5 أسباب ليه بتحسي انك زهقانة من وظيفتك ومش عارفة تحسني منها

بقلمآية حسان فيمنوعات visibility236

لما بتكونى بتشتغلى وعندك مسؤوليات في وظيفتك، إحساس انه الويك إند خلاص خلص وانك لازم تجبري نفسك تحاولي تنامي بدري علشان تصحي بدري يوم الأحد و تبدأى 5 أيام جديدة من شغل ومسؤوليات كل يوم مش حاجة سهلة أبدا، وقد ما بتبان بسيطة ومش مشكلة الا انها جدا صعبة و بتبقى تقيلة ومحتاجة مجهود جبار، خصوصا لو بدأتى تحسي انه احساس حماسك لوظيفتك قل وانك مابقيتيش تتعلمى جديد و خلاص زهقتى من شغلك ومابقاش عندك شغف من ناحيته، يعنى بقي مجرد حاجة مجبرة انك تعمليها علشان ظروف المعيشة او علشان انتى محتاجة الفلوس، واحساس الزهق والملل ده مبيجيش مرة واحدة كده، لكن ده له أسباب لازم تعرفيها علشام تقدري تتغلبي عليها و ترجعي تحبي شغلك زى الأول، وعلشان نساعدك .. في المقال ده بنات حوا هيقولولك على 5 أسباب ليه بتحسي انك زهقانة من وظيفتك ومش عارفة تحسني منها

5 أسباب ليه بتحسي انك زهقانة من وظيفتك ومش عارفة تحسني منها

1- مش حاسة براحة كفاية في الشغل 

بصي هو موضوع الراحة ده بيتقاس بطريقتين، اما انك بتخلصي كل اللي وراكي بدري فبيبقى عندك وقت فراغ كتير ماتعمليش فيه حاجة فى المكتب فبتقومى تشرب قهوتك او تتكلمى في التليفون شوية لكن برده بيفضل عندك وفت فراغ كتير مش عارفه تعملي فيه ايه وده بيسببلك حالة من الملل االلى بتحسي معاها انه وقتك ويومك كله بيضيع في المكان ده من غير فايدة، وهنا يبقى انتى بتضيعى وقتك فعلا و الحل للوضع ده هو انك تنظمى وقتك و تقسمى المهام اللى عليكى على مجمل وقتك فى الشغل علشان يبقى وقتك كله فى الشغل من غير ما تكونى مضغوطة، او الطريقة التانية وهى انك مضغوطة جدا طول الوقت و مابترتاحيش ولا دقيقة فمفيش وقت راحة كفاية وهنا لازم برده تعيدى تنظيم وقتك فى الشغل علشان تلاقى على الاقل 5 دقايق بين كل ساعة شغل والتانية تفصلي فيهم وتجددي نشاطك. 

مش حاسة براحة كفاية في الشغل

2- مابتطوريش من مهاراتك

بالرغم من انه مهاراتك دى هى اللى جابتلك الوظيفة وخلتك تتقبلي فيها، الا انه مهاراتك في حاجة للتطوير المستمر ولازم تبقى طول الوقت up to date، دايما اعملي ابحاث في مجال وظيفتك واكتشفي برامج او مهارات جديدة تساعدك تبقى افضل وتديكى احساس انك كل يوم بتتعلمي جديد. 

مابتطوريش من مهاراتك

3- مش حاسة انك جزء من المكان اللي انتي شغالة فيه

احيانا بتبقي مش المشكلة في طبيعة شغلك او في كمية الشغل اللي بتعمليها، لكن المشكلة بتكون في اندماجك مع الأشخاص ومع بيئة العمل اللى انتى فيها، فلو انتى مش حاسة انك جزء من المكان اللى انتى موجودة فيه وانك جزء من الفريق ده هيسببلك مشاكل نفسية كبيرة من ناحية شغلك، ورغم انها ممكن تكون لسه مش وظيفة احلامك، الا انك لازم تفكري نفسك طول الوقت انك محتاجة تبتدي والبداية دى مش هتيجى طول مانتى قاعدة فى البيت، غيرى من افكارك و صفي تفكيرك وحاولى تتواصلى مع زمايلك وتتعاملى معاهم و تدى لنفسك فرصة انك تعرفيهم ودورى على دروس او مهارات  تتعليمها من وظيفتك الحالية علشان تفيدك في وظيفتك الجاية، يعنى امسكي في الحلو على ما ييجى الأحلى منه. 

مش حاسة انك جزء من المكان اللي انتي شغالة فيه

4- مستنية الوقت اللي تمشي فيه 

سبب تانى من الأسباب اللى بتخليكى تحسي انك زهقانة من وظيفتك ومتدبسة فيها هى انك بتحسي انك ما بتصدقي تروحى المكتب وبعدين تقعدى تحسبي الوقت بالدقيقة وبالثواني علشان ترجعي البيت، فلو انتى عندك احساس قوى انك لازم تسيبي وظيفتك الحالية لانك مش بتحسي انك مبسوطة او بتخليكى تعيسة يبقى لازم تحسبيها صح و تقرري انتى بنفسك امتى هتسيبي الشغل ، وايا كانت الأسباب اللى  مخلياكي مابتحبيش وظيفتك ، من حق نفسك عليكى انك تاخدى موقف و تفكري في الموضوع بشكل عميق وهادى علشان تحسبيها صح وتاخدى القرار اللى هيريحك ايا كان ايه هو ، في النهاية زى ما الفرصة دى جت هتيجيى غيرها وربنا خلقنا علشان نجرب و نتطور وننتقل من مكان للتانى مانفضلش ثابتين في مكاننا زى الشجر. 

مستنية الوقت اللي تمشي فيه

5- مش عارفة انتى عايزة تعملي ايه

لما بتوصلي بقى لمرحلة انك مش عارفة انتى عايزة تعملي ايه، يبقى لازم تراجعى حساباتك وتحسبيها بالورقة والقلم كده انتى بتحبي ايه و بتعرفي تعملى ايه وايه الحاجات اللى بتكرهيها او ماعندكيش مهارة انك تعمليها و تبدأى تدورى على وظيفة تناسب شغفك وقدراتك علشان تحسي انك بتتطورى وبتنجحى فيها، ورغم انك ممكن مايبقاش عندك خطط قوية واقفة عليها علشان تنفذيها، الا انك لازم تبدأى تعملى خطط وتحاولى تمشي عليها، اتواصلي مع ناس عندهم خبرة اكتر منك واشتغلوا قبلك فى المجال اللى انتى مهتمة بيه واطلبى نصيحتهم ومساعدتهم، وخليكى مرنة كفاية انك تجربي وظايف مختلفة.

مش عارفة انتى عايزة تعملي ايه

 اعرفي معانا كمان نصايح وافكار تعملى ايه لو بتكرهى وظيفتك