بتشربي مية سقعة ولا دافية؟ شوفي تأثيرهم على الجسم واي واحدة فيهم صحية اكتر
الجسم البالغ بيتكون تقريبا من 50% ل 60% من المية, والمية مهمة وضرورية جدا لصحتنا عشان الجسم يشتغل بشكل صح, ولكن المفروض تشربي المية سقعة ولا دافية, اي واحدة الافضل فيهم؟ يمكن معظمنا بيفضل المية السقعة خصوصا في ايام الصيف والحر, ولكن في الحقيقة ان المية الدافية ثبت ان ليها فايدة اكتر لصحتنا, والنهاردة من خلال موضوعنا هنعرف تأثير شرب المية السقعة والدافية على الجسم.
تأثير شرب المية السقعة والدافية:
– المية السقعة:
المية السقعة بدرجة حرارة 45 درجة فهرنهايت لحد 70 درجة فهرنهايت, كتير بيفضلوها في ايام الحر والصيف بشكل خاص وكمان في اللي ممكن يضيف لها تلج عشان تبقى منعشة اكتر, ولكن ثبت ان الاشخاص اللي بيشربوا مية سقعة بيعانوا من بعض الاعراض الجانبية اللي هنعرفها دلوقتي مع بعض.
1- ممكن تسبب مشاكل في الهضم:
لما بنشرب المية السقعة ده ممكن يسبب تقلص في الاوعية الدموية, وده بالتالي هيأثر على عملية الهضم, وهيأدي لاضطرابات المعدة, والم في البطن,وامساك.
2- بتستنزف الطاقة:
الجسم بيستخدم طاقة اضافية عشان يسخن المية السقعة عشان يوصلها لمتوسط درجة الحرارة, عشان كده نصيحتنا انك تبعدي عن المية السقعة, لانها هتحسسك بالارهاق والتعب وانك مش قادرة تعملي مهام يومك.
3- بتبطيء معدل ضربات القلب:
شرب المية السقعة ممكن تسبب انخفاض معدل ضربات القلب, وبيحفز العصب المبهم, اللي بيشكل جزء مهم جدا من الجهاز العصبي الذاتي للجسم, ودرجة حرارة المية المنخفضة بتحفز العصب المبهم اللي بتكون نتيجته خفض معدل ضربات القلب.
4- ممكن تأدي لامراض خطيرة:
شرب المية السقعة ممكن يسبب في تدهور جهاز المناعة, وده بدوره ممكن يعرض الجسم لكتير من الامراض من اول سيلان الانف لحد الامراض الخطيرة لان مناعة الجسم بتبقى ضعيفة.
– المية الدافية:
المية الدافية اللي تكون حرارتها من اول 180 درجة فهرنهايت لحد 160 درجة فهرنهايت, وعادة احنا مش بنميل لشرب المية بالطريقة دي, لكن في الحقيقة ان في فوايد كتير جدا من شرب المية الدافية.
1- تعتبر ديتوكس للجسم:
شرب المية الدافية وخصوصا الصبح على الريق تعتبر ديتوكس للجسم بتساعد على طرد السموم اللي ممكن تسبب كتير من الامراض وبالتالي ده بيحمينا منها, وعشان يكون تأثيرها اقوى ممكن تضيفي للمية الدافية شريحة ليمون, فيتامين C اللي في الليمون هيعيد احياء الخلايا والمية الدافية هتزيل السموم من الجسم.
2- بتحارب الألم:
ثبت ان المية الدافية بتخفف من الألم الناتج عن الدورة الشهرية والصداع, وبتساعد على زيادة الدورة الدموية وتحسين تدفق الدم, لو بتعاني من اي تشنجات ننصحك بشرب مية دافية هتساعدك على ارتخاء العضلات.
3- بتقلل من مستوى التوتر:
مش بس الحمام السخن هو اللي ممكن يخلصك من الاجهاد والتعب, حاولي كمان تشربي مية دافية لما تحسي بالتوتر, هتساعدك ان الجهاز العصبي يشتغل بشكل صح, لان الجفاف بيزود مستوى هرمون الكورتيزول اللي هو واحد من هرمونات التوتر, ولما تحافظي على رطوبة جسمك هيخليكي تقاومي الضغط والتوتر اكتر.
4- بتساعد على تخسيس الوزن:
المية الدافية ممكن تساعد على تخسيس الوزن, لان شرب المية الدافية هيخلي عملية الايض او الحرق نشطة جدا, المية الدافية بتزود من درجة حرارة الجسم, وفي الحالة دي جسمك بيحاول تعويض الفرق في درجات الحرارة, فيبدأ في حرق السعرات الحرارية.
5- بتحسن الدورة الدموية:
المية السقعة زي ما قولنا بتقفل العروق او الاوعية الدموية لكن المية الدافية بتعمل العكس بتساعد على تدفق الدم بحرية يف الاوعية, وتدفق الدم السليم هينعكس بشكل ايجابي على الجسم كله, من اول الحماية من ضغط الدم لخطر الاصابة بأمراض القلب والاوعية الدموية.
6- بتساعد على الهضم:
كتير من الاشخاص بيعانوا من مشاكل الهضم والامساك, والجفاف هو من اكتر اسباب الامساك, وبالتالي المية بشكل عام بتحفز الامعاء, وثبت ان المية الدافية فعالة اكتر في تحسين الامعاء.
7- بتوقف الشيخوخة المبكرة:
الشيخوخة المبكرة من اكتر الحاجات اللي ممكن تخوف اي بنت, ووجود السموم بشكل متزايد في الجسم ممكن يسبب الشيخوخة المبكرة, والمية الدافية هتساعدك على طرد السموم وتنضيف الجسم وبالتالي ده هينعكس على بشرتك وهيحافظ عليها نضرة وشابة وصحية.
هل ممكن نشرب مية اثناء الاكل ؟ وايه تأثيرها على المعدة
