احمي شعرك من الشمس بميست طبيعي مع عامل حماية تعمليه بنفسك في البيت
زي ما البشرة بتحتاج حماية من الشمس كمان الشعر بيحتاج حماية لان حرارة الشمس والرطوبة والعرق, ده غير كمان في الصيف بيتعرض للمية المالحة او الكلور في حمام السباحة, وكل ده بيأثر عليه بشكل سلبي, ومش بس فروة الراس اللي بتبقى معرضة لحروق الشمس كمان الشعر بيجف وبيبقى هش وضعيف ولونه بيبهت وبيفقد لمعانه, وبالتالي استخدام واقي من الشمس للشعر مهم جدا وخصوصا لو بتقضي فترات طويلة في الشمس, والنهاردة من خلال موضوعنا هنقولك طريقة ميست لحماية الشعر من الشمس تقدري تعمليه في البيت بمكونات بسيطة جدا.
ميست لحماية الشعر من الشمس:
– فوايد الميست:
1- اول فايدة انه بيحمي الشعر من الشمس.
2- بيحافظ عليه رطب وناعم.
3- بيحفز بصيلات الشعر وبيحافظ عليه صحي.
4- بيدي ريحة حلوة للشعر.
المكونات:
1 كوب مية مقطرة “هنلاقيها في الصيدلية”, او ممكن تغلي مية وتسيبيها تبرد وتستخدميها في الوصفة.
من 2 – 3 معالق صغيرة من واقي الشمس بعامل حمايه SPF 25.
من 3 – 4 نقط زيت الروز ماري, وممكن تستبدلوه باي زيت عطري تاني تفضلوه.
الطريقة:
– هتضيفي واقي الشمس بتاعك العادي اللي انتي بتستخدميه مع المية والزيت, وتقلبيهم المكونات كلها مع بعض كويس.
– صبي الخليط في ازازة ببخاخ, وكده يبقى الميست جاهز للاستخدام.
– رشي فروة الراس والشعر كله من الجذور للاطراف قبل الخروج في الشمس او نزول البحر او حمام السباحة عشان تحميه من المية والحرارة والرطوبة.
– ملحوظة: رجي الازازة كويس قبل كل استخدام عشان تخلطي كل المكونات.
– ميست ضد تجعد وهيشان الشعر:
الشعر لما بيجف من الحرارة والرطوبة والمية المالحة والكلور, بيخليه يتجعد ويهيش, الميست ده هيحميه من التجعد والهيشان.
المكونات:
1 كوباية مية.
2 معلقة كبيرة جل صبار الالوفيرا.
1 معلقة صغيرة زيت الارجان.
1 معلقة صغيرة جلسرين.
الطريقة:
هتمزجي كل المكونات مع بعض, وتحطيها في ازازة ببخاخ وترشي بيه الشعر.