10 نصايح هتساعدك وانتي بتشتري هدوم جديدة تختاري قطع جودتها عالية
لما بنروح نشتري هدوم جديدة غالبا بنركز على الموديل, او المقاس, او اللون, لكن مش بناخد بالنا من تفاصيل تانية صغيرة هي اللي بتفرق ما بين القطع اللي جودتها عالية والقطع السيئة, والنهاردة هنساعدك في المهمة دي وهنقولك نصايح هتساعدك تشتري هدوم جودتها عالية.
نصايح هتساعدك تشتري هدوم جودتها عالية:
1- اعرفي جودة القطن بالضغط عليه:
لما تيجي تشتري اي حاجة قطن عشان تتأكدي من جودتة, امسكية في ايدك واضغطي عليه اوي لمدة ثواني, لو بعدها لقيتي القماش اتكرمش وبقى شبه الورقة المجعدة, ده معناه انه تمت معالجته بأداة خاصة عشان يحافظ على شكله, ومن اول غسلة هيبوظ, عشان كده لو عمل معاكي كده متشتريش القطعة دي.
2- اسحبي القماش عشان تتأكدي من جودة الغرز:
القطعة الكويسة او اللي جودتها عالية بتكون الغرز فيها كثيفة وطبقات سميكة, عشان كده حاولي تسحبي القماش من عند الخياطة, لو ظهرت فجوات او فراغات بين الغرز دي تبقى قطعة جودتها سيئة ومتشتريهاش.
3- اتجنبي السوستة المفتوحة:
لما تيجي تشتري اي حاجة فيها سوستة, الافضل تختاري القطعة اللي فيها سوستة معدنية متغطية بشريط او جزء من القماش, لانها موثوقة اكتر وبتعيش وقت اطول, لان السوستة البلاستيك عادة بتتكسر بسرعة مع كتر الاستخدام, ودي تعتبر علامة ان القطعة دي رديئة.
4- اتأكدي ان التنية عريضة بشكل كافي:
المفروض يكون في البنطلونات والجيبات تنية بعرض حوالي 4 سم, والبلوزات والشيميزات التنية بتكون بعرض 2 سم تقريبا وهي دي القطع اللي بتكون جودتها عالية, لكن لو مافيش تنية يبقى ببساطة القطعة دي منخفضة الجودة.
5- شدي النسيج:
القطعة عالية الجودة هتحافظ على شكلها مع الشد, امسكي القطعة وشديها, وبعدين سيبيها, لو النسيج فقد شكله يبقى القطعة دي رخيصة ومنخفضة الجودة.
6- اتأكدي من طول السوستة:
لازم تكون السوستة في الجيبات او الفساتين او اي قطعة ملابس متساوية الطول مع اخر القطعة يعني بتقفل للاخر, وتكون كمان مطابقة لنفس اللون.
7- اقري الملصق اللي على الهدوم:
الاقمشة الطبيعية زي القطن والحرير والصوف, في الغالب بتبقى قوية وبتعيش اكتر من المواد المركبة, لكن مع ذلك القطن ال 100% ممكن ينكمش بسرعة بعد الغسيل, عشان كده الافضل اختيار القطعة اللي بتكون فيها من 5 – 30% اقمشة صناعية زي “الفسكوز, البوليستر, النايلون, وغيرها” الاقمشة دي هتعيش معاكي فترة اطول.
8- اتأكدي من تطابق الخيوط:
افحصي النسيج والوان الخيط, لو لقيتي خياطة مش متطابقة وغرز معمولة بألوان مختلفة, دي تعتبر علامة واضحة جدا ان القطعة دي مش معمولة كويس وجودتها منخفضة.
9- افحصي الازرار والعراوي:
الشركات لما بتصنع قطع منخفضة الجودة, مش بتهتم اوي بالتفاصيل الصغيرة, عشان كده مهم انك تفحصي الازرار والعراوي قبل ما تشتري, اتأكدي ان الازرار متخيطة ومتثبته كويس, والعراوي متقفلة كويس والخيوط متساوية.
10- بصي على اللون مع التنيات:
لو اللون على الايد او الاشرطة او الاربطة باهت, او بيسيب علامة لما بيتني, ده بيدل على انه منخفض الجودة, وده بردو ينطبق لو في مكان غامق او فاتح عن الباقي, وفي الحالة دي اللون هيبدأ يروح بالتدريج بعد كام غسلة.