حاسة بشعور بالوحدة في العلاقة؟ اعرفي الاسباب وازاي تتخلصي من الشعور ده

ريهام محمود
ريهام محمود
2019

هل عدى عليكي وقت سألتي فيه نفسك “انا حاسة بشعور بالوحدة..بس مش عارفة السبب؟”, احنا بنقولك انك مش انتي الوحيدة اللي بتمري بالحالة دي في كتير بيعدي عليهم وقت بيحسوا فيه بشعور بالوحدة وبيكون مافيش سبب واضح للشعور ده, والنهاردة من خلال موضوعنا هنقولك اسباب الشعور بالوحدة وازاي تتخلصي منه.

اسباب الشعور بالوحدة في العلاقة وازاي تتخلصي منه:

الشعور بالوحدة ممكن يكون واحد من اسوأ الاحساسيس اللي ممكن تمري بيها, وكلنا بنمر بيه من وقت للتاني, لكن لو طول الوقت انتي حاسه بالشعور ده يبقى في الحالة دي لازم يكون في حل.

والشعور بالوحدة م مقتصر بس انك وحيدة ممكن تكوني مرتبطة او حواليكي ناس واصحاب لكن مع ذلك حاسة بالوحدة, لان الشعور بالوحدة والوحدة نفسها مختلفين تماما عن بعض, الشعور بالوحدة هو انك يكون حواليكي ناس واصحاب بس بتحسي ان مافيش حد فاهمك وانك منقطعة او منفصلة عن اللي حواليكي, يعني الشعور بالوحدة معناها هو تفاعلنا او فشلنا في التفاعل مع اللي حوالينا.

وممكن يكون التغلب على الشعور بالوحدة مش سهل وخصوصا لما تبقى حالة نفسية وتتحول لقلق وتوتر, وممكن تبقى حاجة خطيرة وصعب اننا نتخلص منها لو اهملنا الشعور ده, عشان كده من خلال المقال ده هنعرف اسبابه وازاي نتخلص منه.

– تعالوا نعرف الاول اسباب الشعور بالوحدة:

1- بتعيشي في الماضي:

في بعض الاحيان بتكون وحدتنا بسبب اننا عايشين في الماضي لما اي حاجة او موضوع يمشي مش زي ما احنا عايزين, في الحالة دي بنفضل عايشين في الماضي وبنفكر فيه, ولو لقيتي نفسك كده تعرفي انك بتتفاعلي مع الموضوع بطريقة غلط حتى لو حاولتي قبل كده انك تنسي الماضي ومنجحتيش يبقى اعرفي انك ماشية على الطريقة الغلط طول الوقت وده اكيد هيديكي نفس النتيجة, وفي الحالة دي ممكن تغيري طريقة تفكيرك عشان تعملي تغييرات ايجابية.

وممكن تكون الوحدة معاكي من الطفولة من غير ما تحسي, لو كنتي مثلا خجولة في طفولتك وبتلاقي صعوبة انك تتواصلي مع اللي حواليكي, ممكن يكون ده السبب انك حاسة بالوحدة لحد دلوقتي, حتى لو حاسة بثقة اكتر في نفسك وحواليكي اصحاب كتير.

اسباب الشعور بالوحدة في العلاقة 1
اسباب الشعور بالوحدة في العلاقة 1

2- مش عارفة انتي عايزة ايه:

لو مش عارفة انتي عايزة ايه في الحياة وفي علاقاتك, ومش عارفة قيمتك او مش حاسة باهميتك, في الحالة دي هتلاقي نفسك بتعملي حاجات انتي مش عايزة تعمليها, وده هيزود عندك مشاعرعدم الانتماء, وهتحسي بالوحدة.

عشان كده لازم تكتشفي انتي مين وعايزة ايه بالظبط من الحياة, وبعدها اعملي اللي انتي لاقية نفسك فيه وعايزة تعمليه فعلا.

مثلا لو انتي مش عارفة انتي عايزة ايه من علاقتك او من شريكك في العلاقة, في الحالة دي انتي ممكن تكوني مع شخص مش قادر يحسسك بقيمتك واهميتك ويديكي اللي انتي عايزاه, ولكن مش هنقدر نجيب اللوم عليه او انها غلطته لانك انتي اصلا مش عارفة انتي عايزة ايه وبالتالي هو مش هيقدر يقدمهولك, وطول ما انتي مش عارفة انتي عايزة ايه هتفضلي كده منفصلة عن شريكك ومش قادرين تفهموا بعض.

