11 غلطة بيقع فيهم اشخاص كتير لما بيحاولوا يخسروا وزنهم

كل الاشخاص اللي عايزين يخسروا وزنهم عارفين كويس انه عشان ده يحصل انهم محتاجين يقللوا من استهلاك السعرات الحرارية ويمارسوا رياضة بشكل منتظم, لكن في حاجات اكتر من كده عشان تنجحي في خسارة الوزن, وزي ما في حاجات المفروض تعمليها, في حاجات تانية المفروض متعمليهاش, وممكن الغلطات دي تخليكي متخسريش وزن او حتى تعكس النتايج, والنهاردة من خلال موضوعنا هنقولك اكتر غلطات تخسيس الوزن اللي ممكن يكون في اشخاص كتير بيقعوا فيها.

غلطات تخسيس الوزن:

1- عدم قراءة مكونات الاكلات:

كتير من الاكلات ممكن يكون مكتوب عليها انها صحية, وانتي تكتفي بده وتفتكري انها مفيدة, لكن لو قريتي مكوناتها بتفصيل اكتر هتلاقي مكونات مضرة, وسكر وغالبا بيكونوا كاتبين السكر بصيغة مختلفة عشان يخدعوا المستهلك زي الفركتوز, الجلوكوز, الدكستروز, المالتوز, والسكروز.

غلطة تانية لو في حاجة معلبة مكتوب عليها انها تكفي لمرة واحدة, هل تعرفي ان حصة واحدة من الشيبسي او المقرمشات او البطاطس اللي المفروض لمرة واحدة يكون من 13 – 16 واحدة بس, ولكن الكيس بيكون فيه اكتر من كده, وبكده انتي بتستهلكي زيادة.

عشان كده لما تيجي تشتري اي حاجة لازم تاخدي بالك من المكونات وتقريها كويس, وتاخدي بالك من الحجم, عشان تتأكدي انك مش هتاكلي اكتر من اللي محتاجاه.

2- بتوزني نفسك كتير:

لما توزني نفسك كل يوم, هي يمكن مش هتأثر على خسارة الوزن بشكل مباشر, لكن ممكن تسبب لك احباط, لان عملية خسارة الوزن بتحتاج لوقت, ده غير ان الوزن ممكن يختلف من وقت للتاني لاسباب كتير, زي الدورة الشهرية, او اكتساب عضلات من ممارسة الرياضة, وبالتالي لما هتوزني نفسك كتير وهتلاقي انك مش بتوصلي للنتايج اللي انتي عايزاها او متوقعاها ده ممكن يسبب لك احباط وده ممكن يأدي لشراهة في الاكل ويخليكي تكسبي وزن بدل ما تخسي.

عشان كده الافضل انك تستخدمي قياس تقيسي بيه حوالين الوسط والوركين والفخدين وتشوفي مقاسك صغر قد ايه ويكون مرة واحدة بس في الاسبوع, ولو انتي عايزة توزني كتحفيز ليكي, متعمليش ده اكتر من مرة واحدة في الاسبوع او حتى مرة كل اسبوعين.

3- بتركزي على تمارين الكارديو وبتتجاهلي تمارين القوة:

اكيد كتير بيقولوا ان ممارسة بعض التمارين احسن من عدم الممارسة خالص, ولكن لو انتي ماشية على نظام غذائي وبتمارسي تمارين الكارديو ومع ذلك فقدان الوزن مش ماشي بشكل كويس زي ما انتي متخيلة, والسبب في الحالة دي هيكون انك مش بتمارسي تمارين قوة, تمارين القوة مش بس بتساعد على بناء العضلات, لكن كمان بتعزز عملية التمثيل الغذائي, وبتعزز خسارة الدهون في البطن.

عشان كده الافضل انك تجمعي بين تمارين الكارديو وتمارين القوة عشان توصلي لافضل النتايج, ممكن تمارسيهم بالتبادل كل تمارين في يوم, او تجمعي بينهم في يوم واحد لو عندك وقت كافي.

