5 وصفات مختلفة لطريقة عمل الكب كيك
مافيش حد فينا مش بيحب الكب كيك, وفي اكتر من طريقة لعملة وتزيينه, عشان ننوع فيه وناكله كل مرة بشكل مختلف, والنهاردة هنقولكم 5 وصفات كب كيك.
وصفات كب كيك:
1- Neapolitan Cupcakes:
– مقادير كب كيك الشوكولاتة:
1/3 كوباية كاكاو غير محلى.
½ معلقة صغيرة كربوناتو.
½ كوباية مية مغلية.
¼ كوباية زبدة سايحة غير مملحة.
2 ½ معلقة كبيرة زيت نباتي.
¾ كوباية + 2 معلقة كبيرة سكر خشن.
¾ معلقة صغيرة فانيليا.
¼ معلقة صغيرة ملح.
بيضة كبيرة.
1 صفار بيضة.
¼ كوباية كريمة تقيلة.
1 كوباية دقيق لجميع الاغراض.
– مقادير كب كيك فانيليا ابيض:
1 ½ كوباية دقيق.
1 ½ معلقة صغيرة بيكنج بودر.
¼ معلقة صغيرة ملح.
7 معالق كبيرة زبدة طرية غير مملحة.
¾ كوباية سكر خشن.
¾ معلقة صغيرة فانيليا.
3 بياض بيض كبير.
½ كوباية لبن.
– مقادير ال Frosting:
¾ كوباية زبدة طرية غير مملحة.
كوباية فراولة مجففة ومجمدة.
2 ½ معلقة كبيرة كريمة تقيلة Heavy cream.
2 كوباية سكر بودرة.
– طريقة ال Frosting:
في طبق كبير حطي الزبدة واضربيها بالمضرب على سرعة متوسطة لمدة من 6 – 8 دقايق لحد ما تبقى ناعمة, او ممكن تضربيها في العجان, اضربي الفراولة المجمدة في الخلاط وضيفيها على الزبدة وضيفي عليهم الكريمة والسكر, واضربيهم بالمضرب مع بعض لمدة من 4 – 5 دقايق على سرعة متوسطة لحد ما المكونات كلها تمتزج وتبقى ناعمة.
– طريقة كب كيك الشوكولاتة:
سخني الفرن على 350 درجة, في طبق كبير مقاوم للحرارة, اخلطي الكاكاو مع الكربوناتو, وصبيهم بالتدريج في المية المغلية, وقلبيهم لحد ما يمتزجوا كويس, سيبي الخليط يبرد لمدة 5 دقايق.
اثناء ما انتي سيباه يبرد, في طبق تاني كبير اخلطي الزبدة, والزيت, والسكر, والفانيليا, والملح واضربيهم بالمضرب الكهربا, لمدة حوالي 30 ثانية, اخلطي البيض وصفار البيض مع بعض, وضيفيهم لخليط الكاكاو وبعدين ضيفي الكريمة واضربيهم كويس مع بعض, وبعدها ضيفي الدقيق واضربيهم تاني لحد ما المكونات كلها تختلط كويس مع بعض.
خدي من الخليط حوالي 1/8 كوباية “2 معلقة كبيرة”, وحطيها في قالب الكب كيك من تحت وزعيهم على 22 قالب مبطن بورق الكب كيك او ورق زبدة, وخليهم على جنب وحضرب الكب كيك الابيض.
– طريقة الكب كيك الابيض:
في طبق كبير اخلطي الدقيق مع الملح والبيكنج بودر وقلبيهم لمدة 20 ثانية, خليه على جنب, بالمضرب الكهربا او في العجان اخلطي الزبدة مع السكر والفانيليا واضربيهم مع بعض على سرعة متوسطة, لحد ما يبقى الخليط ناعم, في طبق تاني اخلطي بياض البيض مع اللبن واضربيهم مع بعض كويس.
ضيفي 1/3 خليط الدقيق لخليط الزبدة والسكر, وقلبيهم كويس مع بعض, وبعدها ضيفي ½ خليط اللبن والبيض وبعدين اضربيهم على سرعة منخفضة بالمضرب او في العجان, وبعدين زودي السرعة لمتوسطة واضربيهم لمدة دقيقة او لحد ما يبقى الخليط ناعم, ضيفي للخليط 1/3 كمان من خليط الدقيق واضربيهم تاني, وبعدها ضيفي النص الباقي من خليط اللبن والبيض واضربيهم على سرعة منخفضة لحد ما يمتزجوا وبعدها زودي السرعة لمتوسطة لمدة من دقيقة لدقيقتين ونص, ضيفي اخر 1/3 من خليط الدقيق واضربيهم تاني مع بعض.
خدي 1/8 كوباية من الخليط, وحطيها بالراحة فوق خليط الشوكولاتة اللي احنا وزعناها في القوالب وساوية فوقيه كويس, حطيها في الفرن, وسيبيها لحد ما تدخلي فيها سن السكينة وتطلع من غير عجين, هتاخد حوالي من 16 – 19 دقيقة, طلعيها وسيبيها تبرد شوية وطلعيها من القوالب على حامل سلك لحد ما تبرد تماما, وبعدها زينيها من فوق ب Frosting الفراولة اللي احنا حضرناه.
