10 نصايح هتساعدك تستمري على عادات رمضان على طول

بقلمريهام محمود فيمنوعات visibility254

في رمضان كلنا بنحاول نعمل فيه العادات اللي مش بنقدر نعملها في الايام العادية بسبب الشغل او الدراسة او غيره زي الصلوات لو مش بنصلي كل صلاة في ميعادها في الايام العادية بنحاول نعمل ده في رمضان على قد ما نقدر, وقراءة القرآن, والاذكار والادعية, او نعمل اي اعمال خيرية, بنحاول نواظب عليها اكتر في رمضان, لكن مشكلتنا بتبدأ لما بيخلص الشهر مش بنعرف نواظب وبنرجع زي ما كنا قبل رمضان, لكن احنا نقدر نحافظ على العادات دي بعد رمضان كمان, لان علماء النفس اتفقوا ان اي شخص محتاج 3 اسابيع عشان يطور اي عادة جيدة عنده, يعني لو بتصلي بانتظام, او بتصومي, او تتحكمي في اعصابك, او تكوني صبورة اكتر, او اي عادة تانية لو استمريتي عليها خلال الشهر اتأكدي انك ان شاء الله هتقدري تكملي فيها بعد رمضان, النهاردة من خلال موضوعنا هنقولك ازاي تحافظي على عادات رمضان, وتستمري عليها وتقدري تعمليها بعد ما رمضان يخلص.

ازاي تحافظي على عادات رمضان:

1- ادعي ربنا:

دايما خلي دعائك لربنا مينقعطش ابدا, لان ربنا زي ما ساعدك تواظبي على العادات الكويسة خلال شهر رمضان, قادر يساعدك انك تحافظي عليها بعد رمضان, ادعي ربنا دايما انه مش بس يساعدك تحافظي على العادة الكويسة, لكن كمان انه يقبلها منك ويجعلها طريق انها تقربك منه اكتر.

2- خليها عادة في يومك:

لو عايزة تحافظي على اي عادة كويسة بدأتيها في رمضان, فلازم تتأكدي انها تبقى في جدولك اليومي, يعني مثلا الصيام الرسول عليه افضل الصلاة والسلام اوصى بصيام الاتنين والخميس, ودي تعتبر طريقة كويسة جدا عشان تحافظي على عادة الصيام, ويبقى الصيام بالنسبة لك مش مرهق او متعب لما يجي رمضان تاني.

او مثلا كنتي بتعملي اعمال خير كتير في شهر رمضان, ممكن انتي طول السنة تخصصي مبلغ شهري من مرتبك لعمل خير, عشان تحافظي على عادة عمل الخير والعطاء طول السنة.

عشان كده حاولي انك تخلي اي عادة كويسة جزء من جدولك اليومي او الاسبوعي عشان تحافظي عليها طول السنة, وتاخدي ثواب من ربنا على طول.

ازاي تحافظي على عادات رمضان
ازاي تحافظي على عادات رمضان

3- فكري في يومك كل ليلة:

كل ليلة قبل ما تنامي كده حاولي تقيمي نفسك,و افعالك وكلامك وكل حاجة عملتيها خلال اليوم, دي تعتبر طريقة كويسة جدا عشان تحسني من نفسك, والتقييم الذاتي ده مش بس هيوريكي مكانك او المفروض تروحي فين او تعملي ايه, لكن كمان هيفكرك باللي المفروض كنتي تعمليه واللي متعمليهوش.

حطي كده كل يوم كام سؤال عن عادة كويسة محددة في يومك, مثلا اسألي نفسك صليتي كل الصلوات ولا لا؟ راضية عن صلاتك بشكل كافي واديتيها حقها ولا لا؟ هل صليتي في الوقت المحدد ولا اتأخرتي؟ ده هيفكرك تحافظي على العادة دي وكمان هيخليكي تحسني من نفسك عشان تعمليها بشكل افضل المرة الجاية.

4- قيمي نفسك بشكل اسبوعي:

التقييم الاسبوعي هيساعدك تشوفي الصورة الاكبر, وتقيمي نفسك على مستوى ابعد, وانك هتقدري تحافظي على العادة دي قد ايه, وممكن تعملي التقييم ده على اساس شهري او سنوي.

وممكن لو حابه تعملي رسم بياني كده بسيط تستخدميه في تقييم نفسك, ترسمي عليه مدى رضاكي عن نفسك في ممارسة اي عادة الكويسة.

ازاي تحافظي على عادات رمضان
ازاي تحافظي على عادات رمضان

5- احصلي على مساعدة صديق:

لو ليكي صاحبة او اتنين او اكتر قريبين منك وحاسه انه ممكن تتشاركوا في عادة جديدة كويسة اتفقي معاهم واعملوها مع بعض, لان الدعم هيشجعك تستمري وتحافظي عليها, ومش بس كده كمان هيقربك اكتر منهم ويخلي علاقتكم اقوى.

او بدل ده ممكن تدوري على مجموعات تشجعك انك تستمري على اي عادة كويسة, مثلا لو انتي انتظمتي على قراءة او حفظ القرآن في رمضان وعايزة تحافظي عليها, ممكن تدوري على  دار لحفظ القرآن عشان تستمري عليها.

6- متيأسيش او تنهاري لو عملتي غلطة واحدة:

التوبة بعد الغلط من اجمل الحاجات في الدين الاسلامي, ربنا دايما فاتح باب التوبة بعد اي حاجة غلط بنعملها, ولازم نفتكر دايما اننا بشر وبنغلط, والكمال لله وحده.