اسباب الشعور بالوحدة في العلاقة 2
اسباب الشعور بالوحدة في العلاقة 2

3- انعدام التواصل مع شريكك:

السبب الاكتر وضوح انتي ليه ممكن تكوني حاسة بالوحدة في العلاقة, هو نقص او انعدام التواصل مع شريكك, لان في الحالة دي هيكون صعب تلبية احتياجاتك اللي انتي اصلا مش عرفاها او انه يعرف يسعدك, عشان كده لو فضلتي منغلقة ومتكلمتيش مع شريكك في كل حاجة حالة الانفصال هتزيد, ولو انتي مش قادرة تنقلي مشاعرك لشريكك لانك مش بتثقي فيه, فأكيد انتي محتاجة تعرفي سبب ده.

اسباب الشعور بالوحدة في العلاقة 3
اسباب الشعور بالوحدة في العلاقة 3

– ازاي تتخلصي من الشعور بالوحدة؟

1- قضي وقت اكتر مع شريكك:

اكيد انتي مش عايزة ان الشعور بالوحدة يستمر, عشان كده مهم انك متعزليش نفسك, فلو انتي وشريكك مش بتشوفوا بعض بقدر كافي او زي ما انتي عايزة, فضروري انك تتكلمي معاه في ده ووصلي له شعورك انك عايزة تقضي معاه وقت اكتر, واكيد ضغوطات الحياة ممكن تكون بتزود حالة الانفصال بين الزوجين, لكن حاولوا بقدر الامكان انكم تلاقوا وقت اكتر تقضوه مع بعض.

اسباب الشعور بالوحدة في العلاقة 4
اسباب الشعور بالوحدة في العلاقة 4

2- اتكلمي معاه:

لو مش بتتكلمي معاه بما فيه الكفاية, فده الوقت انك تغيري ده وتتكلمي معاه اكتر, ولو حاسة انك بتتواصلي مع شريكك بما فيه الكفاية, اسألي نفسك “هل قلت له اني حاسة بشعور بالوحدة؟”.

ولو مسألتيهوش السؤال ده يبقى اعرفي انك مش بتتكلمي معاه بما فيه الكفاية عن مشاعرك.

لو مشاركتيش مشاعرك مع شريكك, ومتكلمتيش معاه في اسباب الشعور ده, ده هيزود حالة الانفصال, وهيخليكي تحسي بالوحدة, لازم انك تتواصلي بشكل اكبر مع شريك حياتك وتتناقشي معاه في كل حاجة انتي حاسة بيها وتقولي له مشاعرك كلها وطلعي كل اللي جواكي.

اسباب الشعور بالوحدة في العلاقة 5
اسباب الشعور بالوحدة في العلاقة 5

3- قابلي ناس جديدة واعملي حاجات جديدة:

في بنات كتير بيقعوا في الغلطة دي لما بيدخلوا علاقة بيقفلوا على نفسهم ويقطعوا التواصل عن باقي العالم وعالمهم بينحصر بس على الشخص المرتبطين بيه, وبيبطلوا يكلموا او يقابلوا اصحابهم او حتى يقطعوا علاقتهم بيهم, وبتبقى الحياة كلها بتدور حوالين شخص واحد هو الوحيد اللي المفروض نطلع فيه كل عواطفنا.

ودي تعتبر فعلا كارثة وحاجة غير صحية بشكل رهيب, لانك بتحطي الضغط كله عليه وعايزاه متفرغ لك 24 ساعة وده هيسبب مشاكل كتير في العلاقة, وهيأدي في النهاية لزيادة شعورك بالوحدة, لانك بكل بساطة قطعتي نفسك عن العالم كله وقفلتي على نفسك وخليتي حياتك كلها بتدور حوالين شريكك بس.

عشان كده نصيحتنا ليكي انك ترجعي تشوفي اصحابك وتكلميهم وتقابليهم, واتعرفي وقابلي ناس جديدة, واعملي حاجات جديدة تجدد حياتك, يعني يبقى ليكي حياة خاصة بيكي متبقاش حياتك كلها مقتصرة على شريكك وبس.

اسباب الشعور بالوحدة في العلاقة 6
اسباب الشعور بالوحدة في العلاقة 6

8 عادات سيئة ممكن تتسبب في تدمير العلاقة لازم تتجنبيهم

عادات ممكن تدمر العلاقة
عادات ممكن تدمر العلاقة

مقالات متعلقه

تفضلي سينجل افضل من المحاربة في علاقة غلط ، اعرفي السبب

تفضلي سينجل افضل من المحاربة في علاقة غلط ، اعرفي السبب

صفات المرأة المثالية اللي دايما بيقدرها الرجل ويحب وجودها في شريكة حياته

صفات المرأة المثالية اللي دايما بيقدرها الرجل ويحب وجودها في شريكة حياته

هل الصمت هيخليه يشتاقلك؟ اعملي ال 12 حاجة دول عشان تتأكدي ان ده هيحصل

هل الصمت هيخليه يشتاقلك؟ اعملي ال 12 حاجة دول عشان تتأكدي ان ده هيحصل