10 فوايد سحرية لزيت الارجان..ووصفات طبيعية للشعر والبشرة والضوافر

ريهام محمود
ريهام محمود
في
بشرة
2330

يمكن يكون في كتير مننا سمع عن زيت الارجان ولكن ميعرفش فوايده, اولا زيت الارجان بيستخرج من شجرة الارجان ودي موطنها الاصلي في المغرب, ومؤخرا اكتشفوا ان ليه فوايد جمالية كتير جدا للبشرة والشعر والضوافر والصحة, عشان كده هنلاقيه بقى يدخل في كتير من مستحضرات التجميل, وفي المغرب بيستخدموه لعلاج كتير من الامراض والمشاكل زي حب الشباب, وآلام المفاصل, وعلاج لمشاكل البشرة بشكل عام, ومشاكل الشعر, وفي السطور الجاية هنتعرف مع بعض على فوايد زيت الارجان, ووصفات طبيعية للبشرة والشعر.

– فوايد زيت الارجان:

1- مناسب لكل انواع البشرة:

الحاجة اللي بتميز زيت الارجان انه مناسب لكل انواع البشرة, للبشرة الجافة والعادية وحتى الدهنية لان البشرة بتمتصه بسهولة, ومش بيسيب بقايا لزجة او دهنية على الجلد, حتى انه كمان بيساعد على توازن افرازات الدهون في البشرة.

2- علاج طبيعي لحب الشباب:

على عكس المنتشر ان البشرة المعرضة لحب الشباب بتحتاج تقشير وتطهير من الدهون اكتر, لكن على العكس ان التقشير زيادة عن اللزوم ممكن يأدي لزيادة افراز الدهون عشان يعوض الزيوت اللي انتي شيلتيها من البشرة.

الافضل انك تستخدمي منظف خفيف مناسب لنوع بشرتك, وادهني بعدها كمية بسيطة من زيت الارجان, هيديكي نتايج هايلة جدا على البشرة.

3- علاج انقسام اطراف الشعر:

بعد غسل الشعر, حطي كمية من زيت الارجان على ايدك وافركيه لحد ما يبقى دافي, وبعدها دلكي الشعر بالزيت وركزي على الاطراف, هيعالج الاطراف المقصفة ويحسن الشعر ويخليه صحي وبيلمع.

4- تنعيم وترطيب الايد:

ممكن تستخدميه للايد, خدي منه كمية ودلكي بشرة الايد هتساعد على تنعيمها وترطيبها, وممكن تدلكي بيه الضوافر هيغذيها ويعزز نمو الضوافر, وهيقويها ويمنع تكسرها وانقسامها.

5- للعيون والرموش:

الارجان بيحتوي على خصائص مضادة للشيخوخة, عشان كده يعتبر مفيد جدا لو دهنتيه لمنطقة الجلد حوالين العين, هيساعد على تغذيتها ويمنع التجاعيد, ولو استخدمتي منه كمية صغيرة دهنتي بيها الرموش هيساعد على تطويلها وتكثيفها وهيخليكي تستغني عن الماسكارا.

6- ترطيب الشفايف:

يعتبر بلسم طبيعي للشفايف, ادهني الشفايف بكمية صغيرة من زيت الارجان, هيساعد على ترطيبها وتنعيمها ومنع الخشونة والتشققات وتقشر الشفايف.

7- تقوية الاظافر:

زيت الارجان غني جدا بفيتامين E عشان كده هو مفيد جدا لو دهنتيه على ضوافر الايد والرجل هيساعد جدا على تقويتها وزيادة نموها وهيحافظ عليها صحية, كمان الخصائص القوية المضادة للبكتيريا والالتهاب الموجودة في زيت الارجان هتساعد على منع الاصابة بامراض الجلد والضوافر اللي بتكون غالبا نتيجة ضعف الضوافر, يعني لو بتعاني من ضعف الضوافر هيكون زيت الارجان هو الاختيار المثالي ليكي.

8- علاج ومنع علامات التمدد:

زيت الارجان معروف كمان باسم “الزيت المعجزة” بيساعد على منع علامات التمدد, وبيمنع ظهور علامات التمدد نتيجة الحمل, وزيادة او فقدان الوزن, لانه بيساعد على تليين وزيادة مرونة انسجة الجلد.

9- مضاد للالتهابات:

زيت الارجان غني جدا بالفلافونيدات اللي ليها قدرات عالية جدا مضادة للالتهابات, وعلاج المشاكل الداخلية والخارجية, مثلا لو بتعاني من الم العضلات والمفاصل, افركي كمية بسيطة من زيت الارجان على اماكن الالتهاب والالم.

كمان للي بيعانوا من مشاكل الجهاز الهضمي او المثانة ممكن يستفيدوا من زيت الارجان, بانهم يدخلوا زيت الارجان في نظامهم الغذائي, ممكن تستخدميه في الطبخ, او تضيفيه للسلطة او للشوربة.

