيا وضيفي لها حليب جوز الهند, والزيوت, صبي الخليط في ازازة ببخاخ, وقبل كل استخدام ممكن تسيحيه في حمام مية سخنة, وترجيه قبل الاستخدام.

طرق عمل Leave-in conditioner 1
طرق عمل Leave-in conditioner 1

– طرق عمل Leave-in conditioner كريمي:

1- مرطب العسل وزبدة الشيا:

زبدة الشيا وزيت جوز الهند معروفين بخصائصهم المرطبة, وانهم بيساعدوا على استعادة الزيوت الطبيعية للشعر, وزيت اللافندر بيعزز نمو الشعر, وكمان بيخفف التوتر لو دلكتي بيه فروة الراس, العسل يعتبر مرطب طبيعي للشعر, وبيساعد على علاج تلف الشعر.

المكونات:

2 معلقة كبيرة زبدة الشيا.

2 معلقة كبيرة زيت جوز الهند.

كام نقطة من زيت اللافندر.

1 معلقة صغيرة عسل نحل.

المكونات:

سيحي زبدة الشيا وزيت جوز الهند مع بعض, اخلطيهم كويس وضيفي لهم العسل, وزيت اللافندر, وقلبيهم مع بعض كويس, حطي الخليط في علبة وحطيه في التلاجة لحد ما يتجمد ويبقى كريمي, وادهني بيه الشعر بد ما تغسليه.

2- مرطب زيت شجرة الشاي:

الخليط ده يعتبر مثالي جدا لترطيب الشعر, وتعزيز نموه, وعلاج مشاكل فروة الراس زي الصدفية او التهاب الجلد الدهني, زيت شجرة الشاي بيحتوي على كل الخصائص الطبيعية المضادة للفطريات والبكتيريا والمطهرات ومضادات الفيروسات, وبالتالي كل ده بيساعد انه يحافظ على فروة الراس صحية ونضيفة, وبيساعد على تقوية الشعر وزيادة نموه.

المكونات:

2 معلقة صغيرة زيت الجوجوبا.

½ كوباية زبدة الشيا.

2 معلقة كبيرة جل الصبار.

2 معلقة صغيرة زيت شجرة الشاي.

½ كوباية حليب جوز الهند.

الطريقة:

سيحي زبدة الشيا, ضيفي لها زيت الجوجوبا, وجل الصبار, وزيت شجرة الشاي, وحليب جوز الهند, اخلطي المكونات كلها مع بعض كويس, وحطيه في التلاجة لحد ما يبقى قوامه كريمي, واستخدميه زي الطريقة اللي فاتت.

3- مرطب الكركدية:

الكريم ده بيمنع تساقط الشعر, بيقلل من قشرة الشعر, وبيقلل من الهيشان والتجعد, والكركدية بيساعد كمان على توازن درجة حموضة الشعر, وثبت كمان ان الكركدية بيمنع فروة الراس الجافة والحكة, ومستخلص بذور الجريب فروت يعتبر محفز طبيعي للجهاز المناعي, وبيساعد على التخفيف من مشاكل الجلد وفروة الراس.

المكونات:

1 معلقة كبيرة كركدية بودر.

8 معالق كبيرة زبدة الشيا.

1 كوب مية.

4 معالق كبيرة جل الصبار.

1 معلقة صغيرة زيت اللافندر.

1 معلقة صغيرة مستخلص بذور الجريب فروت.

الطريقة:

سيحي زبدة الشيا, وضيفي عليها المية, وجل الصبار, وزيت اللافندر ومستخلص الجريب فروت, اخلطيهم مع بعض كويس, وبعدين ضيفي لهم الكركدية البودر وقلبيهم مع بعض, وحطي الخليط في التلاجة لحد ما يبقى قوامه كريمي.

4- مرطب الافوكادو والروزماري:

المرطب ده هايل جدا لو عايزة ترجعي فروة راسك صحية, كمان بيحفز نمو الشعر, الافوكادو غني بالبروتينات الطبيعية اللي بتساعد على زيادة نمو الشعر بشكل صحي, والروزماري كمان بتحافظ على فروة الراس صحية, وبتقلل من الالتهابات, وبتساعد على نمو الشعر.

المكونات:

½ كوباية زبدة الشيا.

2 معلقة صغيرة زيت الافوكادو.

6 نقط زيت الروزماري.

الطريقة:

سيحي زبدة الشيا, وضيفي لها زيت الافوكادو والروزماري, اخلطي المكونات مع بعض كويس, وحطيه في التلاجة لحد ما يتجمد ويبقى كريمي.

طرق عمل Leave-in conditioner 2
طرق عمل Leave-in conditioner 2

6 طرق لعمل بلسم الشعر بمكونات طبيعية لشعر ناعم وصحي

ماركات البلسم

مقالات متعلقه

خطوتين بس هيساعدوا على زيادة نمو شعرك بسرعة وتكثيفه

خطوتين بس هيساعدوا على زيادة نمو شعرك بسرعة وتكثيفه

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت

طريقة العناية بالشعر في الشتا وفترة الرياح الموسمية

طريقة العناية بالشعر في الشتا وفترة الرياح الموسمية