4- مش بتاخدي بالك من السكر والسعرات الحرارية في مشروباتك:

بتشربي مشروباتك ومن غير ما تاخدي بالك من السكر اللي فيها, يعني مثلا معظم مشروبات ستاربكس بتحتوي على كمية سكر ما بين 40 – 60 جرام, وده يعتبر ضعف كمية السكر اللي محتاجها الجسم في اليوم من 2 – 3 اضعاف, وده مشروب واحد بس, ده غير لو شربتي مشروبات تانية زي الصودا وعصاير الفاكهة المليانة بالسعرات الحرارية, وفي نفس الوقت بتفضلي جعانة لان مركز الشهية اللي موجود في المخ مش بيتفاعل مع السعرات الحرارية السايلة بنفس الطريقة اللي بتستهلك بيها السعرات الحرارية في الاكل.

عشان كده الافضل بدل المشروبات دي اشربي مية, ولو عايزة طعم مختلف ممكن تحطي اضافات على المية زي الليمون, او التوت, او اوراق النعناع, او ممكن تشربي شاي اخضر من غير سكر.

5- بتفوتي وجبات:

تقريبا الغلطة الاكتر انتشار هي تخطي وجبة الفطار او العشا, ممكن ده يبان منطقي لو هتفكري انك بكده هتقللي من استهلاك السعرات الحرارية, وبكده هخسري وزن بشكل اسرع, لكن تخطي الوجبات ده مش بس بيبطء من عملية التمثيل الغذائي, لكن كمان هيخليكي عايزة تاكلي وجبات خفيفة اكتر.

عشان كده الافضل انك تاكلي وجبة فطار كاملة صحية وغنية بالمغذيات اللي تديكي طاقة وتمنعك من انك تاكلي كتير بعد كده وهتخلي معدتك مليانة فترة اطول, والفطار المثالي لازم يجمع ما بين الكربوهيدرات الجيدة والالياف والبروتين, ومن الاختيارات الصحية المغذية للفطار الشوفان, والبيض, والزبادي اليوناني مع الفواكه.

6- بتقيدي وتحرمي نفسك اكتر من اللازم:

تعتبر نصيحة تقليل كمية الطعام من اكتر النصايح المنتشرة عشان تقللي وزنك, وده مظبوط لكن لو اتعمل بشكل صح, يعني متاكليش كميات صغيرة اوي بحيث انك تفضلي على طول حاسه بالجوع, وده مش بس غير صحي, لكن كمان لما كمية السعرات الحرارية بتبقى منخفضة اوي ده بيبطء من عملية التمثيل الغذائي او الحرق عشان الجسم بيحاول يحافظ على الطاقة بشكل محدود جدا فمش بيحرق كتير, وده بيخلي عملية انقاص الوزن ابطء واصعب.

غلطة تانية كتير بيقعوا فيها وهي التخلص من كل الاكلات السيئة او الغير صحية, وده بيخلي الممنوع مرغوب وبيزود الرغبة فيها اكتر, ولو منعتي نفسك منها فترة طويلة ده هيخليكي في الاخر تاكلي كميات كبيرة من الاكلات الغير صحية.

عشان كده افضل حاجة انك تاكلي الكميات المعقولة اللي تشبعك من الاكل ولكن مش الشبع الكامل او تملي المعدة اوي, واسمحي لنفسك من وقت للتاني انك تاكلي حاجة نفسك فيها بس بكمية صغيرة سواء حلويات او حاجة مقلية, مرة او مرتين في الاسبوع هتساعدك تتعاملي مع شهيتك بشكل افضل وتخليكي تحافظي على الطريق الصحيح مع نظامك الغذائي.

7- اختيار الاطعمة المصنعة قليلة الدهون والخالية من الدهون:

عادة بيتم الدعاية للمنتجات قليلة الدهون والخالية من الدهون كاختيارات صحية لاي حد عايز يقلل وزنه وكتير من الناس بيفتكرا ان ده صح, لكن اللي في كتير ميعرفهوش ان المنتجات دي بتكون غنية بالسكر واضافات تانية عشان يحسنوا طعمها, مثلا الزبادي الخالية من الدهون بتحتوي على كمية كبيرة من السكر زي اللي موجودة في بار شوكولاتة.

عشان كده الافضل انك تختاري الاطعمة الكاملة المعالجة والغير مصنعة, اللي بتحتوي على دهون طبيعية ودهون صحية, ولو هتشتري اي منتج خالي الدسم اقري مكوناته واتأكدي انه خالي من السكر او المواد المضافة وانه فعلا قليل السعرات الحرارية مقارنة بغيره كامل الدهون.

