وصفة حلقات البصل المقلية باللحمة Onion Ring Steak Cups

بقلمآية حسان فيأكلات سريعة visibility251

مين فينا مابيستمتعش بطعم حلقات البصل المقلية اللى بناكلها فى المطاعم ؟ لكن ليه تأكليها بره لما ممكن تعمليها بنفسك فى البيت بخطوات سهلة وكمان تضيفى عليها قطع اللحمة اللذيذة  و بيعتبر الطبق ده جميل كمقبلات و ممكن تعمليه جنب الأكل ويبقى سناك خفيفة فى العزومات او حفلات عيد الميلاد و كمان طريقته سهلة و مش متعبة ، فى المقال ده اعرفى معانا بالفيديو طريقة عمل حلقات البصل المقلية باللحمة onion ring steak cups .. 

وصفة حلقات البصل المقلية باللحمة Onion Ring Steak Cups

الكمية : 

تكفى لعمل 20 قطعة . 

المقادير : 

لحلقات البصل : 

حبتين بصل ” بصلتين ” . 

نص كوباية من الدقيق متعدد الأغراض . 

معلقة أكل من البيكنج باودر . 

معلقة أكل من البابريكا . 

معلقة أكل ثوم بودر . 

معلقة أكل ملح . 

نص معلقة من الفلفل . 

كوباية الا ربع لبن . 

بيضة مضروبة . 

كوبايتين من البقسماط المفروم . 

زيت نباتى للقلى . 

للحمة  : 

كمية مناسبة من اللحم المتقطع قطع صغيرة ، بحجم قطع الشاورما ” الكمية حسب الرغبة ” . 

معلقة ملح . 

معلقة زيت نباتى . 

نص معلقة من الفلفل . 

ربع كوباية من صوص الباربيكيو . 

معلقتين من الريحان المفروم ” اختيارى ” . 

حلقات البصل المقلية

الخطوات : 

1- قشرى البصل و قطعى  جزء بسيط من الاول و الجزء اللى فيه الجذور ، وبالراحة اوى ابدأى فكى حلقات البصل من بعضها من غير ما تقسميها علشان تبقى عاملة شكل اسطوانى او شبه الكوبايات . 

2-  فى طاسة عميقة ، ابدأى حطى الزيت و سيبيه يسخن كويس لحد ما توصل درجة حارته حوالى 350 درجة . 

3-  فى بولة او طبق عميق تانى ، امزجى الدقيق و البيكنج باودر و البابريكا و بودرة الثوم و الملح و الفلفل ، و خليه على جنب . 

4-  فى طبق تانى اصغر ، امزجى اللبن والبيضة مع بعض و بالراحة اوى ضفيهم على خليط الدقيق و اضربيهم مع بعض لحد ما يكونوا مزيج ناعم . 

5- ضيفى حلقات البصل و قلبيها كويس مع المزيج ده لحد ما تتغطى كلها بيه كويس ، وبعدين شيليها من المزيج و خليها تتصفى من الزيادات . 

6- ابدأى اقلى الحلقات فى الزيت لحد ما يتحول لونها للون الذهبى، و سيبيها تتصفى كويس من الزيت . 

7- فى طاسة تيفال او اى طاسة تحبى تستخدميها بس تكون مابتلزقش، ضيفى معلقة الزيت و خليها تتسخن كويس، وبعد كده ضيفى اللحمة المتقطعة على حرارة متوسطة لعالية ، و ضيفى على اللحمة الفلفل و الملح و سيبها لحد ما تستسوى و يتحول لونها للبنى ، وبعدين شيليها من على النار . 

8- فى طبق مسطح كبير، رصى حلقات البصل المقلية و ضيفيلها اللحمة و معلقة بسيطة من الباربيكيو صوص و ممكن تزينيها بريحان فريش او بقدونس . 

حلقات البصل

شوفى الوصفة بالخطوات فى الفيديو ده .. 

اعرفى معانا كمان وصفة شرائح الفراخ بالجبنة الشيدر Cheddar Ranch Chicken Strips .