13 تركيبة اكل ممكن تسرع عملية انقاص الوزن

ريهام محمود

في

2501

لما بنفكر او نحاول نخس اكيد مافيش حد فينا بيحب التقييد في الاكل ولا الحرمان, واللي منعرفوش ان ممكن الجمع بين الاكلات يساعد في فقدان الوزن اكتر من اكل كميات قليلة, والنهاردة من خلال موضوعنا هنقولكم تركيبات اكل بتسرع انقاص الوزن, من خلال الجمع بين اكتر انواع اكل بتساعد على حرق الدهون عشان تطلع لنا في النهاية وجبة لذيذة وفي نفس الوقت صحية وتساعدك على انقاص وزنك.

تركيبات اكل بتسرع انقاص الوزن:

1- الشوفان + وزبدة الفول السوداني:

الشوفان من اكتر انواع الحبوب الصحية, مش بس لانه خالي من الجلوتين لكن كمان يعتبر مصدر كبير للفيتامينات والمعادن والالياف ومضادات الاكسدة, والشوفان غني بعنصر البيتا جلوكان وهي الياف قابلة للذوبان بتساعد على خفض مستويات الكوليسترول والسكر في الدم, وبيعزز البكتيريا الصحية في المعدة, وبيزود الشعور بالامتلاء.

زبدة الفول السوداني هي في الاساس مهروس الفول السوداني, اللي بيتكون من حوالي 25% من البروتين, وده بيخليها مصدر ممتاز للبروتين النباتي, بالاضافة لده انها منخفضة في الكربوهيدرات ومصدر ممتاز جدا للدهون الصحية, وده بيخليها مناسبة جدا للاشخاص اللي بيعانوا من مرض السكر من النوع التاني, او للاشخاص اللي ماشيين على نظام غذائي منخفض الكربوهيدرات.

2- الجزر + الطحينة:

الجزر غذاء صحي جدا, لانه بيحتوي على 10% من الكربوهيدرات, والنشا, والالياف والسكريات البسيطة, ومصدر ممتاز جدا لفيتامين “أ” في شكل البيتا كاروتين, ومصدر غني بالفيتامينات زي فيتامين B و K والبوتاسيوم, لو اكلتي الجزر في وجبتك الاساسية هيساعدك على زيادة الاحساس بالشبع, وبالتالي تقليل السعرات الحرارية اللي هتدخل جسمك.

الطحينة او زبدة السمسم بتحتوي على مجموعة كبيرة من الفيتامينات والمعادن, ومصدر كبير للبروتين النباتي, وده بيخليها اختيار مغذي ومناسب للنباتيين, وثبت بالدراسات ان الالياف الموجودة في الطحينة بتقلل من استهلاك السعرات الحرارية, وده بيزود فقدان الوزن, بالاضافة انه ثبت كمان ان بذور السمسم ليها خصائص مضادة للالتهابات, وبتحافظ على صحة الامعاء.

3- السبانخ + التفاح + الزنجبيل:

السبانخ منخفضة الكربوهيدرات, ولكن غني جدا بالالياف القابلة للذوبان, والنوع ده من الالياف ليه فوايد كتير جدا في عملية الهضم, وبتحتوي على كمية كبيرة من الكاروتينات, وفيتامين C, وفيتامين K, وحمض الفوليك, والحديد, والكالسيوم, وبتساعد على تقليل الاجهاد التأكسدي, بالاضافة ان السبانخ بتحتوي على كميات عالية من النترات اللي بتساعد في تنظيم ضغط الدم.

التفاح بيتكون من 85% من المية, ومنخفض السعرات الحرارية, وثبت ان الخصائص دي بتساعد في انقاص الوزن, لانه غني بالالياف وده بيساعد على زيادة الاحساس بالشبع وتقليل الشهية, وبالتالي السيطرة على الوزن, بالاضافة لده التفاح بيحتوي على كتير من الخصائص الصحية اللي بتساعد على التحكم في سكر الدم, وصحة القلب, ومخاطر الاصابة بالسرطان, ووظائف المخ.

الزنجبيل غني بالجيرولينول, ودي تعتبر مادة غذائية بتحتوي على خصائص مضادة للالتهابات ومضادة للاكسدة, والزنجبيل بيسرع من افراغ المعدة, وده مفيد جدا للاشخاص اللي بيعانوا من عسر الهضم او مشاكل المعدة.

4- التين + والمكسرات البرازيلي:

التين منخفض السعرات الحرارية وخالي من الدهون وده بيخليه بديل مثالي لوجبة خفيفة غير صحية, وغني جدا بالالياف اللي بتساعد على علاج الامساك, وبتخليكي تحسي بالشبع لفترة اطول, بالاضافة كمان انه غني بمضادات الاكسدة اللي بتساعد على تقليل الجذور الحرة اللي ممكن تسبب تدمير او تلف الخلايا في الجسم.

