5 عادات بتسبب الاكتئاب وبتقلل من احترامك وثقتك بنفسك

بقلمريهام محمود فيعلاقات visibility2175

الابحاث اظهرت انه لما يكون التقدير الذاتي منخفض, ده بيخليكي معرضة اكتر للاكتئاب, لان افكارك السلبية عن نفسك بتبدأ تتطور وتتنقل لكل حاجة حواليكي, وهتدخلي في دوامة سلبية مالهاش نهاية هيكون من الصعب انك تخرجي منها, وده في النهاية هيأدي لتقليل احترام الذات والاكتئاب, والنهاردة هنقولك 5 عادات بتسبب تقليل احترام الذات والاكتئاب عشان تمرني نفسك انك تبطليها.

عادات بتسبب تقليل احترام الذات والاكتئاب:

افضل طريقة لزيادة احترامك لنفسك هي من خلال التفكير الايجابي, ولازم تبصي على كل عاداتك اليومية عشان تقدري تحددي الاسباب اللي ممكن توصلك للاكتئاب وتقليل احترامك لنفسك, واكيد ده هيكون مش مهمة سهلة لانك في حالة ان عندك عدم تقدير لنفسك هيكون من الصعب انك تنتقدي نفسك وتشوفي انتي بتعملي ايه غلط, لكن كل ما قدرتي انك تتخلصي من الافكار السلبية بسرعة, هيكون اسهل عليكي انك تتحكمي في عقلك, وبدلي كل الافكار السلبية بافكار ايجابية, هتلاقي نفسك في طريق النجاح, وتقديرك لنفسك زاد.

1- الكمال:

بصرف النظر عن عدد المرات اللي ممكن يكون حد قالك فيها انك لازم تبقي كويسة جدا قريبة للكمال او المثالية, ده معناه انك هتحطي معايير عالية لنفسك غير قابلة للتحقيق, واحساسك بعدك الكمال هيخلي احترامك لنفسك يقل وتبدأي تعاني من الاكتئاب ومشاعر القلق وهتبقي متضايقة من نفسك, لما تحطي معايير عالية وعايزة توصلي لها بسرعة, هيبقى قبول الفشل في الحالة دي اصعب.

والبحث عن الكمال كمان ممكن يأدي انك تخافي من تجربة اي حاجة جديدة لانك هتبقي خايفة من الفشل, لكن لازم تعرفي ان الفشل هو طريقة سليمة وصحية جدا للتعلم, لان الناس بتتعلم من اخطائها, ولو اتوقفتي عن الخوف هتلاقي ان مافيش اخطاء قاتلة او ممكن متعديش, يعني حاولي تركزي على الصورة الاكبر, وافتكري ان في حاجات كتير في الحياة مهمة اكتر من انك توصلي للكمال او للمثالية لان ده صعب تحقيقه.

2- الاسقاط:

الاسقاط دي عادة شائعة جدا عند الاشخاص اللي بيعانوا من القلق, وانخفاض تقدير الذات, والاكتئاب, لما يكون عندك مشكلة في تقديرك لنفسك, هتبدأي انك تسقطيها على اللي حواليكي, وهتتخيلي انهم شايفنيك بنفس الطريقة اللي انتي شايفة بيها نفسك, وهتبدأي تشكي في كل علاقاتك وتسألي نفسك هل كل اللي حواليكي بيكرهوكي بينهم وبين نفسهم, وده بيكون نتيجة انعدام الامان اللي بتعاني منه مع نفسك والقلق من انك مش قادرة تعرفي اللي بيفكر فيه اي شخص من اللي حواليكي.

لو لقيتي نفسك بتفكري بالطريقة دي, اسألي نفسك كده هل بتفكري كده في شخص انتي بتحبيه, في الحالة دي اعرفي ان مقدار اصحابك او الناس اللي انتي بتحبيهم عندك هو نفس مقدارك او قيمتك عندهم, وبالطريقة دي هتعرفي ان مشكلة احترام الذات بتكون في الغالب ذاتية منك انتي, مش من الاشخاص اللي حواليكي.

