افكار ووصفات سهلة وسريعة للسحور في رمضان
وجبة السحور مهمة جدا عشان هي اللي بتدينا طاقة وبتخلينا نتحمل خلال اليوم ومنحسش بالجوع, عشان كده ضروري اننا نهتم بيها, ولان السحور بيكون في توقيت محتاجين فيه حاجات سهلة وسريعة, النهاردة هنقولكم مجموعة افكار ووصفات للسحور.
افكار ووصفات للسحور:
– نصايح لسحور صحي:
1- مهم جدا ان السحور يتكون من اكلات صحية, ونبعد عن الوجبات السريعة او الاكلات اللي مافيش فيها اي فوايد غذائية, ونحاول نتجنب الكافيين, والكربوهيدرات المكررة او المصنعة زي السكر والدقيق الابيض.
2- ناكل الكربوهيدرات عالية الالياف, لانها بتملى المعدة فترة طويلة ومش هتخليكي تحسي بالجوع بسرعة, او تحسي بالاجهاد خلال اليوم, زي الفاكهة والخضار والحبوب الكاملة.
3- لازم السحور كمان يحتوي على البروتين لانه كمان من المكونات اللي هتخليكي تحسي بالشبع فترة اطول, لو ضيفتي مكون غني بالبروتين هيديكي قدرة على التحمل طول فترة الصيام, زي البيض واللحوم والجبن.
4- كمان من اهم المكونات في السحور هي المية والسوايل زي اللبن او العصاير, ولكن ابعدي عن المشروبات اللي فيها كافيين زي القهوة والشاي, لان المشروبات دي ممكن تسبب جفاف وتخليكي تحسي بالعطش.
– طرق مختلفة لعمل البيض:
1- البيض بالجبنة الفيتا:
المكونات:
2 بيضة كبيرة.
¼ معلقة صغيرة فلفل.
2 معلقة كبيرة جبنة فيتا.
2 معلقة صغيرة لبن.
الطريقة:
في طبق اضربي البيض مع الفلفل, وفي طبق تاني اخلطي الجبنة مع اللبن وقلبيهم مع بعض كويس بالشوكة, في طاسة تيفال حطي معلقة زيت زيتون وحطيها على النار وصبي فيها البيض, وبعد ما يستوي حطي فوقيه الجبنة ولفية على شكل اسطوانة.
2- البيض بالمشروم:
المكونات:
4 بيضات متوسطة الحجم.
1 بصلة متوسطة الحجم.
مشروم.
زيت.
ملح وفلفل حسب الرغبة.
الطريقة:
سخني الزيت في طاسة على نار متوسطة, ضيفي البصل وقلبيه لحد ما يدبل, بعدها ضيفي المشروم وقلبيه لحد ما يطرى, ضيفي الملح والفلفل وسيبيه لحد ما المشروم يستوي, بعدها طلعيه من الطاسه في طبق, وممكن في نفس الطاسة او في طاسة منفصلة تضربي البيض وتحطيه, بعد ما البيض يستوي حطي فوقيه المشروم.
3- البيض بالبطاطس والجبنة:
المكونات:
4 ثمرات بطاطس متوسطة الحجم متقطعة مكعبات.
½ كوباية بصل مفروم.
2 معلقة صغيرة فلفل اسود.
¼ معلقة صغيرة ملح.
¼ كوباية زيت نباتي.
3 معالق زبدة.
4 بيضات.
2 معلقة كبيرة لبن.
4 شرايح لحمة حمرا ممكن نستبدلها بالسجق.
2 كوباية جبنة شيدر مبشورة.
للتزيين “اختياري”:
ثمرة افوكادو مفروم.
1 ثمرة طماطم صغيرة.
1 بصلة خضرة.
الطريقة:
سخني الفرن على درجة حرارة 375 درجة فهرنهايت, سخني الطاسة على نار متوسطة وضيفي الزيت, وبعدين ضيفي البطاطس والبصل والملح والفلفل وقلبيهم مع بعض كويس لحد ما تتحول البطاطس للون البني, طلعي البطاطس في طبق وضيفي لها البيض واللبن وشوية فلفل اسود, قطعي اللحمة او السجق حسب اللي هتستخدميه لقطع صغيرة, هاتي طاجن او صينية صغيرة حطي الزبدة وحطيها على النار وضيفي لها خليط البطاطس ومعاها قطع اللحمة او السجق وحطي على الوش الجبنة الشيدر وممكن تستخدمي جبنة موتزرايلا, وحطيها في الفرن لمدة 15 دقيقة.