2- Black Forest Cupcakes:
– مقادير الكب كيك:
85 جرام شوكولاتة مفرومة ناعم.
1/3 كوباية دقيق.
¾ كوباية مية سخنة.
¾ كوباية دقيق.
¾ كوباية سكر خشن.
½ معلقة صغيرة ملح.
½ معلقة صغيرة كربوناتو.
¼ كوباية + 2 معلقة كبيرة زيت نباتي.
2 بيضة كبيرة.
2 معلقة صغيرة خل ابيض.
1 ½ معلقة صغيرة فانيليا.
– مقادير الحشو وال Topping:
1 ¼ كوباية مربى كريز او فراولة.
1 ½ كوباية كريمة تقيلة Heavy cream.
¼ كوباية سكر خشن.
شوكولاتة مفرومة ناعم للتزيين.
– الطريقة:
سخني الفرن على درجة حرارة 350, في طبق اخلطي الشوكولاتة المفرومة مع الكاكاو وصبي عليهم المية السخنة, وقلبيهم لحد ما الشوكولاتة تسيح والخليط يبقى ناعم, حطي الخليط في التلاجة عشان يبرد لمدة 20 دقيقة, وفي نص الوقت قلبيه تقليبه واحدة بس.
اثناء الوقت ده والخليط في التلاجة, هاتي طبق كبير واخلطي فيه الدقيق والسكر والملح والكربوناتو, وفي طبق تاني منفصل اخلطي البيض مع الزيت والخل والفانيليا واخفقيهم مع بعض, صبي عليه خليط الشوكولاتة وقلبيهم مع بعض, وبعدها ضيفي لهم خليط الدقيق وقلبي لحد ما يبقى ناعم.
قسمي الخليط بالتساوي على 12 قالب مبطن بورق الكب كيك, حوالي ¼ كباية في كل قالب, اخبزيها في الفرن لحد ما تستوي هتاخد حوالي من 17 – 19 دقيقة, بعدها طلعيها من القوالب على حامل سلك وسيبيها تبرد تماما.
اعملي حفرة في نص الكب كيك من فوق فتحة تكفي 1 ½ معلقة كبيرة مربى كريز.
لتحضير ال Topping اضربي الكريمة التقيلة بالمضرب الكهربا على سرعة عالية لحد ما تبقى ناعمة, ضيفي لها السكر, واضربيهم تاني مع بعض, حطي الكريمة على الكب كيك من فوق ورشي الشوكولاتة المفرومة, خزنيها في التلاجة في علبة محكمة الغلق لوقت لتقديم, وعند التقديم طلعيها قبلها في درجة حرارة الغرفة لمدة 20 دقيقة وبعدين قدميها.
3- اوريو كب كيك:
– المقادير:
علبة خليط كيك شوكولاتة جاهزة.
1 كوباية زيت نباتي.
علبة بودنج شوكولاتة بودر.
كوباية Sour cream كريمة الطبخ.
4 بيضات.
½ كوباية مية.
1 كوباية رقائق شوكولاتة.
6 وحدات بسكويت اوريو او بوريو متكسر.
مقادير كريمة الحشو والتزيين:
227 جرام جبنة كريمي.
1 معلقة كبيرة مستخلص الفانيليا, او ½ معلقة صغيرة فانيليا عادية.
4 كوبايات سكر بودرة.
227 جرام كريمة خفق Whipped cream.
– الطريقة:
في طبق كبير اخلطي علبة خليط الكيك, مع الزيت, وبودنج الشوكولاتة, وال Sour cream, سخني الفرن على درجة حرارة 350, والبيض, والمية, قلبي المكونات كلها مع بعض كويس لحد ما تبقى ناعمة, ضيفي لها رقائق الشوكولاتة, والبسكويت المتكسر, قلبي الخليط مع بعض كويس, وزعيه بالتساوي في قوالب الكب كيك, دخليه الفرن لمدة 18 دقيقة.
اثناء ما هو في الفرن حضري خليط الكريمة للحشو والتزيين, في العجان اخلطي الجبنة الكريمي مع الفانيليا اضربيهم مع بعض على سرعة متوسطة, وبعدين ضيفي السكر البودرة اثناء الضرب ولما يمتزج كويس, ضيفي الكريمة واضربيهم تاني كويس.
حطي الخليط في كيس تنزيين, وبعد ما الكب كيك يخرج من الفرن ويبرد خالص اعملي فتحة في النص وحطي خليط الكريمة جواها, وزيني بيه الكب كيك من فوق ورشي عليه اوريو متكسر, وواحدة بسكويت اوريو سليمة.
4- كب كيك بالتوت والنوتيلا:
– مقادير الكب كيك:
113 جرام شوكولاتة حلويات مفرومة ناعم.
1/3 فنجان كاكاو “33 جرام”.
¾ كوباية قهوة سخنة.
¾ كوباية دقيق “95 جرام”.
¾ كوباية سكر خشن “150 جرام”.
½ معلقة صغيرة ملح.
½ معلقة صغيرة كربوناتو.
