طريقة وفوايد زيت القهوة للشعر والبشرة والجسم

ريهام محمود
ريهام محمود
في
بشرة
29778

زيت القهوة من الزيوت اللي ليها فوايد كتير جدا, لان القهوة غنية بالمواد المضادة للاكسدة, والكافيين اللي موجود في القهوة بيساعد على زيادة الدورة الدموية اللي بتساعد على علاج السيلوليت, والهالات السودا, وشد الجلد وتفتيحه, بيساعد على زيادة نمو الشعر وتنعيمه, وبيديه لون طبيعي وبيخليه صحي وبيلمع, والنهاردة من خلال موضوعنا هنقول لكل بنات حوا طريقة وفوايد زيت القهوة وازاي تستخدميه.

طريقة وفوايد زيت القهوة:

– فوايد زيت القهوة للبشرة والشعر:

1- بيحسن نسيج البشرة, وبيساعد على شد الجلد لتقليل السيلوليت ومنع التجاعيد.

2- الكافيين اللي موجود في القهوة بيزود من تدفق الدم, وده بيقلل من مظهر السيلوليت, والدوالي وعلامات التمدد, كمان بيدوب الخلايا الدهنية في الجسم لو دهنتيه كل يوم على اي مشكلة في الجسم.

3- الكافيين يعتبر مضاد للاكسدة, وده بيساعد على منع الجذور الحرة, اللي بتتسبب في التجاعيد, وبالتالي زيت القهوة بيمنع التجاعيد والخطوط الرفيعة بشكل كبير جدا, ادهني بشرتك كل يوم بزيت القهوة لافضل النتايج.

4- الكافيين بيساعد على تحفيز بصيلات الشعر, وده بيساعد على زيادة نموه, وتنعيمه, وبيخليه صحي وبيلمع.

5- بيقلل من الانتفاخات والهالات السودا, لو دهنتيه تحت العين كل يوم قبل النوم, بيساعد على تضييق الاوعية الدموية تحت الجلد, وده بيساعد على تقليل انتفاخ العيون وبيعالج الهالات السودا.

طريقة وفوايد زيت القهوة 1
طريقة وفوايد زيت القهوة 1

– المكونات والطريقة:

عشان نعمل زيت القهوة ليه طريقتين التحضير البارد والتحضير السخن وهنعرف الطريقتين مع بعض, وانتي اختاري طريقة التحضير اللي تفضليها.

– طريقة التحضير البارد:

المكونات:

1 كوب اي نوع زيت تفضليه “زيت لوز حلو, زيت جوز هند, زيت زيتون, او اي نوع تاني”.

¾ كوباية بن مطحون.

الطريقة:

اخلطي الزيت مع البن المطحون في برطمان, اقفليه ورجيه كويس, خزنيه لمدة من 3 اسابيع لشهر, واتأكدي انك ترجيه كل يوم او كل يومين, بعد ال 3 اسابيع صفيه على شاشة واستخرجي الزيت بس, وكده يبقى جاهز عندك للاستخدام.

طريقة وفوايد زيت القهوة 2
طريقة وفوايد زيت القهوة 2

– طريقة التحضير السخن:

المكونات:

4 معالق كبيرة بن مطحون.

8 معالق كبيرة زيت زيتون او زيت جوز هند.

الطريقة:

اخلطي الزيت مع البن في طاسة, وحطيها على نار هادية لمدة 30 دقيقة, مع التقليب من وقت للتاني, وممكن تسخنيهم في اي وعاء فخار على نار هادية وتسيبهم فترة اطول على النار مع التقليب, بعدها صفي الخليط واستخرجي الزيت واحتفظي بيه في ازازة للاستخدام.

طريقة وفوايد زيت القهوة 3
طريقة وفوايد زيت القهوة 3

الزيت ده تقدري تستخدميه كمرطب للوش او الجسم, او كمساج لعلاج علامات التمدد والسلوليت, او كزيت لعلاج الانتفاخات والهالات السودا, او كعلاج مغذي للشعر وزيادة نموه ولمعانه.

طريقة وفوايد زيت القهوة 4
طريقة وفوايد زيت القهوة 4

– طريقة استخدام زيت القهوة للشعر:

زيت القهوة للشعر ممكن تستفادي منه باكتر من طريقة, ممكن تستخدميه كعلاج قبل الشامبو, او كماسك ليلي, او تضيفيه للشامبو, او تستخدميه كسيروم للشعر.

1- لاستخدامه كعلاج قبل الشامبو: دلكي فروة الراس والشعر كله بالزيت وسيبيه من 10 – 20 دقيقة, وبعدها اغسلي شعرك بالشامبو بالطريقة العادية.

2- استخدامه كماسك ليلي: دلكي الشعر وفروة  بالزيت باطراف صوابعك, وممكن تلبسي طاقية الشعر او كيس بلاستيك وتنامي بيه وتغسليه الصبح, لنتايج اسرع.

3- شامبو القهوة: حطي على كمية الشامبو اللي هتغسلي بيها شعرك كام نقطة من زيت القهوة, واغسليه بالطريقة العادية.

4- سيروم للشعر: ممكن تستخدميه كسيروم للشعر, بعد ما تغسلي شعرك خدي كمية بسيطة من زيت القهوة وادهني الشعر كله بالطريقة المعتادة.

5- استخدامه لشطف الشعر: اعملي كوباية قهوة بالطريقة العادية, وسيبيها تبرد, وبعدها خففيها بشوية مية, وبعد ما تغسلي شعرك بالشامبو, صبي الخليط على شعرك وفي نفس الوقت دلكيه بايدك التانية, سيبيه على شعرك لمدة دقايق, وبعدين اغسلي الشعر بمية باردة.

طريقة وفوايد زيت القهوة 5
طريقة وفوايد زيت القهوة 5

بالخطوات : ماسك القهوة للعيون و التخلص من الهالات السوداء

بالخطوات ماسك القهوة للعيون و التخلص من الهالات السوداء
بالخطوات ماسك القهوة للعيون و التخلص من الهالات السوداء

مقالات متعلقه

3 نقط من السيروم ده هتخليكي ماتحتاجيش للمكياج

3 نقط من السيروم ده هتخليكي ماتحتاجيش للمكياج

8 تمارين للتخلص من التجاعيد للحصول على بشرة نضرة ومشدودة

8 تمارين للتخلص من التجاعيد للحصول على بشرة نضرة ومشدودة

ازاي تعيدي بناء الكولاجين في بشرتك ب 5 خطوات

ازاي تعيدي بناء الكولاجين في بشرتك ب 5 خطوات