15 علامة تقولك انك بتعاني من نقص فيتامين C

بقلمريهام محمود فيصحة visibility651

فيتامين C او ج واحد من اهم العناصر الغذائية الاساسية اللي لازم يتم استهلاكها بانتظام عشان نمنع نقصه, لان نقصه ممكن يأدي لمخاطر صحية زي سوء التغذية, وفقد الشهية, والمرض العقلي الشديد, والتدخين, ومشاكل الكلى, لكن المخاطر دي بتبدأ تظهر على المدى البعيد وبتاخد شهور عشان تتطور وتظهر, لكن في علامات صغيرة ممكن تنبهنا, وده اللي هنعرفه النهاردة من خلال السطور الجاية هنقولك اكتر علامات نقص فيتامين C.

علامات نقص فيتامين C:

1- ندبات وخشونة في الجلد:

فيتامين C بيلعب دور اساسي في انتاج الكولاجين, اللي يعتبر بروتين اساسي في انسجة الجلد والشعر والمفاصل والعظام والاوعية الدموية, ولما تكون مستويات فيتامين C منخفضة ممكن يسبب مشاكل في الجلد وتتطور وتوصل لمرحلة المعروفة باسم التقرن الشعري او “جلد الدجاج” على الجزء الخلفي من الذراعين والفخدين او الارداف, وده بيحصل بسبب تراكم بروتين الكيراتين داخل المسام, والحالة دي بتظهر بعد مدة من 3 – 5 شهور من نقص فيتامين C.

الملخص ان نقص فيتامين C ممكن يسبب ندبات صغيرة او حبوب صغيرة شبيهة بحب الشباب على الذراعين والفخدين والارداف, لكن اكيد مش نقص فيتامين C هو الوحيد المسبب للحالة دي ممكن تكون في اسباب تانية, يعني لو انتي بتستهلكي كمية كافية من فيتامين C يبقى في الحالة دي ليها سبب تاني.

2- نمو شعر الجسم بشكل غريب:

نقص فيتامين C ممكن يأدي لنمو شعر الجسم بشكل غريب او مخروطي او ملفوف حوالين نفسه, وده بيحصل بسبب العيوب اللي بتتطور في بنية البروتين اثناء نمو الشعر, والعلامة دي ممكن متكونش واضحة اوي, لان في الغالب الشعر التالف ده بيتكسر ويقع لوحده.

وغالبا المشكلة دي بتتحل في خلال شهر واحد من العلاج بكميات كافية من فيتامين C.

3- بقع حمرا حوالين بصيلات الشعر:

بصيلات الشعر الموجودة على سطح الجلد بتحتوي على اوعية دموية صغيرة بتمد الدم والمغذيات للمنطقة, ولما الجسم يعاني من نقص فيتامين C الاوعية الدموية دي بتبقى هشة وبتتكسر بسهولة, وده بيسبب ظهور بقع حمرا صغيرة حوالين بصيلات الشعر.

والمشكلة دي عادة بتتحل بتناول مكملات فيتامين C في خلال اسبوعين.

4- ضوافر على شكل معلقة مع بقع حمرا او خطوط:

الضوافر على شكل معلقة يعني بتكون داخلة شوية من النص واطرافها مقوسة لجوه شوية وغالبا بتكون هشة ورقيقة, الشكل ده مرتبط بفقر الدم ونقص الحديد وكمان نقص فيتامين C , وممكن تظهر كمان بقع حمرا او خطوط عمودية بتحصل بسبب نقص فيتامين C اللي بيتسبب في ضعف الاوعية الدموية اللي بيخليها تنفجر بسهولة وتظهر البقع الحمرا تحت الضوافر.

5- جلد جاف وتالف:

الجلد السليم بيحتوي على كمية كبيرة جدا من فيتامين C خاصة في الطبقة الخارجية من الجلد, وفيتامين C بيحافظ على صحة الجلد من خلال حمايتة من الاضرار التأكسدية اللي ممكن تسببها الشمس والتعرض للملوثات زي التدخين وعوامل الجو المختلفة, كمان بيعزز من انتاج الكولاجين اللي بيحافظ على شباب البشرة وصحتها.

وبالتالي طول ما الجلد صحي ده معناه ان الجسم فيه كمية كافية من فيتامين C, ونقصه بيسبب جفاف الجلد والتجاعيد بنسبة 10%.