المكسرات البرازيلي غنية بالالياف, وده بيساعد على خفض الكوليسترول في الدم, ومصدر ممتاز جدا لمضادات الاكسدة من خلال مادة السيلينيوم اللي بتدعم المناعة وبتزود من عملية الايض او التمثيل الغذائي, والاستهلاك المنتظم او المتكرر ليها بيساعد فعليا في انقاص الوزن, لانها بتساعد في زيادة الاحساس بالشبع, وده هيخليكي تاكلي كمية اقل من الوجبات الخفيفة الصحية.

5- الاناناس + عصير الليمون:

الاناناس منخفض السعرات الحرارية, وبيحتوي على نسبة عالية من المية, وده بيخليه وجبة خفيفة صحية جدا, بالاضافة ان الاناناس غني بالالياف اللي بتسهل مرور الاكل للجهاز الهضمي بمعدل طبيعي, وبيعزز من افراز العصارة المعدية عشان يساعد ان الاكل يدوب بشكل اسرع.

الليمون بيحتوي على مجموعة متنوعة من العناصر الغذائية الاساسية اللي بتساعد على تقليل وزن الجسم, وبيساعد على حرق دهون الجسم بشكل اسرع واكتر كفاءة من اي اكلات تانية, وعنصر الفلافونويدس الموجود في الليمون بيساعد على تحفيز الجهاز الهضمي وبيزود من افراز العصارات الهضمية.

6- البيض + الافوكادو:

البيض غني بالبروتينات المهمة اللي بيحتاجها جسمنا, وبيخليكي تحسي بالشبع فترة طويلة, ويعتبر البيض هو الاختيار المثالي عشان تحافظي على صحة كويسة من غير ما تستهلكي سعرات حرارية, وطريقة ممتازة عشان تحافظي على وزنك.

الافوكادو فيه قيمة غذائية عالية جدا بتساعد في دعم التحكم في الوزن, وبتوفر للجسم المغذيات المهمة اللي بتساعد على الحفاظ على مستويات الطاقة عالية, بالاضافة لصحة كويسة, وبتحتوي كمان على مواد كيميائية نباتية تعتبر مصدر طبيعي بيمد الجسم بالطاقة.

7- الزيتون + الطماطم:

الزيتون يعتبر مصدر صحي للالياف, تقريبا بيوفر حوالي 20% من احتياجات الجسم اليومية من الالياف, والالياف بتضمن ان الجهاز الهضمي يشتغل بشكل سليم, وبيحفز حركة الامعاء, والاكلات الغنية بالالياف عموما بتدي احساس بالامتلاء والشبع, وبالتالي هيقلل من هرمون الجوع وده هيساعد على التحكم اكتر في الوزن, وفقدان الوزن الزيادة.

الطماطمن بتحتوي على كمية كبيرة من الليكوبين, وهو عنصر مضاد للتأكسد فعال جدا في تنضيف الجذور الحرة المسببة للسرطان او المضرة لخلايا وانظمة الجسم, بالاضافة كمان انها بتحتوي على نسبة كبيرة من فيتامين A والبوتاسيوم, والحديد, والطماطم الطازة منخفضة الكربوهيدرات حوالي 4% بس, والكربوهيدرات اللي فيها بتتكون اساسا من السكريات البسيطة والالياف الغير قابلة للذوبان.

8- البطيخ + خل البلسميك:

البطيخ بيحتوي على فوايد صحية بتساعد على الوقاية من اضطرابات الكلى, وارتفاع ضغط الدم, والسكر, والسرطان, وامراض القلب, والعجز الجنسي, والبطيخ بيحتوي على 46 سعر حراري لكل كوباية, و بيتكون من 92% من المية, وده بيخليه وجبة خفيفة مثالية جدا, وكمان غني بفيتامين C وفيتامين A والمركبات النباتية الصحية.

خل البلسميك بيحتوي على كتير من الفوايد الصحية, وبيساعد في السيطرة على مرض السكر, والتحكم في ضغط الدم, والدورة الدموية, والوقاية من حصوات الكلى, كمان بيحسن توازن الاحماض والقلويات في الجسم, بيساعد على التحكم في الشهية وزيادة مستويات الشبع, وبالتالي بيعزز فقدان الوزن بشكل فعال جدا, كمان بيساعد على منع متلازمة الايض والتقليل من مخاطر السمنة.

