انواع حب الشباب..وازاي تعالجي كل نوع

ريهام محمود
ريهام محمود
في
بشرة
3700

عادة حب الشباب مرتبط بالتقلبات الهرمونية اللي بتحصل في سن المراهقة, لكن كمان نسبة كبيرة من البالغين بيعانوا من حب الشباب, ويعتبر من اكتر الامراض الجلدية المنتشرة بين الشباب والبالغين, وغالبا بيحصل حب الشباب بسبب انسداد المسام اللي بينتج عنه افراز دهون زيادة, وبكتيريا, وهرمونات, وخلايا جلد ميتة, وشعر تحت الجلد, وتحديد نوع حب الشباب اللي كل بشرة ممكن تعاني منه يعتبر هو مفتاح العلاج الناجح للمشكلة, والنهاردة من خلال السطور الجاية هنتعرف على انواع حب الشباب وطريقة علاجها.

وحب الشباب فيه منه نوعين التهابي, وغير التهابي, وتحت النوعين دول بيجي كل انواع حب الشباب الفرعية المختلفة, الرؤوس السودا, الرؤوس البيضا او البثور, الخراجات, البثرات, العقد الصغيرة, وممكن يكون في اكتر من نوع حب شباب مع بعض في نفس الوقت.

انواع حب الشباب وطريقة علاجها:

– حب الشباب غير الالتهابي:

حب الشباب الغير التهابي بيشمل الرؤوس السودا والرؤوس البيضا, والانواع دي عادة مش بتسبب تورم, وبتستجيب نسبيا للعلاج بشكل كويس.

وغالبا العلاجات اللي فيها حمض الساليسيليك بتكون لعلاج حب الشباب بكل انواعه بشكل عام, لكن بتعالج بشكل افضل حب الشباب الغير التهابي, لانه بيساعد على ازالة الجلد الميت بشكل طبيعي, وبيزيل الخلايا الميتة, وده بيأدي لازالة الرؤوس السودا والبيضا, عشان كده دايما دوري على الحمض ده في مكونات اي منتج بتشتريه للبشرة سواء غسول البشرة, التونر, والمرطبات.

1- الرؤوس السودا (المفتوحة):

البثور السودا بتحصل بسبب انسداد المسام بالدهون الزيادة وخلايا الجلد الميتة, وبيفضل الجزء اللي فوق من البثور مفتوح, والباقي بيكون مسدود, وده اللي بيسبب اللون الاسود على سطح الحباية.

انواع حب الشباب وطريقة علاجها 1
انواع حب الشباب وطريقة علاجها 1

2- الرؤوس البيضا (المغلقة):

كمان النوع ده بيتكون بسبب انسداد المسام بالدهون الزيادة وخلايا الجلد الميتة, ولكن على عكس الرؤوس السودا, الجزء اللي فوق من الحباية بيكون مقفول, وبتظهر كانها نتوء صغير جاحظ او بارز على الجلد.

والبثور البيضا علاجها بيكون اكتر صعوبة من الرؤوس السودا لانها بتبقى مقفولة, وزي ما قولنا المنتجات اللي بيدخل فيها حمض الساليسيليك بتكون مفيدة جدا في علاج النوع ده, وكريمات الرتينويدات بتدي كمان افضل النتايج مع حب الشباب, وهنلاقي في الصيدلية اكتر من كريم بيحتوي على الرتينويد زي ال Differin, وال Adapalene, وال Ratin-A.

انواع حب الشباب وطريقة علاجها 2
انواع حب الشباب وطريقة علاجها 2

– حب الشباب الالتهابي:

البثور الحمرا المنتفخة دي بتكون من نوع حب الشباب الالتهابي, وعلى الرغم من ان الدهون الزيادة وخلايا الجلد الميت بتساهم في التهاب حب الشباب, لكن كمان البكتيريا بتلعب دور في انسدام المسام وممكن تسبب عدوى عميقة تحت سطح الجلد, وده بيأدي لظهور بقع حب الشباب اللي بتكون مؤلمة وصعب التخلص منها.

وفي حالة حب الشباب من النوع ده المنتجات اللي بتحتوي على بنزويل البيروكسايد, بتساعد في تقليل التورم والتخلص من البكيتريا اللي داخل الجلد, وبتساعد في ازالة الدهون الزيادة, ودكتور الجلدية في الحالة دي هيوصف مضاد حيوي عن طريق الفم او موضعي مع البنزويل بيروكسايد لعلاج حب الشباب الالتهابي, والكريمات اللي بتحتوي على الرتينويد كمان تعتبر جزء مهم في علاج النوع ده من حب الشباب.

1- البثور الوردي Papules:

البثور دي عادة بتتكون من تكسر الجزء اللي حوالين المسام بسبب الالتهاب الحاد, وده بيخلي المسام صلبة, ومسدودة ولمسها بيسبب الم, والجلد حواليها بيكون عادة لونه وردي.

انواع حب الشباب وطريقة علاجها 3
انواع حب الشباب وطريقة علاجها 3

2- البثور الحمرا Pustules:

البثور من النوع ده كمان ممكن تتكون بسبب انهيار الجزء اللي حوالين المسام, وعلى عكس النوع اللي فات اللي بتملى البثور بالقيح او الصديد, لكن البثور دي بتخرج من الجلد وعادة بيكون لونها احمر, وبيكون ليها رؤوس من فوق صفرا او بيضا.

