7 طرق عشان تتوقفي عن حب شخص مش بيبادلك نفس الشعور

ريهام محمود
ريهام محمود
32662

الحب من طرف واحد ان يكون جواكي مشاعر لشخص مش بيبادلك نفس الشعور, ده ممكن يأثر على تقديرك لذاتك وثقتك بنفسك بشكل سلبي جدا, وهتحسي دايما انك مش مبسوطة, ومتضايقة من نفسك, وممكن الموضوع كمان يوصل لمرحلة الاكتئاب, عشان كده لازم تتخلصي من المشاعر دي في اسرع وقت ممكن, وده اللي هنساعدك فيه النهاردة من خلال موضوعنا هنقولك نصايح تخلصك من مشاعر الحب من طرف واحد.

نصايح تخلصك من مشاعر الحب من طرف واحد:

1- اقبلي حقيقة ان الشخص ده مش محتاجك:

حاولي تبصي لحبك من منظور مختلف, وبلاش الرومانسية الكلاسيكية اللي موجودة في الافلام, واعترفي بينك وبين نفسك ان الشخص ده مش بيحبك, كده انتي هتبقي على الطريق الصحيح, والمرة الجاية لما تلاقي نفسك عايزة تشوفي الشخص ده او تتصلي بيه افتكري شعوره اتجاهك, وقد ايه انتي بتبيني اهتمامك بيه وفي المقابل بتلاقي عدم اهتمام او لامبالاة بمشاعرك وشايفين ان اهتمامك ده تنازل, هل فعلا انتي عايزة تتنازلي وتتخلي عن كرامتك في حب من طرف واحد؟ اكيد انتي تستحقي احسن من كده بكتير.

نصايح تخلصك من مشاعر الحب من طرف واحد 1
نصايح تخلصك من مشاعر الحب من طرف واحد 1

2- شتتي عقلك عن التفكير فيه:

لازم يكون شعارك Out of sight, out of mind يعني بعيد عن النظر والتفكير, لو قدرتي تطلعي رحلة في مكان بعيد مع اصحابك من غير نت ووقفي دخول السوشيال ميديا بشكل عام.

ولو مافيش مفر من مقابلة الشخص ده ومش هتقدري تتجنبي مقابلته, يبقى لازم تخلي تفكيرك بعيد عنه حتى لو معاكي في نفس المكان اللي انتي قعدة فيه, حولي افكارك لاتجاه تاني, فكري في احلامك ومستقبلك ورغباتك الشخصية وطموحاتك, مش بس مجرد التفكير في العلاقات او انك تبقي سعيدة فيها, السعادة اكيد مش في العلاقات بس.

نصايح تخلصك من مشاعر الحب من طرف واحد 2
نصايح تخلصك من مشاعر الحب من طرف واحد 2

3- دوري على شخص بيعاني نفس مشكلتك:

انتي مش الشخص الوحيد اللي عنده مشاكل في العلاقة, في غيرك كتير عانى من نفس المشكلة والحب من طرف واحد وعدوا ده وكملوا حياتهم, اسأليهم عن تجربتهم وعملوا ايه عشان يمروا من الازمة العاطفية دي ويتخلصوا  من الالم, في بعض الاحيان بنبقى محتاجين بس نسمع كلام بسيط ان في حد معانا زي مثلا حد يقولك “انا فاهمك وفاهم مشاعرك كويس” ده لوحده ساعات بيكون كافي انه يخفف عنك.

ولكن خلي بالك متقعيش في غلطة, ان يبقى كلامك كله عن الشخص ده بحجة انك عايزة تعرفي ازاي تتخلصي من مشاعرك, لانه في الحالة دي هتفكري فيه باستمرار ومش هتنسيه ابدا, انتي مش محتاجة غير محادثتين بالكتير مع حد مر بنفس التجربة ويفيدك بنصايحه ويخليكي تحسي بشعور احسن.

ولو انتي مش عايزة تتكلمي مع حد خالص في مشاكلك الشخصية, ممكن توجهي تفكيرك وطاقتك لحاجة تانية ممكن تحاولي تمارسي اي هواية, او حتى تتعلمي حاجة جديدة تجيبي كتب وتشوفي فيديوهات وتعلمي نفسك, ده هيشغل وقتك وعقلك ومش هيخليكي تفكري فيه.

نصايح تخلصك من مشاعر الحب من طرف واحد 3
نصايح تخلصك من مشاعر الحب من طرف واحد 3

4- اهتمي بنفسك:

اكيد الحالة النفسية اللي بتكوني فيها بتخليكي تهملي نفسك, لكن حتى لو حاسه بألم او باي مشاعر سلبية, لازم تهتمي بمظهرك وصحتك في كل الاحوال, جربي تاخدي حمام دافي بمية مالحة عشان تخرجي كل الطاقة السلبية اللي جواكي, واسترخي واشربي كوباية شاي اعشاب تهدي اعصابك, روحي اعملي شوبينج, اشتري هدوم جديدة, غيري قصة شعرك.

