10 حيل سريعة هتساعدك تخسري وزن لو انتي كسولة

ريهام محمود
ريهام محمود
6545

معظمنا بيحلم بالجسم المثالي, لكن المشكلة اللي بتقابل كتير مننا اننا مش بنقدر نستمر على نظام غذائي لفترة طويلة وممكن نزهق بسرعة, ده غير ان لما بنبطل الرجيم ونرجع لنظامنا الغذائي العادي الوزن بيرجع يزيد تاني, وكمان مع ضغوط الحياة من شغل دراسة مش بيكون في وقت لممارسة الرياضة, عشان كده النهاردة هنقول لكل بنات حوا نصايح هتساعدك تخسي من غير مجهود او نظام غذائي او تمارين.

نصايح هتساعدك تخسي من غير مجهود:

1- متنسيش تشربي:

المية مهمة جدا وليها تأثير فعال في عملية الايض او التمثيل الغذائي لو شربتيها في الوقت المناسب, الافضل انك تشربي من 1 – 2 كوباية مية قبل كل وجبة ب 30 دقيقة, بالطريقة دي عملية التمثيل الغذائي هتشتغل بشكل مظبوط, ومعدتك هتتملي بشكل جزئي, وده هيساعد انك تاكلي كمية اكل اقل.

نصايح هتساعدك تخسي من غير مجهود 1
نصايح هتساعدك تخسي من غير مجهود 1

2- ركزي في الاكل بس:

وقت الاكل حاولي متشغليش نفسك بحاجة تانية, يعني اقعدي على الترابيزة, وكلي ببطء, ومتشغليش تفكيرك في حاجة, ولا تتفرجي على التليفزيون, ولا تتكلمي في التليفون, ولا تقعدي على اللاب توب, ركزي في الاكل وبس وخدي بالك من اللي انتي بتاكليه, ده هيخليكي تتذوقي الاكل بشكل احسن, وتاكلي كميات اكل اقل.

نصايح هتساعدك تخسي من غير مجهود 2
نصايح هتساعدك تخسي من غير مجهود 2

3- كلي في طبق اصغر وباستخدام ال Chopsticks:

كلي في اطباق صغيرة لان ده هيخليكي تحطي كمية اكل صغيرة وحتى لو مليتي الطبق هتكون الكمية اقل من الطبق الكبير وكلي الكمية اللي انتي حطتيها بس ومتزوديش عليها تاني, ولو قدرتي انك تستخدمي ال Chopsticks هيكون افضل لانها هتخليكي تاكلي ببطء اكتر, وده هيساعد انك تحسي بالشبع بكمية اقل من الاكل, ولو مش هتعرفي تاكلي بالعيدان الخشب ممكن تستخدمي معلقة صغيرة بدل الكبيرة.

نصايح هتساعدك تخسي من غير مجهود 3
نصايح هتساعدك تخسي من غير مجهود 3

4- نامي اكتر:

لو نمتي اكيد مش هتاكلي وانتي نايمة, ده غير ان النوم عدد ساعات كفاية بيأثر بشكل ايجابي على عملية التمثيل الغذائي ومستويات الهرمون الصحيحة اللي بتساعد على الحفاظ على لياقة الجسم, والجسم اثناء النوم بيحرق تقريبا من 50 – 100 سعر حراري في الساعة.

نصايح هتساعدك تخسي من غير مجهود 4
نصايح هتساعدك تخسي من غير مجهود 4

5- نامي في درجة حرارة منخفضة:

كل اللي عليكي تعمليه انك توقفي منظم الحرارة لو عندك او تفتحي الشباك, لان الابحاث من المعهد القومي للصحة اثبتت ان النوم في درجة حرارة 19 درجة مئوية بيساعد جسمك على التخلص من السعرات الحرارية لانه بيحرق الدهون عشان يحافظ على درجة حرارته.

نصايح هتساعدك تخسي من غير مجهود 5
نصايح هتساعدك تخسي من غير مجهود 5

6- دخلي مكونات حارقة للدهون في نظامك الغذائي:

مش لازم تتخلي عن اكلاتك المفضلة اللي بتحبيها, ممكن بس تنوعي اكلك وتدخلي الاكلات اللي ممكن تساعد على حرق الدهون, زي سمك السلمون والبيض والمكسرات وزيت الزيتون والفلفل الحراق والشاي الاخضر, كل الحاجات دي بتساعد على زيادة عملية التمثيل الغذائي وحرق الدهون بشكل اكتر, وحتى كمان روايح الحمضيات زي البرتقان والليمون او النعناع من الحاجات اللي بتقلل من الشهية.