6 معالق كبيرة زيت نباتي.
2 بيضة كبيرة.
2 معلقة صغيرة خل ابيض.
1 معلقة صغيرة خلاصة الفانيليا.
1/3 كوباية نوتيلا.
– مقادير كريمة التزيين:
227 جرام زبدة غير مملحة, بدرجة حرارة الغرفة.
1 معلقة صغيرة خلاصة الفانيليا.
3 كوبايات سكر بودرة “375 جرام”.
1/3 كوباية توت بري من غير بذر وممكن تستبدليها بالفراولة لو مش متوفر توت.
الوان طعام “لون احمر” حسب الرغبة ده اختياري.
– الطريقة:
لتحضير الكيك, اخلطي الشوكولاتة والكاكاو في طبق متوسط, صبي عليهم القهوة السخنة, غطيهم وسيبيهم 5 دقايق, قلبي الخليط بخفة لحد ما يبقى ناعم, وسيبيه على جنب لحد ما يبرد تماما.
اثناء ده سخني الفرن على درجة حرارة 350 درجة, وحضري 12 قالب مبطن بورق الكب كيك او ورق زبدة.
في طبق اخلطي الدقيق مع والسكر والملح والكربوناتو مع بعض.
خليط الشوكولاتة اللي احنا جهزناه بعد ما يبرد ضيفي له الزيت والبيض والخل والفانيليا وخليط الدقيق, وقلبيهم لحد ما يبقى الخليط ناعم, بمعلقة كبيرة او مغرفة قسمي الخليط بالتساوي على القوالب.
دخلي الكب كيك الفرن لمدة من 17 – 19 دقيقة, طلعيه من الفرن وسيبيه يبرد تماما, وباستخدام سكينة او معلقة صغيرة اعملي فتحة صغيرة في نص الكب كيك, وحطي فيها ½ معلقة نوتيلا.
لتحضير الكريمة للتزيين, في العجان اضربي الزبدة على سرعة متوسطة لحد ما تبقى ناعمة, ضيفي الفانيليا, وضيفي السكر بالتدريج اثناء الضرب, ضيفي التوت واضربيهم مع بعض لحد ما يبقى عندك خليط ناعم وخفيف, وعشان تعملي لون ضيفي الوان طعام باللون الاحمر او اي لون تختاريه وده اختياري ممكن تستغني عن اللون خالص, حطي الكريمة في كيس تزيين, وزيني الكب كيك من فوق, وممكن تتخزن لمدة يوم في درجة حرارة الغرفة, او في علبة محكمة الغلق في التلاجة لمدة 3 ايام.
5- كب كيك ستاربكس بالكريمة وصوص الكراميل:
– مقادير الكب كيك:
1 ½ كوباية دقيق لجميع الاغراض.
1 معلقة صغيرة بيكنج بودر.
½ معلقة صغيرة ملح.
½ كوباية زبدة مخفوقة غير مملحة.
1 كوب + 2 معلقة كبيرة سكر بني.
2 بيضة كبيرة.
1 معلقة صغيرة فانيليا.
½ كوباية + 2 معلقة كبيرة لبن.
– مقادير ال Frosting:
1 ½ كوباية زبدة سقعة غير مملحة.
113 جرام جبنة كريمي سقعة.
3 كوبايات سكر بودرة.
1 كوب من صوص الكراميل “ممكن تجيبي الجاهز او تعمليه في البيت”.
– الطريقة:
سخني الفرن على درجة حرارة 350 درجة, اضربي السكر البني مع الزبدة بالمضرب الكهربا على سرعة متوسطة, لحد ما يبقى الخليط ناعم خفيف.
ضيفي البيض واحدة ورا التانية واضربي لحد ما يختلطوا كويس, ضيفي الفانيليا واضربيهم تاني.
في طبق اخلطي الدقيق مع البيكنج بودر والملح, ضيفي خيط الدقيق لخليط الزبدة بالتدريج على 3 دفعات واضربي في كل مرة لحد ما الخليط يمتزج مع بعضه كويس.
قسمي الخليط على قوالب الكب كيك بالتساوي, تقريبا الكمية دي هتتقسم على 12 قالب, حطيها في الفرن لمدة 25 دقيقة, وبعدين طلعيها وسيبيها تبرد.
لتحضير ال Frosting, في العجان حطي الزبدة واضربيها لحد ما تبقى ناعمة, ضيفي لها الجبنة واضربيهم تاني مع بعض لحد ما يبقى الخليط ناعم.
ضيفي السكر البودرة بالتدريج ½ كوباية في كل مرة واضربي بعدها وحطي تاني واضربي وهكذا لحد ما تخلص كمية السكر, والخليط يمتزج كويس مع بعض.
ضيفي من ¼ كوباية ل 1 كوباية صوص كراميل لخليط الزبدة والجبنة واضربيهم تاني مع بعض, زيني الكب كيك بخليط الكريمة ورشي عليه صوص كراميل, ولو حابة ممكن ترشي رشة ملح صغيرة على الوش لو عايزة الطعم يكون Salty شوية.
تيراميسو تارت بطريقة جديدة سهلة وسريعة