ومتحاوليش تاخدي قرارات تأثر على صحتك زي مثلا انك تدخني ولو انتي اصلا مدخنة انك تشربي اكتر من المعتاد, ويبقى عندك رغبة انك تدمري نفسك على امل ان الشخص اللي بتحبيه يشوفك في الحالة دي ويفهم المك, لكن ده مش هيحصل, كل اللي انتي هتاخديه بس هو تلف اعصابك وصحتك.

نصايح تخلصك من مشاعر الحب من طرف واحد 4
نصايح تخلصك من مشاعر الحب من طرف واحد 4

5- مارسي رياضة:

في طرق كتير عشان تستعيدي توازنك العاطفي تاني, واكترها فاعلية هي التمارين الرياضية, هتساعدك انك تتخلصي من كل المشاعر السلبية اللي جواكي, ابدأي اجري كل يوم الصبح, او روحي دروس لياقة بدنية, روحي الجيم, او حمام السباحة, اتعلمي ركوب الخيل, هتحسي بمشاعر ايجابية جدا في التواصل مع الحيوانات.

لو عايزة تجمعي ما بين الفن والرياضة ممكن تمارسي الرقص, ممكن تشغلي اي اغنية بتحبيها وترقصي مع نفسك في البيت, او تروحي تلعبي زومبا, او تروحي مكان متخصص تتعلمي تانجو او رومبا او صلصا, هتنبسطي وتتخلصي من كل المشاعر السلبية وفي نفس الوقت هتحافظي على جسمك وتخلي شكلك حلو.

نصايح تخلصك من مشاعر الحب من طرف واحد 5
نصايح تخلصك من مشاعر الحب من طرف واحد 5

6- ارميه وراكي وكملي حياتك:

في مثل هندي بيقول ” If your horse is dead, dismount” بمعنى “لو حصانك ميت فكه وسيبه”, يعني مينفعش تحي الميت, والحاجة اللي مافيش منها امل خلاص متضيعيش وقتك فيها, مافيش حاجة مدمرة للنفس اكتر من حب شخص مش بيحبك, لو حسيتي ان الشخص مش مهتم بيكي متحاوليش تبرري انه محرج مثلا او مش قادر يعبر عن مشاعره, لان ده مش صح هما مش محرجين يظهروا حبهم ولا حاجة, هم بكل بساطة مش حاسين باي مشاعر.

لو الشخص مش بيبادلك نفس المشاعر, هيلاقي الف مبرر وحجة عشان يتجنب انه يقابلك او يجتمع معاكي في نفس المكان, وحطي نفسك في نفس الموقف لو انتي مش عايزة تروحي مكان او خروجة هتتصرفي ازاي؟ هتلاقي نفس التصرف هو عمله.

7- متخليش مشاعر الغضب تسيطر عليكي:

اتجنبي شعور الغضب ومتخليهوش يسيطر عليكي, لان الفشل في الحب هو جزء من الحياة, متبدأيش تكرهي نفسك او كل الرجالة عشان اتعرضي لتجربة حب من طرف واحد, وخليكي واثقة ومؤمنة انك هتلاقي السعادة في النهاية وهتقابلي اللي يحبك زي ما انتي بتحبيه, ومتتمنيش حاجة وحشة للشخص اللي مبادلكيش نفس المشاعر لان الحب مش بايدينا وهو مش مضطر يضحي عشان سعادتك انتي.

وحطي نفسك مكان الشخص ده, هل انتي مستعدة تعيشي حياتك كلها مع شخص لمجرد انك مشفقة عليه بس؟ الافضل انك تفكري في كل الحاجات والذكريات الحلوة اللي كانت بينكم, وتكملي حياتك وانتي راضية ومبسوطة.

في النهاية حطي لنفسك كده شعار في الحياة, في حكمة صغيرة وجميلة جدا بتقول ” هذا ايضا سيمر” ممكن تخليها شعارك وافتكريها دايما لما تحسي بالاكتئاب, العبارة الصغيرة دي هتقدر ترجعلك سلامك الداخلي وتخليكي تؤمني بمستقبل افضل, وهتخلي حياتك اسهل لما تفكري ان مافيش حاجة بتدوم وكله بيعدي.

نصايح تخلصك من مشاعر الحب من طرف واحد 6
نصايح تخلصك من مشاعر الحب من طرف واحد 6

نصايح من علماء النفس ازاي تسامحي شخص وتكملي حياتك

ازاي تسامحي شخص وتكملي حياتك
ازاي تسامحي شخص وتكملي حياتك

مقالات متعلقه

6 علامات بتدل إنك تحت ضغط مستمر وأنتي متعرفيش.. اعرفيها عشان تعالجيها

6 علامات بتدل إنك تحت ضغط مستمر وأنتي متعرفيش.. اعرفيها عشان تعالجيها

8 طرق تعرفي بيها إزاي تتعاملي مع الأشخاص التوكسيك واللي بيتسببوا في استنفاذ الطاقة

8 طرق تعرفي بيها إزاي تتعاملي مع الأشخاص التوكسيك واللي بيتسببوا في استنفاذ الطاقة

10 علامات تقولك ان الشخص اللي قدامك بيمارس ضدك الابتزاز العاطفي، اعرفيها واعرفي ازاي تواجهيها

10 علامات تقولك ان الشخص اللي قدامك بيمارس ضدك الابتزاز العاطفي، اعرفيها واعرفي ازاي تواجهيها