ايه الاكلات الصحية والاكلات اللي المفروض تتجنبيها في شهر رمضان
كتير مننا في شهر رمضان بيلغبط جدا في الاكل والسفرة بتبقى طول الشهر مليانة باكلات غير صحية وبنطلع بعد الشهر ده معدتنا تعبانة بسبب لغبطة الاكل والاصناف الدسمة اللي اكلنا منها بكميات كبيرة ده غير كمان زيادة الوزن, طيب هنعمل ايه ؟ احنا ممكن نعمل اكلات لذيذة وفي نفس الوقت صحية, وفي السطور الجاية هنعرف مع بعض الاكلات الصحية لرمضان, وكمان ايه اللي المفروض تتجنبيه.
الاكلات الصحية لرمضان:
– مرحلة تحضير الاكل:
1- اول حاجة عشان الاكل يكون صحي اشتري الخضار الطازة مش المجمد لانه بيحتوي على نسبة اكبر من الفيتامينات والمعادن.
2- استخدمي الفاكهة الطازة بانك تعملي عصاير في البيت من غير سكر, بدل العصاير اللي من بره اللي بيكون كلها سكريات.
3- اختاري منتجات الالبان المختلفة من لبن وجبنة وزبادي تكون قليلة الدسم.
4- اتجنبي استخدام السمنة والزبدة في الطبخ, واستبدليها بزيت نباتي بكمية قليلة, وممكن تستخدمي زيت زيتون.
5- اختاري اللحوم قليلة الدهون, لو سمك او فراخ يكون من غير جلد وحضريهم بالشوي او السلق او طبخهم, واتجنبي القلي.
6- وعشان سفرة رمضان تكون متكاملة وغنية بكل المغذيات لازم يكون فيها “الخبز, الحبوب, الخضار, اللحوم, البقوليات, والفاكهة, واللبن ومشتقاته”.
– تاكلي ايه وتتجنبي ايه من مجموعة الاكل الاساسية ؟
هنقولك مجموعة اختيارات صحية تقدري تختاري منها طول شهر رمضان, وهنقولك كمان الاكلات اللي تتجنبيها, عشان تحافظي على صحتك طول شهر رمضان.
اللحوم والبروتينات:
– اللي ممكن تاكليه:
السمك.
الفراخ, والديك الرومي من غير جلد, ويكون مشوي او مسلوق.
اللحوم الحمرا قليلة الدهون.
كميات معقولة من الاكلات البحرية زي الجمبري.
بقوليات “فاصوليا, عدس, بسلة”.
بيض “صفار البيض بس” 3 مرات في الاسبوع, وده شامل اللي داخل في الاكلات يعني لو اكلة فيها بيض تتحسب من ضمن الكمية المتحددة.
– الاكلات اللي تتجنبيها:
الفراخ والبط المقلي.
اللحوم كثيرة الدهون.
الكبدة, ولحم الاعضاء زي “الكلاوي, اللسان, القلب, المخ”.
السجق.
كميات كبيرة من الاكلات البحرية.
اللبن والجبنة ومنتجاتهم:
– اللي ممكن تاكليه:
اللبن قليل الدسم او خالي الدسم.
الجبنة قليلة الدسم.
الزبادي قليلة الدسم او خالية الدسم.
– اللي تتجنبيه:
اللبن كامل الدسم.
الايس كريم, والكريمة المخفوقة.
الزبادي كاملة الدسم.
الجبنة كاملة الدسم.
صلصة الكريمة, وصلصة الجبنة.
الفاكهة والخضار:
– اللي ممكن تاكليه:
كل انواع الخضار الطازة, المسلوقة, والمطبوخة في الفرن, او اللي متشوحة بس في زيت قليل.
الخضروات مع التوابل وعصير الليمون او زيت قليل.
الفاكهة الطازة, وعصير الفاكهة الطازة من غير سكر, وبكميات معقولة.
– اللي تتجنبيه:
جوز الهند “الفاكهة الوحيدة الغنية بالدهون المشبعة”.
الخضار المقلي.
الزبدة على الخضار المسلوق.
العصاير الغنية بالسكر.
الخبز والحبوب:
– اللي ممكن تاكليه:
الخبز العربي او الاسمر.
مكرونة او ارز من غير اضافات “سمنة او صلصة دسمة”.
الحبوب من غير اضافة دهون.
البطاطس المشوية او المسلوقة.
– اللي تتجنبيه:
المعجنات اللي فيها نسبة دهون عالية زي “الدوناتس, الكرواسون, الفطائر”.
الارز المقلي.
البطاطس المقلية.
الحلويات والكوكيز الغني بالسكر.
ودي تقريبا الاساسيات اللي المفروض نمشي عليها في وجبة الفطار والسحور عشان نضمن اننا بناكل اكل صحي طول شهر رمضان وفي نفس الوقت جسمنا بيحصل على كل المغذيات اللي لزماه. وكمان هتخليكي تصومي شهر رمضان براحة وقوة تحمل اكتر.
نصائح لتجنب الانتفاخ فى رمضان