4- الشكشوكة:
المكونات:
1 ثمرة طماطم متقطعة مكعبات صغيرة.
1 ثمرة فلفل اخضر متقطعة قطع صغيرة.
5 بيضات.
بصلة متقطعة قطع صغيرة.
ملح – فلفل.
2 معلقة زبدة.
الطريقة:
اضربي البيض, وسخني الزبدة في طاسة على النار, حطي فيها البصل قلبيه لحد ما يدبل, وبعدها ضيفي له الفلفل الاخضر وقلبيهم مع بعض كام دقيقة وبعدها ضيفي الطماطم وسيبيها تستوي, وبعدين ضيفي البيض قلبيه لحد ما يستوي.
5- عجة البيض:
المكونات:
5 بيضات.
بقدونس.
بصلة متقطعة صغير.
ملح – فلفل.
2 معلقة كبيرة زبدة.
معلقة كبيرة دقيق.
الطريقة:
في طاسة على النار حطي الزبدة والبصل قلبيهم مع بعض لحد ما البصل يدبل ويبقى لونه دهبي, ضيفي البقدونس والدقيق وقلبيهم, ارفعي الطاسة من على النار, وهاتي طبق اضربي فيه البيض وضيفي له الملح والفلفل, وبعدها صبي خليط البصل على البيض وقلبيهم كويس, رجعي الخليط في الطاسة تاني, وحطيه على النار وسيبيه لحد ما يستوي.
– طرق مختلفة للجبنة:
1- الجبنة بالطماطم:
المكونات:
1 كوباية طماطم متقطعة صغير.
½ كوباية جبنة فيتا.
روزماري.
2 معلقة كبيرة زيت زيتون.
¼ معلقة صغيرة ملح.
¼ معلقة صغيرة فلفل اسود.
الطريقة:
اخلطي كل المكونات مع بعض وقلبيهم وسيبيهم ربع ساعة لحد ما المكونات كلها تمتزج مع بعضها كويس وتاخد النكهة.
2- جبنة كريمي بالاعشاب والثوم:
المكونات:
1 معلقة صغيرة ثوم مفروم.
¾ معلقة صغيرة بهارات.
½ معلقة صغيرة ملح.
1/8 معلقة صغيرة بصل بودرة.
كوباية جبنة كريمي.
الطريقة:
في طبق حطي الجبنة وضيفي لها كل المكونات وقلبيها وحطيها في التلاجة ساعة قبل الاكل.
3- جبنة في الفرن:
المكونات:
½ كوباية زبدة مخفوقة.
2 كوباية جبنة شيدر مبشورة.
كوباية دقيق.
معلقة صغيرة فلفل.
½ معلقة صغيرة كمون مطحون.
¼ معلقة صغيرة شطة “اختياري”.
زيتون اخضر متقطع.
الطريقة:
في طبق اخلطي الزبدة مع الجبنة وقلبيهم بالشوكة او ممكن تحطيهم في الخلاط لحد ما يبقى الخليط ناعم, ضيفي لهم الدقيق والملح والفلفل والشطة, وغطيهم لمدة ساعة وممكن تجهزيها من قبلها بيوم, بعدها ضيفي الزيتون المتقطع لخليط الجبنة, اعملي كور صغيرة من الخليط ورصيها في طبق على ورق زبدة, وحطيها في التلاجة لحد ما تتجمد او تبقى ماسكة نفسها, سخني الفرن على 400 درجة فهرنهايت, طلعي الجبنة من التلاجة سيبيها ربع ساعة وبعدين حطيها في صينيه ودخليها الفرن لمدة 15 دقيقة, طلعيها وسيبيها تبرد وبالهنا والشفا.
– وصفات مختلفة للفول:
1- فول بالزبدة:
طريقته بسيطة جدا حطي الفول في طاسة وضيفي له الزبدة والملح والفلفل, وكده يبقى جاهز عندك طبق الفول.
