افضل طريقة لتخزين البصل عشان تحافظي عليه لأطول فترة
البصل واحد من المكونات اللي مافيش مطبخ بيسغنى عنه ابدا, والبصل ليه كذا نوع وشكل وبألوان مختلفة, وكل نوع ليه استخدام مختلف في الاكل, ولانه مكون رئيسي في كل اكلاتنا تقريبا فدايما بنشتري منه كميات كبيرة, لكن المشكلة اللي بتقابلنا انه ممكن يبوظ او يزرع وتضطري ترميه من غير ما تستخدميه, وعشان نتجنب ان ده يحصل ونهدر في الخضار والفلوس, هنقولك على طريقة تخزين البصل عشان تحافظي عليه لاطول فترة.
طريقة تخزين البصل:
– البصل العادي خزنيه في مكان بارد وجاف ومظلم وجيد التهوية:
البصل العادي الاصفر ده هنلاقيه متوفر طول السنة, وافضل طريقة لتخزينه هي انه يتحط في مكان بارد وجاف ويكون ضلمة وفيه تهوية كويسة, لان البصل من الحاجات اللي بتمتص الرطوبة بسهولة, فلو درجة الحرارة عالية او في رطوبة هنلاقي ان البصل هيبدأ يعفن ويبوظ لو مش متهوي كويس.
وتقريبا انسب درجة حرارة لتخزينه هي ما بين 40 – 50 درجة فهرنهايت “4 – 10 درجة مئوية” دي تعتبر درجة الحرارة المثالية اللي هتحافظ عليه.
ومهم جدا تخزينه في مكان متهوي كويس, يعني ميتحطش في حاجة مقفولة عشان نمنع التعفن, الافضل انك يتحط في سلة مفتحة, او شنطة شبك, او حتى في شراب فيليه طويل, واتجنبي تخزنيه في اكياس بلاستيك, لان ده ممكن يخليها تبوظ بسرعة بسبب سوء التهوية.
بالاضافة لده كمان تخزينه في مكان ضلمة هيساعد ان البصل يعيش فترة اطول, لان قلة ضوء الشمس بيقلل من تغيرات درجة الحرارة والرطوبة, ودول زي ما قولنا ممكن يسببوا ان البصل يبوظ بسرعة.
– تجنب تخزين البصل كامل في التلاجة:
زي ما قولنا في النقطة اللي فاتت ان البصل لازم يتخزن في مكان بارد وجاف وضلمة وجيد التهوية, وتخزينه في التلاجة ده هيعرضه لبرودة ورطوبة, والبصل هيمتصها وبالتالي هيبوظ بسرعة.
ومع ذلك الكلام ده مش بينطبق على البصل المقطع او المقشر, البصل المقشر ممكن تخزينة في التلاجة لمدة ممكن توصل لاسبوعين, والبصل المتقطع او الشرايح ممكن يستمر معاكي في التلاجة لمدة من 7 – 10 ايام.
يعني اتجنبي تخزين البصل بقشره في التلاجة لانه بيمتص الرطوبة بسهولة, لكن ممكن يتخزن في التلاجة في حالة انه متقشر او متقطع بس.
– افضل طريقة لتخزين ال Shallots:
ال Shallots هو نوع من انواع البصل لكن بيكون حجمه صغير وطويل شوية, وطريقة تخزينه بتكون زي البصل العادي في مكان بارد جاف وضلمة وجيد التهوية, زي ما قولنا ممكن في شبكة, او سلة مفتحة, لو خزنتيه بالطريقة دي ممكن يقعد معاكي لحد شهر من غير ما يحصله اي حاجة.
وممكن يتخزن في الفريزر لمدة ممكن توصل ل 6 شهور, بس الاول لازم تقشرية وتفصلي الطبقات بتاعته عن بعض, وبعدين تحطيه في كيس بيتقفل, او برطمان, او علبة محكمة الغلق وتخزنيه في الفريزر.
– ازاي تخزني البصل في اشكاله المختلفة:
عشان البصل يدوم معاكي اطول فترة ممكنة, يبقى التخزين السليم امر ضروري, عشان كده هنقولك ازاي تخزنيه في المراحل المختلفة بتاعته.
1- البصل المقشر:
بمجرد تقشير البصل لازم يتخزن في التلاجة على طول عشان نتجنب التلوث البكتيري.
حطيه في علبة محكمة الغلق, وضبط التلاجة على 40 درجة فهرنهايت ” 4 درجات مئوية”, او اقل.
ولو اتخزن بالطريقة دي ممكن يقعد معاكي في التلاجة لمدة 10 – 14 يوم.
2- البصل المتقطع او الشرايح او المكعبات:
البصل المتقطع باي طريقة كمان يتخزن في التلاجة لمدة ممكن توصل ل 10 ايام.
ببساطة لفي البصل في غلاف بلاستيك بشكل محكم, او في كيس بيتقفل.