علامات نقص فيتامين C
علامات نقص فيتامين C

6- ظهور الكدمات بسهولة على الجلد:

الكدمة بتحصل لما الاوعية الدموية بيحصلها تمزق تحت الجلد, وده بيسبب تسرب الدم للمنطقة المحيطة بيه, وظهور الكدمات من اقل خبطة بسهولة ده يعتبر علامة من علامات نقص فيتامين C, لان ضعف انتاج الكولاجين بيسبب ضعف الاوعية الدموية, ودي تعتبر من اكتر العلامات الواضحة لنقص فيتامين C.

7- شفاء الجروح ببطء:

بما ان نقص فيتامين C بيأدي لابطاء معدل تكوين الكولاجين, فده بدوره بيأدي لشفاء الجروح ببطء اكتر, ده غير ان النقص الشديد لفيتامين C ممكن يأدي كمان لفتح الجروح القديمة وده ممكن يزود خطر العدوى.

ويعتبر بطء التئام الجروح واحدة من العلامات المتقدمة لنقص فيتامين C, يعني الجسم بيعاني من نقصه من شهور مش من فترة قريبة.

8- الم وتورم المفاصل:

بما ان المفاصل بتحتوي على كتير من الانسجة الضامة الغنية بالكولاجين, فبالتالي هي ممكن تتأثر بنقص فيتامين C, واثبتت الدراسات ان كتير من الحالات اللي بتعاني من الم المفاصل اللي ممكن يوصل لحد انك ممكن تمشي تعرجي او تلاقي صعوبة في المشي عندهم نقص في فيتامين C.

ممكن كمان يحصل نزيف داخل المفاصل بسبب نقص فيتامين C وده ممكن يأدي لتورم والم زيادة في المفاصل.

ومع ذلك ممكن علاج ده بمكملات فيتامين C وبتتحل غالبا في خلال اسبوع واحد بس.

علامات نقص فيتامين C
علامات نقص فيتامين C

9- ضعف العظام:

نقص فيتامين C ممكن يأثر كمان على صحة العظام, والدراسات ربطت ما بين انخفاض استهلاكة وخطر الاصابة بهشاشة العظام, لان الدراسات اثبتت انه بيلعب دور مهم جدا في تكوين العظام.

كمان عضم الاطفال بشكل خاص ممكن تتأثر بنقص فيتامين C لانها لسه في مرحلة نمو وتتطور.

10- نزيف اللثة وسقوط الاسنان:

اللثة الحمرا الوارمة والنزيف يعتبر علامة من علامات نقص فيتامين C, لان انسجة اللثة بتبقى ضعيفة والاوعية الدموية بتنزف بشكل اكبر, وفي مراحل متقدمة من نقص فيتامين C ممكن تتحول اللثة للون الارجواني, وفي النهاية ممكن الاسنان تسقط بسبب ان اللثة غير صحية.

11- مناعة ضعيفة:

بتشير الدراسات ان فيتامين C بيتراكم جوه انوع مختلفة من الخلايا المناعية عشان تساعدها في مكافحة العدوى والامراض وتدمير مسببات الامراض, ونقص فيتامين C ممكن يسبب ضعف المناعة ويزود خطر الاصابة بالعدوى بما فيهم الامراض الخطيرة زي الالتهاب الرئوي.

والحقيقة ان كتير من الناس اللي بيعانوا من داء الاسقربوط, بيكون سببه هو نقص فيتامين C اللي ممكن يأدي في النهاية للوفاة بسبب ضعف جهازهم المناعي.

علامات نقص فيتامين C
علامات نقص فيتامين C

12- فقر الدم او الانيميا:

غالبا بيحصل فقر الدم او الانيميا بسبب نقص الحديد وفيتامين C مع بعض, ومن اكتر علامات فقر الدم بسبب نقص الحديد هي الشحوب, والتعب, وصعوبة التنفس اثناء ممارسة الرياضة, جفاف الجلد والشعر, والصداع, والضوافر على شكل معلقة.

ونقص فيتامين C ممكن يساهم في فقر الدم عن طريق تقليل امتصاص الحديد من الاطعمة النباتية. وكمان ممكن يسبب خطر النزيف المفرط, واللي بدوره بيأدي لنفس النتيجة وهي فقر الدم.

لو بتعاني من فقر الدم او الانيميا من فترة طويلة من غير سبب واضح, يبقى ضروري تفحصي مستويات فيتامينات C في جسمك لان في الغالب هيكون فيها نقص.