2- فول بالطحينة:
المكونات:
4 كوبايات فول.
زيت ذرة.
فصين ثوم.
2 معلقة كبيرة طحينة.
عصير ليمون.
2 معلقة صغيرة كمون.
ملح – فلفل.
الطريقة:
حطي الفول في طاسة وضيفي له الزيت والطحينة والثوم والملح والفلفل والكمون وعصير الليمون, وقلبيهم مع بعض.
3- الفول الاسكندراني:
المكونات:
فول مدمس.
ثوم.
بصل.
فلفل الوان.
خل.
عصير ليمون.
كزبرة خضرا.
زيت.
ملح
كمون.
شطة.
فلفل اخضر حار.
طماطم متقطعة قطع صغيرة او صلصة طماطم.
الطريقة:
حطي طاسة على النار سخني فيها الزيت, ضيفي البصل والثوم المتقطع والفلفل الالوان والفلفل الحار والطماطم او صلصة الطماطم, وقلبي المكونات كويس لحد ما تستوي مع بعضها كويس, وبعدها ضيفي الفول وعصير الليمون والخل, والكمون والملح والشطة, وفي الاخر رشي الكزبرة الخضرا, وقدميه.
4- فول بالبيض:
المكونات:
4 بيضات.
علبة فول مدمس.
بصلة.
2 معلقة زبدة.
معلقة صغيرة كمون.
ملح – فلفل.
الطريقة:
حطي الفول في طاسة وضيفي عليه الملح والفلفل والكمون, وبمجرد ما الفول يسخن اهرسية, وفي طاسة تانية سخني الزبدة وحطي عليها البصل المتقطع وقلبيه لحد ما يدبل ولونه يبقى دهبي فاتح, ضيفي له الفول وقلبيهم كويس, بعدين اضربي البيض وضيفيه لخليط الفول, وقلبيهم وسيبيهم لحد ما البيض يستوي.
5- صينية فول بالبيض والخضار:
المكونات:
4 بيضات.
3 ثمرات طماطم متقطعة.
2 كوباية فول مدمس.
2 ثمرة فلفل متقطع.
2 معلقة كبيرة زيت.
بصلة مفرومة.
حزمة بقدونس متقطعة.
معلقة صغيرة ملح.
رشة كمون.
معلقة صغيرة فلفل.
رشة نعناع مجفف.
الطريقة:
في طاسة على النار ضيفي الزيت والبصل وقلبيه لحد ما يدبل ولونه يصفر, ضيفي الفلفل الاخضر, والطماطم وقلبي المكونات, وسيبيها شوية لحد ما تدبل, ضيفي الفول, وسيبيه لحد ما يغلي, وبعدين انقليه في صينية بايريكس, وتبليه بالملح والفلفل والكمون والنعناع, وفي كل جنب من جوانب البايريكس اعملي حفرة وحطي جواها بيضة, حطي الفول في الفرن على درجة حرارة 180 لمدة ربع ساعة او لحد ما البيض يستوي, وطلعيه ورشي على وشه البقدونس.
– وصفة الجرانولا:
الوصفة دي غنية بالالياف والبروتين اللي هتخيكي حاسه بالشبع طول اليوم.
لتحضير الوصفة لشخص في طبق ضيفي ½ كوباية زبادي عادي او بطعم الفانيليا مع ¼ كوباية جرانولا “موجودة في السوبر ماركت هنلاقيها زي علبة الشوفان او الكورن فليكس” مع ¼ كوباية توت او فراولة او اي نوع فاكهة تفضلوه, ورشي عليهم من فوق عسل نحل, وكده تبقى الوجبة جاهزة للاكل.
– بودنج الارز:
المكونات:
1 كوب ارز.
½ كوباية سكر.
6 كوبايات لبن.
1 كوب قشدة تقيلة “Heavy cream”.
معلقة صغيرة فانيليا.
عود قرفة خشب.
شوية جوزة الطيب.
الطريقة:
اخلطي المكونات كلها مع بعض في حلة على النار وقلبيهم وغطيه وسيبيه على نار هادية, وقلبيه من وقت للتاني, لحد ما الارز يستوي, والكمية دي تكفي من 4 – 6 اشخاص.
افكار جديدة لعمل الشوربة في رمضان السنة دي