عادات بتسبب تقليل احترام الذات والاكتئاب
عادات بتسبب تقليل احترام الذات والاكتئاب

3- اسعاد الناس:

تقريبا من المستحيل انك ترضي كل الناس وزي ما دايما بنقول “ارضاء الناس غاية لا تدرك”, لكن اكيد الاشخاص اللي عندهم قلة احترام لنفسهم هيبذلوا مجهود انهم يحاولوا يرضوا الناس, لان دايما عندهم حاجة مستمرة انهم يثبتوا قيمتهم للي حواليهم, يعن  مثلا خوف الشخص من انه يقول “لا” لاي حد بيكون خوف اعمق من الرفض من انهم يسيبوه او يبعدوا عنه, لكن لازم تفتكري انك تحطي نفسك انتي الاول, والاصحاب الحقيقين اكيد عارفين ومتفهمين انك مش ضروري تكوني متواجدة في كل الاوقات, ولو استمريتي انك تحاولي ترضي كل اللي حواليكي طول الوقت, هيجي الشخص اللي هيستفاد منك وبعد ما تخلص مصلحته منك هيسيبك او يبعد عنك وزي ما دايما بنقول بردو “قضيت حاجتي من جارتي”, عشان كده لازم تتعلمي انك تواجهي وترفضي, ومتخليش رغبات وطلبات الغير تكون قبل رغباتك, او تبدي حد على نفسك, لازم تفكري في نفسك اولا.

4- الذنب:

كل الناس بتغلط, وكل الناس بتتعرض للفشل في مرحلة من حياتهم, لكن الاشخاص اللي بيعانوا من قلة احترام الذات بيكون عندهم صعوبة انهم يتقبلوا ده, وبيميلوا دايما انهم يلوموا نفسهم باستمرار ويفكروا نفسهم بالغلط, ومع الاستمرار في التفكير بالطريقة دي هتفكري ان المشكلة فيكي, ويبدأ احترامك لنفسك يقل, وده بيسموه “الذنب غير المفيد” لما تقعدي تحسسي نفسك انك مذنبة على حاجة مكنش ينفع تتعمل بشكل مختلف عن اللي عملتيه, عشان كده لازم تتعلمي انك تسامحي نفسك بنفس القدر اللي بتقدري بيه تسامحي اللي حواليكي, انتي تستاهلي انك تكوني متسامحة بنفس القدر, وتستحقي انك تكوني اكتر لطف مع نفسك.

5- الندم:

انك تعيشي في الماضي ده مش هيوصلك لاي حاجة, مينفعش تقعدي تفكري باستمرار في الحاجات الغلط اللي عملتيها, او الحاجات اللي فشلتي فيها, سيبي الماضي للماضي, لانك مش هتقدري تعملي اي حاجة دلوقتي لتغييره, وبلاش تحاصري نفسك بالافكار انك كان المفروض تعملي كذا او تتصرفي بطريقة مختلفة, لان ده كله هيأدي في النهاية لتقليل احترامك لنفسك.

حاولي تفكري دايما في الحاجات الكويسة اللي عملتيها في الماضي, او انتي كنتي سبب في اسعاد حد او نشرتي حاجات ايجابية بأفعالك, ده هيبين لك ان الحياة مش ابيض واسود بس, في نجاح وفي فشل وفي حاجات غلط وحاجات صح, يعني في النهاية اتعلمي انك تعيشي في الحاضر وتبصي للمستقبل, لانه بغض النظر عن صعوبة المحاولة او انك تقدري تعملي ده ولا لا, الماضي مش ممكن هيتغير في كل الاحوال.

عادات بتسبب تقليل احترام الذات والاكتئاب
عادات بتسبب تقليل احترام الذات والاكتئاب

ونصيحتنا ليكي في النهاية اتعلمي تحبي نفسك لان ده يعتبر الطريق للنجاح ولحياة ايجابية, الثقة بالنفس هي افضل وسيلة لحماية نفسك من الاكتئاب والافكار والمشاعر السلبية, حاولي تهربي من العادات السيئة اللي هدخلك في دوامة مش هتعرفي تخرجي منها, وكل ده هيجي بانك تدربي نفسك على التفكير بشكل ايجابي حوالين نفسك والحاجات اللي انتي بتعمليها, وممكن ده يحتاج وقت, لكن مع الاصرار وقوة الارادة هتلاقي حياتك بتتغير للاحسن مجرد ما تبطلي كل العادات السيئة اللي ممكن توصلك للاكتئاب وعدم احترامك لنفسك.

10 طرق تعرفي بيهم اذا كنتي بتحبي نفسك ولا لا.. وازاي تتعلمي تحبي نفسك اكتر !

ازاي تتعلمي تحبي نفسك اكتر
ازاي تتعلمي تحبي نفسك اكتر