10- مضاد للشيخوخة:

زيت الارجان بيتكون من حوالي 80% من الاحماض الدهنية الطبيعية, والاحماض دي ليها قدرة هايلة جدا في علاج علامات الشيخوخة, وثبت بالفعل ان استخدام زيت الارجان بانتظام بيقلل من التجاعيد العميقة, وبيمنع من ظهور تجاعيد جديدة من خلال استعادة خصائص البشرة الطبيعية, وتعزيز مرونة وشباب البشرة, وزيادة معدل التجديد لخلايا الجلد الصحية بشكل طبيعي, وبيساعد على منع ظهور بقع العمر.

فوايد زيت الارجان 1
فوايد زيت الارجان 1

– وصفات طبيعية بزيت الارجان للبشرة والشعر والضوافر:

1- وصفة لمنع علامات الشيخوخة:

اخلطي معلقة عصير ليمون, مع 3 معالق صغيرة لبن, ومعلقة صغيرة عسل, و3 نقط من زيت الارجان, قلبيهم وحطي الخليط على البشرة لمدة 10 دقايق, وكرريه يوميا.

2- وصفة لبشرة نضرة:

ممكن تضيفي كمية صغيرة جدا من زيت الارجان لكريم الاساس اللي بستخدميه بشكل يومي, هيدي نضارة للبشرة.

3- لتنضيف البشرة:

ممكن تستخدمي زيت الارجان, بعد غسل ازالة المكياج وغسل الوش, حطي كام نقطة على قطنة ودلكي بيها البشرة.

4- وصفة زيت الارجان للبشرة الجافة:

ممكن تدهنيه لوحده بعد غسل الوش, او تخلطي كام نقطة من زيت الارجان مع 3 معالق صغيرة لبن ومعلقة كبيرة عسل نحل, ادهني البشرة بالخليط وسيبيه 10 دقايق وبعدها اغسليه, كرري الوصفة مرة واحدة في الاسبوع.

5- وصفة لعلاج حب الشباب:

ممكن تدهنيه لوحده يوميا مرتين في اليوم لمدة 30 دقيقة وبعدها تغسليه, او تخلطي كميات متساوية من زيت الارجان وزيت شجرة الشاي, وادهني المناطق المصابة بحب الشباب مرتين في اليوم, سيبيه لمدة 10 دقايق وبعدها اغسليه, وكرريه يوميا.

فوايد زيت الارجان 2
فوايد زيت الارجان 2

6- لتنعيم وتكثيف الشعر:

– هاتي كمية من زيت الارجان مناسبة لطول وكثافة شعرك, دفيه على النار ودلكي بيه الشعر وفروة الراس لمدة 10 دقايق, وبعدها غطيه بكيس بلاستيك وسيبيه 30 دقيقة, وبعدها اغسليه بالطريقة العادية, كرري الوصفة من 2 – 3 مرات في الاسبوع, وممكن تدهني الزيت بعد غسل الشعر, بيساعد على علاج مشكلة هيشان الشعر.

– او اخلطي ½ فنجان من زيت الارجان مع 10 نقط من زيت الروزماري, وكام نقطة من زيت جوز الهند, سيبي المكونات تمتزج مع بعض لمدة 10 دقايق, بعدها ادهني الشعر بالخليط من الجذور للاطراف, وغطيه بكيس وسيبيه طول الليل واغسليه الصبح بمية فاترة.

– او اخلطي فنجان من زيت الارجان, مع 3 معالق كبيرة مية ورد, و 3 نقط زيت زيتون, قلبيهم مع بعض وحطي الخليط في التلاجة لمدة 20 دقيقة, بعدها حطي الخليط في ازازة ببخاخ, ورشي شعرك بيه 3 مرات في اليوم وسرحيه.

فوايد زيت الارجان 3
فوايد زيت الارجان 3

7- وصفة لنمو الضوافر:

ادهني الضوافر يوميا بزيت الارجان, وسيبيه لمدة 10 دقايق, هيساعد على تغذية الضوافر وهيساعدها على النمو, ويحافظ عليها صحية.

8- لترطيب القدمين وعلاج تشققات الكعبين:

انقعي رجلك في مية دافية لمدة 10 دقايق, وبعدين استخدمي الحجر عشان تزيلي اي جلد ميت, وبعدها ادهني الرجل والكعوب بزيت الارجان والبسي شراب ونامي بيه, وكرريه يوميا.

فوايد زيت الارجان 4
فوايد زيت الارجان 4

طريقة وفوايد زيت القهوة للشعر والبشرة والجسم

طريقة وفوايد زيت القهوة
طريقة وفوايد زيت القهوة

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

3 نقط من السيروم ده هتخليكي ماتحتاجيش للمكياج

3 نقط من السيروم ده هتخليكي ماتحتاجيش للمكياج

ليه حب الشباب بيظهر في ال 8 اجزاء دي من الجسم ، وايه اللي المفروض تعمليه

ليه حب الشباب بيظهر في ال 8 اجزاء دي من الجسم ، وايه اللي المفروض تعمليه