13- التعب وسوء المزاج:

اتنين من اولى علامات نقص فيتامين C هي التعب والمزاج السيء, والاعراض دي ممكن تظهر كمان قبل ما يتطور النقص الكامل, لكن العلامتين دول ممكن يتحلوا خلال ايام من خلال تناول كميات كافية من فيتامين C او خلال 24 ساعة عن طريق تناول جرعات عالية من مكملات فيتامين C.

14- زيادة الوزن من غير سبب:

فيتامين C ممكن يساعد في الوقاية من السمنة عن طريق تنظيم اطلاق الدهون من الخلايا الدهنية, والتقليل من هرمونات التوتر.

والابحاث لقت علاقة ثابتة بين انخفاض فيتامين C ودهون الجسم الزيادة, وبيأدي لزيادة دهون البطن بشكل خاص حتى مع الاشخاص اللي وزنهم طبيعي.

15- الالتهاب المزمن والاجهاد التأكسدي:

يعتبر فيتامين C واحد من اهم مضادات الاكسدة القابلة للذوبان في المية, وبيساعد على منع التلف الخلوي عن طريق تحييد الجذور الحرة اللي ممكن تسبب الاجهاد التأكسدي والالتهاب في الجسم.

والدراسات ربطت الاجهاد التأكسدي والالتهاب بكتير من الامراض المزمنة بما فيهم امراض القلب والسكر, وربطوا ما بين انخفاض فيتامين C لمستويات اعلى من الالتهاب والاكسدة, بالاضافة لزيادة خطر الاصابة بأمراض القلب.

واثبتت الدراسات ان البالغين اللي عندهم مستويات قليلة من فيتامين C في الدم هما اكتر عرضة بنسبة 40% للاصابة بقصور القلب خلال 15 سنة اكتر من الاشخاص اللي عندهم مستويات اعلى من فيتامين  C في الدم.

علامات نقص فيتامين C
علامات نقص فيتامين C

– افضل المصادر الغذائية لفيتامين C:

النسبة اليومية المناسبة لفيتامين C هي 90 ملليجرام للرجال, و 75 ملليجرام للنساء, والمدخنين المفروض يستهلكوا فيتامين C زيادة بنسبة 35 ملليجرام, لان التبغ بيقلل من امتصاص فيتامين C وبيزود من استخدام الجسم للمغذيات.

ولمنع داء الاسقربوط بشكل خاص مش محتاجين اكتر من 10 ملليجرام من فيتامين C في اليوم الواحد, بمقدار تقريبا ثمرة فلفل او عصير نص ليمونة.

بعض من افضل مصادر فيتامين C:

– الجوافة.

– التوت الاسود.

– الفلفل الاحمر الحلو.

– الكيوي.

– الليمون.

– البرتقان.

– الفراولة.

– البابايا.

– البروكلي.

– البقدونس.

علامات نقص فيتامين C
علامات نقص فيتامين C

ومهم جدا اننا نعرف ان فيتامين C بينهار تماما لو اتعرض للحرارة, عشان كده الفواكه والخضروات الفريش او الخام هي تعتبر مصادر افضل منها وهي مطبوخة.

ولان الجسم مش بيخزن كميات كبيرة من فيتامين C فالافضل اكل الفواكه والخضروات الطازة بشكل يومي.

بالنسبة للمكملات الغذائية لفيتامين C اللي ممكن نشتريها من الصيدلية هي مش سامة او خطر لكن ممكن تسبب اثار جانبية, لو اخدنا اكتر من 2000 ملليجرام يوميا لان الاكتر من كده ممكن يسبب تشنجات في البطن واسهال وغثيان, وممكن تسبب حصوات الكلى على المدى البعيد.

ولو اي حد هيعمل تحاليل بول او براز يبقى لازم يوقف مكملات فيتامين C قبل التحليل باسبوعين, لان ممكن الجرعات اللي بتزيد عن 250 ملليجرام في اليوم الواحد تدخل مع الاختبارات الخاصة بالتحاليل ومتطلعش النتايج مظبوطة.

علامات نقص فيتامين C
علامات نقص فيتامين C

12 نوع اكل لمكافحة الامراض بطريقة طبيعية وبشكل فعال

انواع اكل بتساعد على علاج الامراض
انواع اكل بتساعد على علاج الامراض