8- مش بتنامي كويس:

يمكن من اللحظة الاولى تشوفي ان النوم وفقدان الوزن مالهمش علاقة ببعض, لكن ده مش حقيقي لان الحرمان من النوم بيأدي لخفض مستويات هرمون الليبتين “هرمون الامتلاء” وزيادة انتاج هرمون الجريلين “هرمون الجوع” ونتيجة لده هتحسي بالجوع بشكل مستمر وهتاكلي اكلك ووزنك هيزيد.

بالاضافة لده ان قلة النوم بتزود الرغبة في اكل الحاجات الغنية بالدهون والكربوهيدرات بشكل اكبر, وبما انك هتبقي حاسه بتعب وارهاق فهتلاقي انه من المستحيل عمليا انك تقولي لا للاكلات دي.

عشان كده لازم تتأكدي انك بتنامي بشكل كافي, والبالغين بيحتاجوا تقريبا عدد ساعات نوم من 7 – 9 ساعات يوميا عشان تحافظي على صحتك كويسة, ولو بتعاني من مشكلة في النوم, حاولي تحليها وتعملي روتين للنوم وجدول زمني تمشي عليه.

شوفي من هنا تكنيك مذهل وفعال للتخلص من الارق هيخليكي تنامي في دقيقة واحدة بس.

9- مش بتاكلي الياف كفاية:

لما تحاولي تخسري وزن, مهم جدا انك تدخلي كمية كافية من الاكلات الغنية بالالياف في نظامط الغذائي, الالياف القابلة للذوبان مفيدة بشكل خاص لانها بتمتص المية وبتحولها لمادة هلامية, بتتحرك ببطء من خلال الجهاز الهضمي وتخليكي تحسي بالشبع لفترة اطول, وكمان معروف ان الالياف بتبطء من امتصاص الدهون, وبتحافظ على مستويات السكر في الدم في مستواها الطبيعي, وده بيساعد الجسم على تخزين كمية اقل من الدهون.

عشان كده لو عايزة تخسي ضروري تمشي على حمية او نظام غذائي غني بالالياف زي الشوفان والمكسرات والفواكة المقشرة والفاصوليا كل دي اكلات غنية بالالياف القابلة للذوبان, ولكن الحبوب الكاملة والارز البني والخضروات الورقية وقشر الفواكة دي تعتبر مصادر كويسة للالياف الغير قابلة للذوبان.

10- بتحطي توقعات غير واقعية:

ضروري انك تحطي اهداف واقعية طويلة الاجل لفقدان الوزن, اكيد اي واحدة بتكون عايزة تخسر وزنها بشكل سريع, لكن ده مش ممكن تحقيقة الا بنظام غذائي قاسي, وده مش كويس لصحتك ومش بيساعد على الحفاظ على وزنك بعد ما تخسريه, وهتلاقي نفسك رجعتي لوزنك الاولاني بعد ما توقفيه, وجود توقعات واقعية وفهم ان التخسيس هو عملية تدريجية, ده هيساعدك انك تفضلي على المسار الصحيح ومتصابيش بالاحباط.

عشان كده خليكي واقعية, عشان توصلي لافضل النتايج على المدى الطويل, يعني تخسي من ½ كيلو لكيلو في الاسبوع الواحد ده هيكون هدف كويس جدا.

11- الافراط في الاكلات الصحية:

الافراط في الاكلات الصحية لانك عارفة انها مفيدة ومش هتضر, لكن على الرغم من ده هي ممكن تزود الوزن لو اكلتي منها كمية كبيرة, لان السعرات الحرارية هي السعرات الحرارية “والسعرات الزيادة معناها زيادة في الوزن” حتى لو جايه من اكلات كاملة وغنية بالمغذيات, واكلات زي المكسرات والافوكادو والكينوا والارز البني هي صحية ولكن فيها نسبة عالية من السعرات الحرارية لو اكلتي منها كمية كبيرة معناها وزنك هيزيد مش هيقل.

عشان كده كلي الاكلات الصحية ولكن بكميات معقولة, يعني كلي في الوجبة 1/3 ثمرة افوكادو ممكن تزودي شوية بس خلي بالك وحافظي على الكمية المعقولة وخليها في الاعتبار.

قولي لنا ايه من الغلطات دي كنتي بتقعي فيها واتسببت انك متخسريش وزنك ؟

10 حيل سريعة هتساعدك تخسري وزن لو انتي كسولة