10 طرق فعالة تقولي بيهم “لا” من غير ما تحسي بالذنب او بالاحراج وتحافظي على علاقاتك
هل بتقدري بسهولة تقولي “لا” لزمايلك او اصحابك او قرايبك لو طلبوا منك خدمة؟ بالنسبة لناس كتير ده يعتبر تحدي ومهمة صعبة, في الغالب معظم الناس بيخافوا انهم يقولوا “لا” حتى لو هتخلي الامور اسهل بالنسبة لنا لو قولناها بكل بساطة, لكن احنا بنفضل نتجنب اي جدال او سوء تفاهم وبنختار الطريق الاسهل, لكن ده هيخلينا في الاخر نعمل حاجات احنا مجبرين عليها ومش عايزين نعملها, عشان كده لازم تتعلمي انك تقولي “لا”, والنهاردة من خلال المقال بتاعنا هنساعدك في المهمة دي وهنقولك طرق ترفضي بيهم طلب شخص وتقولي لا من غير احراج او احساس بالذنب وفي نفس الوقت تحافظي على علاقاتك.
طرق ترفضي بيهم طلب شخص وتقولي لا:
1- حاولي تفهمي ليه هتقولي “لا” لحاجة معينة:
قبل ما تبني علاقات مع اي اشخاص, لازم تفهمي نفسك كويس وتعرفي ايه المهم بالنسبة وايه اللي مش مهم, وعشان تقدري تعرفي ده اعملي قايمة كده بالاشخاص والاحداث واي حاجة عايزة تخصصي لها من وقتك, عشان تقدري تحددي اولوياتك لانك لو محددتيش بالظبط ايه المهم عندك, هيبقى صعب عليكي تحددي ايه اللي المفروض يستحق ياخد من وقتك وايه اللي مش مهم والمفروض مضيعيش فيه وقت, لان اغلبنا تقريبا دايما في صراع داخلي حوالين هل احنا بنعمل الحاجة صح ولا لا.
2- اعرضي بديل:
ده يعتبر اسهل اختيار لرفض طلب شخص انك تقدمي بديل, مثلا لو صاحبتك عايزة تشوفك وحددت ميعاد وانتي بقالك فترة مشفتيهاش وفي نفس الوقت مش هتقدري تقابليها في اليوم ده, يبقى تقولي لها مش هينفع وفي نفس الوقت توعديها انك هتشوفيها خلال الاسبوع, ومتعمليش حاجة مش مناسبة ليكي عشان بس حاسه بالذنب.
3- بيني تعاطفك:
لو مش هتقدري تساعدي شخص في خدمة معينة طلبها منك, حاولي تبيني له انك متعاطفة معاه وتظهري انك مهتمة وانتي بتسمعية ومتفهمة جدا انه في موقف صعب, وتتمني له حظ كويس وانه يلاقي المساعده, الطريقة دي هتخلي الشخص ده يحس بشعور افضل ويقبل رفضك او انك مش هتقدري تساعديه.
4- قولي “لا” للطلب مش للشخص:
لما ترفضي متقلقيش ان رفضك ممكن يسيء للشخص با ي شكل, لكن رفضك للمساعدة معناه بس انك مش هتقدري تساعدي, ومافيش اي حاجة شخصية اتجاه الشخص نفسه, يعني خلي رفضك بطريقة مهذبة وفي نفس الوقت قاطع او حازم يعني قولي “لا” بشكل صريح ده هيوصل للشخص اللي قدامك انك فعلا مش هتقدري تساعديه.
5- اشرحي السبب:
مش كل الاشخاص يقدروا يرفضوا طلب من غير ما يشرحوا السبب, والشخص اللي بيطلب منك خدمة اكيد هيكون منتظر كام كلمة تبرري بيهم رفضك, ومش مطلوب منك تفسير طويل ومفصل, لكن قولي بس الظروف اللي هتمنعك من المساعدة باختصار, ممكن تكوني رايحة للدكتور مثلا, او تعبانة محتاجة ترتاحي, او اي سبب تاني, المهم بس تكوني صادقة مع الشخص.