يعني مثلا لو انتي واظبتي على الصلاة في مواعيدها طول شهر رمضان, ولكن بعد رمضان لقيتي نفسك بتأخريها شوية, اولا اعرفي قيمي نفسك ولما تلاقي نفسك مقصرة, اطلبي الغفران من ربنا, وابذلي اقصى ما عندك عشان ترجعي تواظبي عليها في مواعيدها تاني, واطلبي من ربنا انه يساعدك.

ولازم انك متتخليش ابدا عن صلاتك لمجرد انك فاتتك صلاة او اتنين في مواعيدها, لا كملي, وحاولي انك بعد كده تواظبي على الصلاة في ميعادها زي ما قولنا.

ازاي تحافظي على عادات رمضان
ازاي تحافظي على عادات رمضان

7- اسألي نفسك انتي ليه محافظة على العادة دي:

النية هي مفتاح قبول ربنا لاي عمل صالح بنعمله, فلو انتي محافظة على عادة معينة عشان تبيني لشخص او للي حواليكي انك مواظبة ومحافظة عليها, يبقى هتيجي بعد فترة هتبطلي تعمليها.

لكن لو حافظتي على عادة لوجه الله بس, ربنا مش بس هيكافئك على ده, لكن نيتك الخالصة لربنا هتساعدك وتبقى دافع وحافز انك تكملي وتحافظي على العادات الكويسة او على عمل الخير.

8- متتوقعيش نفس النتايج:

في شهر رمضان ممكن عشان تصلي الفجر في ميعادة تفضله صاحية, او تنامي مثلا على الكنبة نص نوم كده عشان تقدري انك تقومي تصلي الفجر, لكن بعد رمضان ده مش بيحصل.

عادة في رمضان معظمنا بيبقى سهل عليه يحافظ على كل العادات الكويسة, والجزء الصعب هو بيكون بعد رمضان اللي لازم تعملي فيه مجهود اكبر عشان تحافظي على عادات رمضان, سواء انك تصحي للفجر, او للمدخنين انهم يبطلوا تدخين, او تاكلي كميات اكل اقل, او تكوني صبورة اكتر, وغيرها من العادات.

واشكري دايما ربنا انك قادرة تحافظي على العادات الكويسة وتستمري عليها بعد رمضان بشكل منتظم.

ازاي تحافظي على عادات رمضان
ازاي تحافظي على عادات رمضان

9- اعملي العادات الكويسة ببطء:

اعملي عمل الخير باخلاص واعتدال, وافتكري دايما اننا كلنا هندخل الجنة برحمة ربنا, يعني عمل الخير مش بحجمه ولكن بالنية الخالصة والاستمرار, وافتكري ان اكتر الحاجات المحبوبة لربنا هي الحاجات العادية المستمرة حتى ولو كانت صغيرة.

مثلا لو انتي في رمضان كنتي متحمسة اوي لقراءة القرآن وبتقعدي تقري نص ساعة او ساعة يوميا, ولكن بعد رمضان لقيتي نفسك بقيتي ابطأ, او كسولة شوية, او في ايام مش بتقري فيها خالص, لكن مع ذلك انتي عايزة تحافظي على العادة دي, يبقى في الحالة دي بدل ما تحاولي تقري نفس الفترة اللي كنتي بتقريها في رمضان, ممكن تقلليها شوية حتى لو كانت خمس دقايق بس في اليوم, لكن متتخليش عنها خالص.

لو حافظتي على الخمس دقايق اليومية دي, ان شاء الله هتلاقي نفسك ان القرآن اللي بتقريه بيزيد بالتدريج كل يوم, وممكن كمان يعدي الفترة اللي كنتي بتقري فيها في شهر رمضان على المدى الطويل.

10- متديش لنفسك خيارات:

ايه اللي بيخليكي كل يوم تقومي لشغلك الصبح حتى لو كنتي تعبانة؟ ايه اللي بيخليكي تخرجي من سريرك الدافي كل يوم للجامعة او للمدرسة؟ انها حاجة حقيقة وواقع ولازم تعمليها, وانتي عارفة ان هيكون في عواقب سلبية لو مروحتيش شغلك هيرفدوكي ولو مروحتيش جامعتك او مدرستك هتفشلي.

علم النفس بيقولك استخدمي نفس الطريقة دي في التفكير لو عايزة تحافظي على عادة كويسة, يعني مثلا قولي لنفسك ان ربنا هيكون غضبان عليكي لو مصلتيش الفجر, بغض النظر عن اي ظروف حواليكي الدنيا برد او تعبانة, وان اهمالك لصلاة الفجر هيأدي لاعمال تانية سيئة او مش كويسة, وهيخلي ايمانك اقل, ومش هتبقي ناجحة في حياتك لان ربنا غضبان منك, وان ربنا ممكن يعاقبك باي طريقة على اهمالك لفروضك, ممكن مثلا يخليكي تفقدي وظيفتك او تحصلك مشاكل في حياتك بشكل عام, يعني زي ما بتفكري في العواقب السلبية من المخلوق سواء في شغلك او في دراستك, يبقى الاولى انك تفكري في العواقب السلبية من الخالق, ده هيخليكي تحافظي على عاداتك الكويسة وتستمري عليها على طول.

ازاي تحافظي على عادات رمضان
ازاي تحافظي على عادات رمضان

إزاى نعمل الخير فى رمضان