9- الموز + السبانخ:

الموز ليه فوايد صحية كتير منها انه بيساعد على انقاص الوزن, والحد من السمنة, وعلاج الاضطرابات المعوية, وتخفيف الامساك, وعلاج الامراض زي الزحار, وفقر الدم, والسل, والتهاب المفاصل, والنقرس, ومشاكل الكلى, والاضطرابات البولية, بالاضافة ان الموز مش بيحتوي على اي دهون, وكل موزة تقريبا بتحتوي على 90 سعرة حرارية, وبسبب ان الموز غني بالالياف ده بيساعد انه بيمنع الافراط في الاكل, لانها بتقلل من هرمون الجوع.

السبانخ غنية بالبروتين اللي بتتقسم بسهولة جوه الجسم عن طريق الانزيمات لاحماض امينية, والبروتينات دي بتساعد على نمو العضلات وتطورها, وبتزود قدرة الجسم على شفاء الجروح وتوفير جزء لعملية التمثيل الغذائي, وده بيخلي كل اعضاء الجسم تشتغل بشكل مثالي.

10- السلمون + الافوكادو:

سمك السلمون يعتبر اختيار مثالي للاشخاص اللي حابين ينقصوا وزنهم والحفاظ عليه كمان من الزيادة, لانه بيحتوي على نسبة عالية من البروتين اللي بينظم الهرمونات اللي بتتحكم في الشهية, ومنخفض السعرات الحرارية, وبيزود من معدل التمثيل الغئائي والدهون المتعددة غير المشبعة اللي بتعزز من فقدان الوزن بشكل صحي.

الافوكادو زي ما قولنا في نقطة سابقة انه غني بالمغذيات الاساسية اللي بتحافظ على مستويات الطاقة وفي نفس الوقت بتخلي شهيتك منخفضة او مالكيش نفس للاكل باستمرار.

11- الفراخ + الشطة:

زي ما قولنا ان الاكلات اللي بتحتوي على نسبة عالية من البروتين فعالة جد في خفض الوزن, والفراخ واحد من اكتر الاكلات الغنية بالبروتين, والدراسات اثبتت ان الاشخاص اللي بيقدروا على وزنهم بيستهلكوا صدور الدجاج في وجباتهم بشكل منتظم, وده لان الفراخ منخفضة السعرات الحرارية وعالية البروتين.

الشطة او الفلفل الحار من الحاجات اللي بتساعد في التحكم في الشهية, وبتزود معدل حرق السعرات الحرارية, والفلفل هيمد الجسم بكمية كبيرة من العناصر الغذائية وبيأثر في نفس الوقت على الحد الادنى من السعرات الحرارية اللي بتدخل جسمك في اليوم الواحد.

12- العسل + الليمون:

ده يعتبر المزيج او التركيبة المثالية لفقدان الوزن.

عصير الليمون بيحتوي على عنصر نشط اسمه حمض الستريك, واللي بيستخدم دايما كعامل تنضيف للجسم, لانه بيحتوي على خصائص قوية مضادة للجراثيم ومطهرة.

العسل بيحتوي على كميات قليلة من الفيتامينات والمعادن الاساسية بما فيهم الريبوفلافين, والحديد, والزنك, وفيتامين B6 والالياف الغذائية.

وعلى الرغم ان المكونات دي بتحتوي على نسبة من السكر, ولكن فيها كمية صغيرة جدا من السعرات الحرارية, وكمية من المعادن والفيتامينات اللي ممكن تساعد الجسم انه يحس بالشبع, والجمع بينهم بيعزز عملية الايض ويعتبر طريقة مثالية جدا لفقدان الوزن.

13- الافوكادو + الجريب فروت:

الجريب فروت مش بس وجبة لذيذة لكن كمان يعتبر وجبة خفيفة صحية, لانه منخفض السعرات الحرارية, وبيحتوي على نسبة عالية من المواد الغذائية, واثبتت الدراسات ان استهلاك الجريب فروت بشكل منتظم بيعزز من فقدان الوزن بشكل فعال, وده بيرجع لوجود انزيم في جسمنا اسمه بروتين كيناز بيتم تنشيطة من خلال مركب عضوي موجود في الجريب فروت بيساعد على تعزيز عملية التمثيل الغذائي في الجسم وده بيأدي بدوره لفقدان الوزن.

لما يتخلط الجريب فروت مع الافوكادو في السلطة, الجريب فروت هيساعد على امتصاص العناصر الغذائية في الافوكادو, والدهون الصحية الموجودة في الافوكادو بتساعد في زيادة امتصاص الليكوبين في الجهاز الهضمي, وده بيدي جسمك طاقة لاطول فترة, والجريب فروت والافوكادو تعتبر بدائل صحية هايلة للبطاطس المقلية او سلطة المكرونة.