6- مرني نفسك انك تقولي كلمة “لا”:
كل اللي احنا قولناه ده هيفضل نظري الا اذا بدأتي انك تمرني نفسك انك تقولي كلمة “لا” لاي شخص, يعني ابدأي مرني نفسك مع الاشخاص الاغراب عنك مثلا لو قعدة في كافية او مطعم وقدمولك حاجة انتي مش عايزاها قولي “لا” من غير ما تحسي باحراج.
او ممكن وانتي قعدة لوحدك في البيت كرري كلمة “لا” 10 مرات, ده هيساعدك تبقي واثقة من نفسك اكتر في المواقف المستقبلية.
7- ضيفي مجاملة للرفض:
ارفضي مساعدة شخص لكن في نفس الوقت حوليها لمجاملة, مثلا قولي له “شكرا انك افتكرتني”, او “انا مقدرة جدا انك جيت سألتني قبل اي حد”, واتمني للشخص حظ كويس.
8- خليكي مستعدة للاختيار:
ممكن يكون صعب نقول “لا” مش عشان خايفين من اساءة الفهم من اللي قدامنا, ولكن عشان بنبقى مش عايزين اننا نضيع فرصة معينة مننا, لكن في الحالة دي الرفض مش بيكون فرصة ضايعة لكن ممكن يبقى حل وسط, يعني لما ترفضي حاجة معينة اتفقي على حاجة تانية, وده معناه ان قدامك الاختيار ما بين حاجتين.
9- خليكي قوية قصاد الالحاح:
في بعض الناس بيكونوا لحوحين جدا في طلبهم وانهم مش هيمشوا غير لما طلبهم يتنفذ, وده يمكن بيحصل اكتر مع القرايب او الاشخاص المقربين اوي مننا, في الحالة دي افضل حاجة انك تكرري اجابتك اكتر من مرة وتثبتي على موقفك انك مش هتقدري تساعدي.
وده اكيد مش معناه انك مش متعاطفة! انتي ممكن مثلا تحضني الشخص ده عشان تحسسيه بالتعاطف, لكن متخليش كلمة “لا” في النهاية تتحول ل “ممكن” وفي النهاية اكيد هتبقى “نعم”, وهتعملي الحاجة وانتي مجبرة.
10- متاخديش وقت طويل في الاجابة:
اكيد في بعض الاوقات بيكون الرفض صعب, لكن لو اخدتي وقت طويل على ما تردي او تقولي “ممكن” وبعدين تقولي “لا”, اكيد ده مش هيكون افضل ابدا, لكن الرفض الواضح اكتر تهذيب والطف, ومتحاوليش تضغطي على نفسك وتعملي حاجات كتير في نفس الوقت.
– ازاي ترفضي علاقة:
حابين نضيف لكم نقطة اخيرة ومهمة جدا, في بنات كتير بيتحطوا في موقف ان شخص يكون معجب بيكي ويبقى عايز يقرب منك, وانتي مش بتعرفي ترفضية, وفي نفس الوقت مينفعش توافقي لمجرد انك حاسه بالذنب من ناحيته, لان ده هينتهي في الاخر بشكل مش كويس, وهيبقى تضييع وقت ليكي وللشخص التاني, وهتفضلي متضايقة طول الوقت, عشان كده في الحالة دي يعتبر الصدق افضل سياسة, قوليله بس انك مش مستعدة لعلاقة او ارتباط في الوقت الحالي.
في النهاية الاختيار متروك ليكي, ياما تعيشي حياتك تحققي اهداف غيرك وتبقي حاسه على طول بالضعف, او تعيشي حياتك زي ما انتي عايزاها وتبقي متصالحة مع نفسك ومع اللي حواليكي.
وممكن تشاركونا تجاربكم وتقولوا لنا ازاي بترفضوا طلب شخص؟
10 طرق تعرفي بيهم اذا كنتي بتحبي نفسك ولا لا.. وازاي تتعلمي تحبي نفسك اكتر !
