نصايح ازاى ترتبى دولابك مرة واحدة و يفضل مترتب على طول فى 7 خطوات بس
دولابك فيه هدوم كتير مابقيتيش تلبسيها؟ ، مش لاقية البلوزة او الطرحة اللى انتى متأكده انك حطاهم فى الدولاب؟ ، هدوم الشغل متبهدلة و تكسرة من ركنتهم فى آخر الدولاب ؟ ومهما ترتبيه برده بيتبهدل و بتتأخرى بسببه كل يوم الصبح وانتى نازلة ومش لاقية حل ؟ لو اجابتك عن الاسئلة دى كانت ” أيوة” يبقى انتى دولابك لازم يترتب و تحددى اولوياتك فى الهدوم ، بمعنى ايه المهم و ايه اللى ممكن يتعان و ايه اللى لازم تتخلصى منه فورا ، وده اللى هنساعدك تعمليه فى خطوات بسيطة و سهلة من خلال المقال ده ، خلينا نبدأ على طول مع بعض و نعرف ازاى ترتبى دولابك ..
نصايح ازاى ترتبى دولابك مرة واحدة و يفضل مترتب على طول فى 7 خطوات بس
1- أسألى نفسك 7 أسئلة مهمين :
السؤال الأول : بحب البلوزة دى ؟
السؤال الثانى : بلبسها ؟
السؤال الثالث: البلوزة دى شبه شخصيتى و شبه الستايل بتاعى ؟
السؤال الرابع : بتضايقنى وانا لبساها ؟
السؤال الخامس : الشوز ده ضيق على صوابعى و بيوعها؟
السؤال السادس : الفستان ده فى بقعه مابتطلعش؟ مش مريح ؟ قديم اوى ؟
السؤال السابع : البنطلون ده مقاسي؟
السؤال رقم 3 هو السؤال الأكتر اهمية وسط كل الأسئلة دى ، حتى لو كنتى بتحبى البلوزة او الفستان ده لكن مابقاش شبهك ولا شبه شخصيتك قدام الناس يبقى لازم تستغنى عنه فورا، لانه لازم طول الوقت تبقى لابسة حاجة حاسه انها شبهك علشان تبقى مريحة بالنسبة لك و تحسي انك مرتاحة فيها ، ولانه مساحة اى دولاب مهما كان كبير محدودة جدا ، يبقى لازم تتخلصى من اى حاجة حاسه انك مابتحبيهاش اوي او مش مرتاحة فيها .
2- اتخلصى من الحاجات اللى مش محتاجاها :
الموضوع هيبقى اسهل عليكى و تقدرى تاخدى قرار انك تتخلصى من الحاجات اللى بقالك شهور عيناها فى دولابك على الفاضى لما تبقى مقررة انك تعملى بيها عمل خير زى انك تتبرعى بيها لجمعية خيرية مثلا، احساس انه حد غيرك هيستفيد بيهم هيبقى مريح أكتر بالنسبة لك و هيشجعك تاخدى الخطوة دى، وبتعتبر احسن طريقة تتخلصى بيها من الهدوم اللى انتى مش محتاجاها .
3- رتبى كل يوم :
تالت خطوة معانا فى ازاى ترتبى دولابك هى ترتيب كل يوم ، خلى ترتيب دولابك اسهل بأنك تجهزى باسكت فى الاوضة تحطى فيه الهدوم اللى هتبقى محتاجة تتغسل مصلا و تتطبق يوم بيوم ، بدل ما تحطى الهدوم وهى مش متطبقة فى الدولاب و بالتالى تبهدل الدولاب كله ، وبرده جهزى باسكت تانى او حتى كرتونة للتبرعات و اول بأول حطى فيها الهدوم اللى قررتى انك تستغنى عنها بدل ما تحطيها فى الدولاب ، خطوة بسيطة زى دى هتساعدك تحافطى على دولابك مترتب على طول .
4- اعملى جرد اسبوعى :
كل ما ترتبى اول بأول و تحطى كل حاجة فى مكانها و تتخلصى من الحاجات اللى انتى مش عايزاها او ده مش وقتها كل ما وفرتى وقت اكتر فى ترتيب الدولاب و يمكن ما تحتاجيش ترتبيه اصلا، اعملى جرد فى آخر كل اسبوع مثلا و انتى بتجهزى هدوم الشغل او الكلية ليوم الاحد ، 10 او 15 دقيقة مرتين فى الاسبوع هيقدروا يشيلوا عنك هم ترتيب الدولاب و لعبكة الهدوم خالص، رجعى الهدوم اللى وقعت من على الشماعات فى مكانها تانى ، و التيشيرت اللى حطيتيه من على الرف من غير ما تطبقيه ، طبقيه و رجعيه مكانه و شيلى الهدوم من على الكرسي و حطيهم فى الغسالة وهكذا ، هتلاقى الدولاب بقى على طول مترتب.
5- ترتيب كل موسم :
طبعا ترتيب كل موسم ده مفيش مفر منه ، و علشان نسهل الدنيا عليكى خصوصا اننا خلاص بنطلع الهدوم الصيفى و بنشيل الشتوى، هنقولك على 4 خطوات بسيطة تعمليهم :
1- خرجى كل حجة من دولابك و فضيه تماما ، امسحى الرفوف و نفضيها كويس .
2- افرزى الهدوم بره الدولاب الأول، اللى محتاج مكواه خليه عل جنب لوحده ، و اللى محتاج تصليح على جنب تانى ، و طبعا ماتنسيش صندوق التبرعات.
3- ابدأى علقى الهدوم على الشماعات و طبقى التيشيرتات و غيرها و رتبيهم فى الدولاب كل حاجة مكانها ، ورتبى بحسب الالوان و الحاجات اللى بتلبسيها كتير خليها فى الاول .
4- اتبرعى بباقى الحاجات اللى مش هتحتاجيها، وابدأى خدى الحاجات اللى محتاجة تصليحات للترزى و اللى محتج مكواه للـ dry cleaning .
6- زودى من مساحة التخزين :
استغلى الزوايا اللى فى دولابك كويس، اشترى منظم الدولاب اللى ممكن تعلقيه على باب الدولاب من جوه و تحطى فيه الشرابات او الملابس الداخلية ، و ممكن كمان تشترى منظم الاكسسوارات علشان ترتبى فيه اكسسواراتك جوه الدولاب و تحافظى عليها من انها تضيع او تتعقد .
7- اتحكمى فى احتفاظك بالهدوم :
ودى ممكن تكون اصعب خطوة فى خطوات ازاى ترتبى دولابك ، وهى ان انك تتحكمى فى حبك للاحتفاظ بالهدوم و الحاجات القديمة و معظمنا للاسف عندنا المشكلة دى ، بس لازم تتحكمى فى الحب ده لانه بيسبب مشاكل منها انه بيخليكى تحتفظى بحاجات خلاص مالهاش لازمة و ده بيشغل مساحة فى دولابك على الفاضى، و حاولى ماتصرفيش هدوم على حاجة ولا تشتريها الا اذا كنتى محتاجاها فعلا ، اى حاجة هتلبسيه ” يوما ما ” اتخلصى منها فورا، مين عارف ” يوما ما ” ده هييجى امتى؟
اعرفى معانا كمان بالفيديو و الصور: 5 نصايح من IKEA لترتيب الغرف بشكل أفضل– –