انواع حب الشباب وطريقة علاجها 4
انواع حب الشباب وطريقة علاجها 4

3- العقد الصغيرة Nodules:

العقد الصغيرة بتحصل لما المسام بتتسد, والمسام المسدودة المنتفخة بتأدي لتهيج اكتر ونمو بشكل اكبر في حجمها, وعلى عكس النوعين اللي فاتوا, العقد دي بتكون تحت الجلد بشكل اعمق.

ولانها بتكون عميقة تحت الجلد فبيكون من الصعب علاجها في البيت, بتحتاج ضروري وصفة طبية عشان تنضفها, والدكتور غالبا هيوصف دوا Sotret عن طريق الفم, والعلاج ده بيتكون من فيتامين A, وبيتاخد يوميا لمدة من 5 – 6 شهور لعلاج العقد ومنعها, عن طريق تقليل حجم الغدة الدهنية داخل المسام.

انواع حب الشباب وطريقة علاجها 5
انواع حب الشباب وطريقة علاجها 5

4- الخراجات:

الخراجات ممكن تتكون بسبب انسداد المسام عن طريق اختلاط البكتيريا مع الدهون وخلايا الجلد الميتة, فبيحصل انسداد عميق جوه الجلد, وبيتكون تحت سطح الجلد اكتر من عقدة صغيرة مع بعض.

والنوع ده غالبا بيكون حجمها كبير ولونها احمر او ابيض, وبتسبب الم من اللمس, والنوع ده يعتبر اكبر شكل من اشكال حب الشباب, وبتتكون في الغالب بسبب عدوى شديدة على الجلد, والنوع ده من حب الشباب من اكتر الانواع اللي ممكن تسبب ندبة على البشرة.

ولعلاجه بيستخدم له الايزوتريتينوين “Sotret”, وفي الحالات الشديدة اوي ممكن دكتور الجلدية يضطر يزيل الخراج بشكل جراحي.

انواع حب الشباب وطريقة علاجها 6
انواع حب الشباب وطريقة علاجها 6

شوفي من هنا افضل 5 فيتامينات بتساعد على منع حب الشباب.

– ايه خطورة كل نوع من انواع حب الشباب؟

الرؤوس السودا والبيضا تعتبر هي اصغر اشكال حب الشباب, وممكن تعالجي الانواع دي بادوية موضعية, زي التونر اللي داخل في مكوناته حمض الساليسيليك او علاجات البنزويل بيروكسيد, ولو الحبوب مستجبتش للادوية اللي من غير وصفة طبية, ممكن يستخدم ليها الرتينويدات الموضعية, وفي نوع موجود من ريتينويد المعروف باسم “الادابالين – adapalene”, يعتبر فعال جدا في علاج الرؤوس السودا والرؤوس البيضا.

البثور الحمرا والوردي هي اشكال متوسطة من حب الشباب, ودي ممكن تحتاج علاج بوصفة طبية عن طريق الفم او موضعي لو منتشرة اوي على البشرة.

العقد والخراجات تعتبر اشد انواع حب الشباب, وفي الحالة دي ضروري تتعالج عن دكتور الجلدية, لان فتحها او اللعب فيها ممكن يسبب ندبات على البشرة متروحش بسهولة.

انواع حب الشباب وطريقة علاجها 7
انواع حب الشباب وطريقة علاجها 7

– ايه اللي انتي ممكن تعمليه:

اهم حاجة واول حاجة ان يكون في صبر في مرحلة علاج حب الشباب, وزي ما في بعض العلاجات بتجيب نتايج فورية, في علاجات تانية بتاخد شهور على ما تظهر نتيجتها, ولازم تكوني حذرة جدا من استخدام اكتر من منتج لحب الشباب في نفس الوقت, لان ده ممكن يسبب جفاف الجلد, والبشرة تعمل رد فعل للجفاف ده بانها تنتج دهون زيادة, وده ممكن يأدي لزيادة مشكلة حب الشباب بدل ما يعالجها.

ولازم كمان تتأكدي ان اي نتوء او تورم على البشرة هو فعلا نتيجة حب الشباب, لان في مشاكل جلدية تانية ممكن تسبب نفس الاعراض على الرغم من انها مختلفة تماما عن حب الشباب ومن ضمنها:

– التهاب الجريبات.

– التقرن الشعري.

– الدخينات.

– الوردية.

– خيوط دهنية.

– فرط التنسج الدهني.

وبننصح اي حد بيعاني من حب الشباب الافضل زيارة دكتور الجلدية عشان يقولك تشخيص دقيق وكامل للحالة, لان في بعض الحالات بيكون الدكتور المتخصص هو الحل الوحيد لعلاج حب الشباب.

انواع حب الشباب وطريقة علاجها 8
انواع حب الشباب وطريقة علاجها 8

نصايح من بنت قدرت تعالج حب الشباب في 30 يوم بطرق طبيعية

علاج حب الشباب بطرق طبيعية
علاج حب الشباب بطرق طبيعية

مقالات متعلقه

3 نقط من السيروم ده هتخليكي ماتحتاجيش للمكياج

3 نقط من السيروم ده هتخليكي ماتحتاجيش للمكياج

ليه حب الشباب بيظهر في ال 8 اجزاء دي من الجسم ، وايه اللي المفروض تعمليه

ليه حب الشباب بيظهر في ال 8 اجزاء دي من الجسم ، وايه اللي المفروض تعمليه

ماسك الفقاعاتBubble mask: فوايده للبشرة ، وازاي تعمليه بنفسك في البيت بمكونات طبيعية

ماسك الفقاعاتBubble mask: فوايده للبشرة ، وازاي تعمليه بنفسك في البيت بمكونات طبيعية