او ممكن تشتريه متقطع جاهز من السوبر ماركت دلوقتي متوفر كده في كتير من السوبر ماركت, احتفظي بيه في التلاجة واتأكدي بس انك تستخدميه قبل ما فترة صلاحيته تنتهي.
بالنسبة لو عايزة تخزنيه فترة طويلة عشان تستخدميه بعد كده, ممكن تخزني البصل المتقطع او الشرايح في الفريزر لمدة من 3 ل 6 شهور, وفي الحالة دي هيبقى الافضل تستخدميهم في الاطباق المطبوخة, زي الشوربات او اليخني او في اكلات في الفرن.
3- البصل المطبوخ:
البصل المطبوخ ممكن تخزنيه في التلاجة لمدة 3 – 5 ايام.
حطيه في علبة محكمة الغلق, بعد طبخة سيبيه يبرد وخزنيه في التلاجة على طول, لان لو سبتيه بره فترة طويلة وهو مطبوخ ممكن تتكون فيه بكتيريا.
والافضل من ده كمان انك ممكن تخزني البصل المطبوخ في الفريزر لمدة ممكن توصل ل 3 شهور.
4- البصل المخلل:
التخليل يعتبر وسيلة منخفضة التكلفة تحافظي بيها على البصل لفترة اطول.
لانه التخليل بيخليه يتخزن في محلول بيمنع نمو البكتيريا اللي عادة بتسبب فساد الخضار, وممكن يستمر معاكي بالطريقة دي ل 6 شهور.
وعشان تخلليه, قطعي البصل وحطيه في برطمان زجاج او خزف يكون مليان بخليط من الخل والملح والسكر والبهارات حسب ذوقك ورغبتك في الطعم اللي انتي عايزاه.
وبمجرد ما تفتحي برطمان المخلل وتاخدي منه الافضل انك تحتفظي بيه في التلاجة, عشان يقعد معاكي فترة اطول.
– خزني البصل الاخضر والكرات في التلاجة:
النوعين دول ممكن يكون في ناس بيتلغبطوا بينهم لانهم تقريبا قريبين من بعض في الشكل, ببساطة البصل الاخضر هو البصل الصغير اللي بيتم حصاده من الارض قبل ما الراس بتاعته تكبر بشكل كامل وليه اوراق خضرا مجوفة.
والكرات هو يعتبر نوع من انواع البصل او من نفس الفصيلة ليه اوراق خضرا شبيهة بالبصل الاخضر بالظبط ولكن من غير راس, وورقه هش اكتر وطعمه فيه حلاوة شوية عن البصل الاخضر.
وبما ان النوعين دول متشابهين فممكن نخزنهم بنفس الطريقة, لو هتستخدمي البصل الاخضر او الكرات خلال يوم او يومين, ممكن تحطيهم في طبق مع شوية مية على الرخامة, بس اتأكدي ان مطبخك تكون حرارتة مش عالية اوي او فيه رطوبة.
لكن لو عايزة تخزنيهم فترة اطول من يومين, يبقى لفيهم في ورق مطبخ رطب يعني مبلول شوية بالمية, واربطي السيقان بتاعته بشريط مطاطي عشان يفضلوا متماسكين مع بعض, وحطيهم في درج التلاجة, ممكن يقعدوا معاكي لمدة توصل لاسبوع ونص.
ممكن كمان تقطعي البصل الاخضر وتجمديهم لشهور, اتأكدي بس انك مخزناهم في كيس او علبة محكمة الغلق وحطيهم في الفريزر.
– ازاي تشتري البصل:
اختيار البصل بشكل صح ميقلش اهمية عن تخزينة بشكل صحيح.
بالنسبة للبصل العادي الاصفر والاحمر, اختاري البصلة اللي تكون قشرتها جافة, والطبقة الخارجية لازم تكون خالية تماما من اي بقع او رطوبة.
اختاري البصلة اللي يكون وزنها تقيل بالنسبة لحجمها, عشان تتأكدي انه Juicy ومش مستوي زيادة عن اللزوم, واتجنبي اختيار البصلة اللي تلاقيها بدأت تنبت لانها دي هتعفن بسرعة.
اتجنبي البصلة اللي تكون ليها ريحة, لان دي ممكن تكون بايظة او مستوية زيادة عن اللزوم, اختاري البصلة اللي من غير ريحة.
البصل الاخضر اختاري اللي تكون البصلة بتاعته لونها ابيض منور, والسيقان او الورق الاخضر يكون من غير عيوب, واتجنبي اللي ورقه دبلان ومصفر.
اتجنبي الكرات اللي يكون فيه لون ابيض او اخضر زيادة او بقع على الورق بتاعه, الورق لازم يكون هش او مقرمش وخالي من اي تغيير لون فيه.
افضل الطرق عشان تحافظي على الخضار والفاكهة المتقطعة من تغيير لونها وطعمها