نصايح هتساعدك تخسي من غير مجهود 6
نصايح هتساعدك تخسي من غير مجهود 6

7- متمنعيش الحاجات اللي بتحبيها:

لو عايزة تاكلي كيك او شوكولاتة كلي بس ممكن تاكلي واحدة او قطعة بدل من 3 او 5, وكليها الصبح عشان يبقى في وقت كافي انك تحرقي كل السعرات الحرارية اللي دخلت الجسم خلال فترة النهار, لان انك تمنعي نفسك منها خالص ده هيحطك تحت ضغط وهتكون النتيجة ان الهرمونات السيئة هتعلى في الجسم, بالاضافة كمان انك هتلومي نفسك انك كسرتي القواعد وكلتي حاجة حلوة, عشان كده الافضل انك تاكلي بس بكمية اقل.

نصايح هتساعدك تخسي من غير مجهود 7
نصايح هتساعدك تخسي من غير مجهود 7

8- اغسلي سنانك:

لو بتغسلي اسنانك مرتين في اليوم, زودي واغسليهم بعد كل وجبة وخليها عادة عندك, لان ده هيمنعك انك تاكلي تاني, لان الاكل بيكون طعمه مش حلو لما بيكون في الفم نكهة المينثول اللي في المعجون, وتاني حاجة انك هتكسلي تغسلي اسنانك كذا مره بعد الاكل.

نصايح هتساعدك تخسي من غير مجهود 8
نصايح هتساعدك تخسي من غير مجهود 8

9- اضحكي:

حسب الدراسات اللي تم نشرها في المجلة الدولية للبدانة, ان الضحك بيزود من استهلاك الطاقة بنسبة بتوصل ل 20%, بالاضافة لده ان اثناء الضحك انتي بتشغلي عضلات البطن, عشان كده بننصحك تشغلي اي حاجة كوميدية كل يوم وابداي مارسي رياضة الضحك :D.

نصايح هتساعدك تخسي من غير مجهود 9
نصايح هتساعدك تخسي من غير مجهود 9

10- استخدمي الضغط السخن:

هنقولك طريقة هتساعدك على تخسيس الوزن تقدري تعمليها وانتي بتتفرجي على التليفزيون او بتقري كتاب, التدفئة هتخليكي تعرقي وبالتالي ده هيخلصك من السوائل الزيادة في الجسم, ولو عايزة تخسسي اجزاء معينة في الجسم استخدمي الضغط السخن, ومن اكتر طرق الضغط المستخدمة للتخسيس وليها نتيجة فعالة هي الضغط بالجنزبيل او الملح.

– الضغط بالجنزبيل, هتعملي شاي جنزبيل اغلي مية وحطيها فيها جنزبيل مطحون او فريش, هاتي قطعة قماش او فوطة وبليها كلها في شاي الجنزبيل, سيبيها لما تهدى شوية عشان متحرقش بشرتك, وبعدين حطيها على المكان اللي عايزة تخسسيه وممكن عشان تزودي تأثير الحرارة لفترة اطول تستخدمي السيشوار عليها, وممكن تستخدمي فوطتين تبدلي بينهم تحطي واحدة عقبال ما تبرد على جسمك تكون التانية اتشربت كويس من الشاي تشيلي اللي بردت وتحطي التانية مكانها, كرري العملية كذا مرة ورا بعض.

– الضغط بالملح, حمصي ½ كوباية ملح, وحطيه في قطعة قماش رقيقة, وحطيها على البطن, الحرارة من الملح السخن هتساعد على فقدان دهون البطن بشكل فعال, كمان هتساعد على شدها, انتظمي على الطريقة دي وهتلاحظي بعد فترة من الاستخدام نتيجو ملحوظة.

وممكن تعملي طريقة تانية, قبل الشاور, اخلطي 3 معالق صغيرة ملح مع شوية مية سخنة لحد ما تتكون عندك عجينة سميكة, دلكي البطن بالخليط ده لمدة 15 دقيقة, وبعدين اشطفيه بالمية, اعملي الطريقة دي بشكل منتظم هتخلصك من دهون البطن.

نصايح هتساعدك تخسي من غير مجهود 10
نصايح هتساعدك تخسي من غير مجهود 10

9 عادات لو عملتيهم هتساعدك على خسارة الوزن وتحسين صحتك بشكل فوري

عادات لتخسيس الوزن
عادات لتخسيس الوزن

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن